சிறப்பு செய்திகள்

சீன அதிபருக்கு வழிநெடுக பிரம்மாண்ட வரவேற்பு – 35 இடங்களில் பல்வேறு கலைநிகழ்ச்சிகளுக்கு ஏற்பாடு

சென்னை:-

சீன அதிபர் ஜி ஜின் பிங் அரசுமுறை பயணமாக 11-ந்தேதி சென்னை வருகிறார். பிரதமர் நரேந்திர மோடியும் நாளையே சென்னை வருகிறார். சென்னை விமான நிலையத்தில் சீன அதிபருக்கு எழுச்சிமிகு வரவேற்பு அளிக்க ஏற்பாடு செய்யப்பட்டு உள்ளது. கலை நிகழ்ச்சிகளும் நடத்தப்படுகின்றன. வரவேற்புக்கு பின்னர் சீன அதிபர் கிண்டியில் உள்ள நட்சத்திர ஓட்டலுக்கு சென்று தங்குகிறார். பிரதமர் மோடி கோவளத்தில் உள்ள நட்சத்திர ஓட்டலில் தங்க உள்ளார்.

11-ந்தேதி பிற்பகலில் இரு தலைவர்களும் மாமல்லபுரத்தில் சந்தித்து பேசுகிறார்கள். அர்ஜூனன் தவசு, வெள்ளை உருண்டை பாறை, ஐந்து ரதம் ஆகிய இடங்களை முதலில் பார்வையிடுகிறார்கள். அப்போது இருவரும் ஒன்றாக புகைப்படங்களும் எடுத்துக் கொள்கிறார்கள்.

பின்னர் மாலையில் கடற்கரை கோயில் அருகே நடைபெறும் நிகழ்ச்சியில் பங்கேற்கிறார்கள். கடற்கரை கோயிலின் பின்னணியில் பிரம்மாண்ட மேடை அமைக்கப்பட்டு உள்ளது. அங்கு பரதநாட்டிய நிகழ்ச்சிகளும், கிராம கலை நிகழ்ச்சிகளும், ஒயிலாட்டம், மயிலாட்டம் போன்ற நிகழ்ச்சிகளும் நடத்தப்படுகின்றன. இதற்காக மாமல்லபுரத்தில் சிறப்பு ஏற்பாடுகள் செய்யப்பட்டுள்ளன.

சீன அதிபரின் வருகைக்கு நாளை ஒருநாள் மட்டுமே இருப்பதால் சென்னை மற்றும் மாமல்லபுரத்தில் வரலாறு காணாத பாதுகாப்பு ஏற்பாடுகள் செய்யப்பட்டுள்ளன. சீனாவில் இருந்து வந்துள்ள அந்நாட்டு பாதுகாப்பு அதிகாரிகளும், டெல்லியில் இருந்து வருகை தந்துள்ள மத்திய பாதுகாப்பு குழுவினரும் மாமல்லபுரத்தில் பாதுகாப்பு ஏற்பாடுகளை மேற்பார்வையிட்டு ஆய்வு செய்துள்ளனர். கடலோர பகுதிகள் முழுவதிலும் கடலோர பாதுகாப்பு படையினரும் தீவிரமாக கண்காணித்து வருகின்றனர்.

சீனாவில் இருந்து இரண்டு போர் கப்பல்களும், இந்தியாவின் இரண்டு போர் கப்பல்களும் மாமல்லபுரத்தில் இருந்து சென்னை வரை பாதுகாப்புக்காக நிறுத்தப்பட்டுள்ளன. அதிவேக எந்திர படகுகளும் பாதுகாப்பு பணியில் ஈடுபடுத்தப்பட்டு உள்ளன. கிண்டியில் இருந்து மாமல்லபுரத்துக்கு சுமார் 50 கி.மீ. தூரம் காரிலேயே சீன அதிபர் பயணம் செய்கிறார். இதற்காக அவர் செல்லும் சாலைகளில் வழிநெடுக போலீசார் தீவிரமாக கண்காணித்து வருகிறார்கள். சீன அதிபரின் பாதுகாப்பிற்காக தனித்தனியே போலீஸ் அதிகாரிகள் அடங்கிய குழுக்களும் அமைக்கப்பட்டுள்ளன.

சீன அதிபர் ஒருவர் சென்னைக்கு வருவது இதுவே முதல் முறையாகும். இந்தியா- சீனா இடையேயானநல்லுறவை மேம்படுத்தும் வகையில் உலக புகழ்பெற்ற சுற்றுலாத் தலமான மாமல்லபுரத்தில் பிரதமர் மோடியும், சீன அதிபர் ஜி ஜின் பிங்கும் சந்தித்து பேசுவது தமிழகத்திற்கு ெபருமை மட்டுமல்ல மிகவும் முக்கியத்துவம் வாய்ந்ததாகவும் கருதப்படுகிறது. அதனால் சீன அதிபருக்கு இதுவரை இல்லாத வகையில் சிறப்பான பிரம்மாண்டமான வரவேற்பு அளிக்க ஏற்பாடு செய்யப்பட்டுள்ளது.

