தற்போதைய செய்திகள்

கொளத்தூர் பிரதான சாலையில் மழைநீர் வடிகால் அமைக்கும் பணி 18 மாத காலத்திற்குள் முடிக்கப்படும் – பேரவையில் அமைச்சர் எஸ்.பி.வேலுமணி உறுதி

சென்னை 

கொளத்தூர் பிரதான சாலையில் மழைநீர் வடிகால் அமைக்கும் பணி 18 மாத காலத்திற்குள் முடிக்கப்படும் என்று பேரவையில் அமைச்சர் எஸ்.பி.வேலுமணி தெரிவித்தார்.

தமிழக சட்டப்பேரவையில் எதிர்கட்சி தலைவர் மு.க.ஸ்டாலின் கொளத்தூர் தொகுதி தொடர்பாக சிறப்பு கவன ஈர்ப்பு தீர்மானத்தின் மீது பேசினார்.

இதற்கு நகராட்சி நிர்வாகத் துறை அமைச்சர் எஸ்.பி.வேலுமணி பதிலளித்து பேசியதாவது:-

வில்லிவாக்கம் தொகுதி, வில்லிவாக்கம் ஜி.கே.எம். காலனி, பட்மேடு ரெயில் கடவுப்பாதை 1 ல், மேம்பாலம் அமைப்பதற்காக, வடிவமைப்பு தயாரிக்கப்பட்டு, 58 கோடியே 50 லட்சம் ரூபாய் மதிப்பில் மதிப்பீடு தயாரிக்கப்பட்டுள்ளது. இம்மதிப்பீட்டில், பாலத்திற்கு தேவையான தனியார் நிலத்தை கையகப்படுத்தவும், ஐ.சி.எப். நிறுவனத்தின் 1,230 ச.மீ. பரப்பளவு நிலத்தை, 35 வருட கால குத்தகைக்கு எடுக்கவும், தேவையான 34 கோடி ரூபாய் நிதியும் அடங்கும். ரயில்வே பகுதியில், ரயில்வே துறை மூலம் பணிகள் நடைபெற்று வருகிறது.

இத்திட்டத்திற்கான நிர்வாக அனுமதி மற்றும் நிதியாதாரம் மூலதன மானிய நிதி மூலம் பெறப்பட்டது. ஒப்பந்தப்புள்ளிகள் பெறப்பட்டு, பணியாணை 10.9.2019 அன்று வழங்கப்பட்டது. இப்பாலம் அமைப்பதற்கு தேவையான நிலத்தை, ஐ.சி.எப் நிறுவனத்திடமிருந்து குத்தகை அடிப்படையில் பெறுவதற்கு, 10 கோடியே 75 லட்சம் ரூபாயை, சென்னை மாநகராட்சி மூலம் செலுத்தும் போது, ஐ.சி.எப் நிறுவனம், சுற்று சுவர் வெளிப்புறம் உள்ள சாலையை பயன்படுத்துவதற்கும் சேர்த்து, 15 கோடியே 36 லட்சம் ரூபாய் செலுத்துமாறு கேட்டுக் கொண்டது.

இத்தொகையை ஐ.சி.எப் நிறுவனத்திற்கு வழங்குவதற்கு, தனி அலுவலரால் அனுமதி வழங்கப்பட்டுள்ளது. அதற்கான ஒப்புகைக் கடிதமும், ஐ.சி.எப் நிறுவனத்திற்கு வழங்கப்பட்டுள்ளது. இத்தொகையை செலுத்த, ரயில்வே வாரியம் மற்றும் ஐ.சி.எப் நிறுவனத்தின் அனுமதி எதிர்பார்க்கப்படுகிறது.

கொளத்தூர் பிரதான சாலையில், ஆழ்துளை கடைக்கால் மீது, பளுதாங்கும் சோதனை நடத்துவதற்கு ஏதுவாக, ஆழ்துளை கடைக்கால் அமைக்கும் பணியும், ஐ.சி.எப். சாலைப்பகுதியில், மழைநீர் வடிகால் அமைக்கும் பணியும், தற்போது நடைபெற்று வருகிறது. இப்பாலப்பணி, 18 மாத காலத்திற்குள் முடிக்கப்படும். இவ்வாறு அமைச்சர் தெரிவித்தார்.