திருவண்ணாமலை

இந்தியாவிலேயே தமிழகத்தில் மட்டும் தான் பெண்களுக்கு ஏராள திட்டம் நிறைவேற்றம் – வி.பன்னீர்செல்வம் எம்.எல்.ஏ. பெருமிதம்

திருவண்ணாமலை:-

இந்தியாவிலேயே தமிழகத்தில் மட்டும் தான் பெண்களுக்கு ஏராளமான திட்டங்கள் நிறைவேற்றப்படுகின்றன என்று வி.பன்னீர்செல்வம் எம்.எல்.ஏ. பெருமிதத்துடன் கூறினார்.

திருவண்ணாமலை மாவட்டம் கலசப்பாக்கம் சட்டமன்ற தொகுதிக்குட்பட்ட ஜவ்வாதுமலையில் வட்டார ஒருங்கிணைந்த குழந்தை வளர்ச்சி திட்டத்தின் சார்பில் கர்ப்பிணி பெண்களுக்கான சமுதாய வளைகாப்பு நிகழ்ச்சி நடைபெற்றது. இந்நிகழ்ச்சிக்கு மாவட்ட ஒருங்கிணைந்த குழந்தை வளர்ச்சி மாவட்ட திட்ட அலுவலர் தலைமை வகித்தார். வட்டார அலுவலர் சரண்யா வரவேற்றார். வட்டார வளர்ச்சி அலுவலர் சக்திவேல் முன்னிலை வகித்தார். மருத்துவர்கள் ராம்மனோகர் சித்தார்த் சித்த மருத்துவர் ச.உமேரா ஆகியோர் கர்ப்பிணி பெண்கள் பராமரிப்பு குறித்து விளக்கி கூறினர்.

இந்நிகழ்ச்சியில் சட்டமன்ற உறுப்பினர் வி.பன்னீர்செல்வம் சிறப்பு விருந்தினராக கலந்து கொண்டு 120 கர்ப்பிணி பெண்களுக்கு சீர்வரிசை பொருட்கள் மற்றும் அம்மா மகப்பேறு சஞ்சீவி பெட்டகத்தை வழங்கி பேசியதாவது:-

ஒரு நாட்டின் முன்னேற்றம் அந்த நாட்டில் உள்ள தாய்மார்கள் மற்றும் குழந்தைகளின் நலனை பொறுத்து அமைகிறது. இன்றைய குழந்தைகள் நாளைய சமுதாய தூண்கள். இன்றைய குழந்தைகளின் நலனுக்காக நாம் செய்யும் அனைத்து முதலீடுகளும் நம் நாட்டின் எதிர்கால நலனுக்காக மேம்பாட்டிற்கான முதலீடுகளாகும். மேலும், இந்த விழாவில் பங்கேற்றுள்ள கர்ப்பிணி தாய்மார்கள் ஆரோக்கியமான குழந்தையை பெற்றெடுக்க வேண்டும்.

ஏனெனில் குழந்தைகள் ஊட்டச்சத்து குறைபாடுடன் இருப்பது அல்லது வயதிற்கு ஏற்ற எடை மற்றும் உயரத்துடன் வளர்ச்சி இல்லாமல் இருப்பது போன்றவற்றை நாம் கவனிக்காமல் விட்டால் எதிர்காலத்தில் குழந்தைகள் ஆரோக்கிய குறைபாடுடன் வேலைசெய்யும் திறன் குறைந்தவர்களாக இருப்பார்கள். இது அவர்களின் எதிர்கால வாழ்க்கையை பாதிக்கும் மற்றும் சமுதாயத்தையும் பாதிக்கும் என்பதை நீங்கள் நினைவில் கொள்ளவேண்டும்.

இந்தியாவிலேயே தமிழகத்தில் மட்டும் தான் பெண்களின் நலன்களுக்கான ஏராளமான திட்டங்களை அம்மாவின் அரசு செயல்படுத்தி வருகிறது. உதாரணத்திற்க்கு கர்ப்பிணி தாய்மார்களுக்கு ஆரம்ப சுகாதார நிலையங்களில் தரமான சிகிச்சையும், ஒவ்வொரு கர்ப்பிணி தாய்மார்களுக்கு ரூ.18000 நிதி உதவியும் அளித்து தாய்மார்களின் நலனை காக்கின்ற அரசாக அம்மாவின் அரசே விளங்குகிறது.

அது மட்டுமல்ல திருமணத்திற்கு தாலிக்கு தங்கம் வழங்கும் திட்டத்தின் கீழ் ஏழை மணப்பெண்ணின் திருமணத்திற்கு திருமாங்கல்யம் செய்ய 8 கிராம் தங்கம் வழங்கப்பட்டு வருகிறது. அதேபோல வேலைக்கு செல்லும் பெண்களுக்கு 9 மாதபேறு கால விடுமுறை அளித்தவர் புரட்சி தலைவி அம்மா அவர்கள் தான் என்பதை நீங்கள் நினைத்து பார்க்க வேண்டும். இதுபோல எண்ணற்ற திட்டங்களை தாய்மார்களின் வளர்ச்சிக்காக கொண்டு வந்தவர் புரட்சித்தலைவி அம்மா அவர்கள் தான்.

முன்பெல்லாம் இந்த மலைப்பகுதியில் மருத்துவமனைகளில் பிரசவம் பார்ப்பது பெரும் அரிதாக காணப்பட்டது. ஆனால் இப்போது இதுபோன்ற அம்மாவின் அரசின் திட்டங்களாலும் விழிப்புணர்வு காரணமாகவும் ஆரம்ப சுகாதார நிலையங்களில் பிரசவம் நடப்பது அதிகரித்து வருகிறது. இந்தப்பகுதி மலைவாழ் மக்கள் பெரும்பாலானோர் ரத்தசோகை பிரச்சினையால் அவதிப்பட்டு வருவதாக அறிந்துள்ளேன். இது போன்ற பெண்கள் அம்மா பெட்டகத்தில் உள்ள சித்த மருந்துகளை தொடர்ந்து சாப்பிட்டு பயன்பெற வேண்டும். மேலும், அரசு மருத்துவ மனைகளில் பரிசோதனை செய்து கொள்வது பாதுகாப்பானது.

இவ்வாறு வி.பன்னீர்செல்வம் எம்.எல்.ஏ. பேசினார்.

இந்நிகழ்ச்சியில் ஒன்றிய கழக செயலாளர் வெள்ளையன், ஒன்றிய எம்.ஜி.ஆர். இளைஞரணி செயலாளர் மூர்த்தி மருத்துவர்கள் பிரசாந்த், அரிபாலாஜி, ராதாகிருஷ்ணன், காஞ்சனா, சுந்தரசாமி, அனிருத், விமல்ராஜ், சுகாதார ஆய்வாளர் நித்யா, வட்டார மேற்பார்வையாளர்கள் ராஜகுமாரி, குப்பு, மற்றும் அங்கன் வாடி பணியாளர்கள் சுகாதார செவிலியர்கள் கழக நிர்வாகிகள் உள்பட பலர் கலந்து கொண்டனர்.