சென்னை விமான நிலையத்தில் சீன அதிபர் வந்து இறங்கியதும் சுமார் 7 ஆயிரம் பேர் திரண்டு அவரை வரவேற்கும் வகையில் ஏற்பாடுகள் செய்யப்பட்டுள்ளன. விமான நிலையத்தில் இருந்து கிண்டி நட்சத்திர ஓட்டலுக்கு செல்லும் வழியிலும் கிண்டியில் இருந்து மாமல்லபுரம் செல்லும் சாலையிலும் சுமார் 50 கி.மீ. தூரத்துக்கு 35 இடங்களில் சீன அதிபருக்கு எழுச்சிமிகு வரவேற்பு அளிக்கப்படுகிறது. இதற்காக சாலையோரங்களில் வாழை மரம் மற்றும் தோரணங்கள் கட்டப்பட்டு உள்ளன.

சீன அதிபர் ஜி ஜின்பிங் சென்னை விமான நிலையத்தை வந்தடைந்ததும் அவரை பிரதமர் மோடி வரவேற்கிறார். இந்நிகழ்ச்சியில் முதலமைச்சர், துணை முதலமைச்சர், ஆளுநர் ஆகியோர் பங்கேற்கிறார்கள். சீன அதிபர் விமானத்தை விட்டு இறங்கியதும் விமான நிலைய வளாகத்திற்குள் கரகாட்டம், ஒயிலாட்டம், தப்பாட்டம் உள்ளிட்ட தமிழக பாரம்பரிய கலை நிகழ்ச்சிகள் நடத்த ஏற்பாடு செய்யப்பட்டுள்ளது. இதை சீன அதிபர் நடந்து சென்று பார்த்து ரசிக்கிறார்.

விமான நிலையத்தில் இருந்து ஓட்டல் வரை 5 கி.மீ. தூரத்திற்கு வழிநெடுக 6,800 கல்லூரி மாணவ, மாணவிகள், சுய உதவி குழுவினர் மற்றும் பொதுமக்கள் தேசியக்கொடியை ஏந்தி வரவேற்பு அளிக்கிறார்கள். கேரள செண்டை மேளம், கோவை டிரம்ஸ், வட இந்தியாவில் புகழ் பெற்ற நாசிக் டோல், நாதஸ்வர இசை போன்ற இசை நிகழ்ச்சிகளும் நடத்தப்படுகின்றன. கிண்டி ஓட்டல் முன்பு வாழை மற்றும் கரும்புகளாலான அலங்கார வளைவுகள் அமைக்கப்பட்டு உள்ளது. ஓட்டல் வாசலில் தமிழர்களின் பாரம்பரிய இசையான நாதஸ்வர மங்கள இசையுடன் ஆரத்தி எடுத்து சீன அதிபரை வரவேற்க ஏற்பாடு செய்யப்பட்டுள்ளது.

சைதாப்பேட்டை நீதிமன்றம் அருகே கரகாட்டம், டிரம்ஸ் வாத்தியம், காந்திமண்டபம் அருகே தப்பாட்டம், ஒயிலாட்டம், மத்திய கைலாஷ் அருகே மதுரை கரகாட்ட குழுவினரின் ஆடல் நிகழ்ச்சி, திருவான்மியூர் சிக்னல் அருகே ெசண்டை மேளம் ஆகியவை இடம் பெறுகின்றன. கந்தன்சாவடியில் பேண்ட் வாத்திய குழுவினரின் இசை நிகழ்ச்சியும், புலியாட்டம், சிலம்பாட்டம் நிகழ்ச்சிகளும் நடத்தப்படுகின்றன. இதேபோல் வழிநெடுக பொதுமக்கள் பாதிப்பு ஏற்படாத வகையில் வரவேற்பு வளைவுகள், பேனர்கள் அமைக்கப்பட்டு சீன அதிபரை மனம் குளிர வரவேற்க ஏற்பாடு செய்யப்பட்டுள்ளது.

பிரதமர் மோடிக்கும், சீன அதிபருக்கும் திருவிடந்தையில் இருந்து ஒன்றாக வரவேற்பு கொடுக்கும் வகையில் நிகழ்ச்சிக்கு ஏற்பாடு செய்யப்பட்டுள்ளது. மாமல்லபுரம் நுழைவு வாயிலில் பனை ஓலையால் அலங்கரிக்கப்பட்ட வளைவுகள் அமைக்கப்பட்டு உள்ளன. அர்ஜூன் தவசு பகுதியில் மலர்களால் அலங்கரிக்கப்பட்ட வளைவும், ஐந்துரத சாலையில் காய்கறிகளால் அலங்கரிக்கப்பட்ட வளைவுகளும், கடற்கரை கோயில் நுழைவு வாயிலில் பலவண்ண மலர்களால் அலங்கார வளைவுகளும் அமைக்கப்பட்டு உள்ளன.

சீன அதிபர் தமிழகத்தின் பெருமையையும், கலாச்சாரத்தையும் அறிந்து கொள்ளும் வகையில் இது போன்ற வரவேற்புகளுக்கு ஏற்பாடு செய்யப்பட்டுள்ளன. சீன அதிபரும், பிரதமர் மோடியும் 11, 12 ஆகிய தேதிகளில் மாமல்லபுரத்தில் தங்கியிருந்து பேச்சுவார்த்தை நடத்துகிறார்கள்.