சிறப்பு செய்திகள்

சீன அதிபர் & பிரதமர் மோடிக்கு பிரம்மாண்ட வரவேற்பு அளிப்பீர் – தமிழக மக்களுக்கு முதலமைச்சர் வேண்டுகோள்

மாமல்லபுரத்தில் சீன அதிபரும், பிரதமர் மோடியும் இரண்டு நாட்கள் தங்கியிருந்து இந்திய- சீன உறவு பற்றி பேச்சுவார்த்தை நடத்துவது தமிழகத்துக்கு கிடைத்த பெருமையாகும். இந்த பெருமையை மனதில் கொண்டு இரு தலைவர்களும் சென்னை வரும்போது உள்ளார்ந்த உணர்வோடு பிரம்மாண்ட வரவேற்பு அளிக்க வேண்டும் என்று தமிழக மக்களுக்கு முதலமைச்சர் எடப்பாடி கே.பழனிசாமி வேண்டுகோள் விடுத்துள்ளார்.

இது குறித்து முதலமைச்சர் எடப்பாடி கே.பழனிசாமி வெளியிட்டுள்ள அறிக்கையில் கூறியிருப்பதாவது:-

இந்தியா- சீனா நாடுகளுக்கு இடையேயான நல்லுறவை மேம்படுத்த மேதகு சீன குடியரசுத் தலைவர் ஷி.ஜின்பிங், பிரதமர் நரேந்திர மோடி ஆகியோர் இடையே அக்டோபர் 11 மற்றும் 12 ஆகிய நாட்களில் நடைபெற உள்ள பேச்சு வார்த்தை, தமிழ்நாட்டிலுள்ள மாமல்லபுரத்தில் நடைபெறுவது தமிழ்நாட்டிற்கே பெருமை சேர்ப்பதோடு மட்டுமல்லாமல், தமிழ்நாட்டின் மதிப்பை உலக அரங்கில் உயர்த்தியுள்ளது.

இந்த நிகழ்ச்சிக்கு தமிழ்நாட்டிலுள்ள மாமல்லபுரத்தை தேர்வு செய்தமைக்கு பிரதமருக்கு நன்றி தெரிவித்துக் கொண்டு, தமிழ்நாட்டு மக்கள் சார்பாகவும், தமிழ்நாடு அரசின் சார்பாகவும் இவ்விரு உலகத் தலைவர்களையும் வரவேற்கின்றேன்.
பல நூற்றாண்டுகளுக்கு முன்பிருந்தே வணிக ரீதியாகவும், கலாச்சார ரீதியாகவும் சீனாவிற்கும், தமிழ்நாட்டிற்கும் இடையே தொடர்பு இருந்துள்ளது என்பது வரலாறு.

பண்டைய சீனநாட்டின் தூதுவர் யுவான் சுவாங், பல்லவ நாட்டிற்கு வந்து சென்றிருக்கிறார் என்பதும், அக்காலத்தில் பல்லவ நாட்டின் துறைமுகமாக விளங்கிய இதே மாமல்லபுரம், இந்த நிகழ்ச்சிக்கு தேர்வு செய்யப்பட்டது மிகவும் பொருத்தமானது என நான் கருதுகிறேன். சீனநாட்டுடன் கடல் வழி வியாபாரம் மாமல்லபுரம் வழியாக நடைபெற்றதாக வரலாறு கூறுகிறது.

அதே போல், சோழர்கள் காலத்திலும், சீனாவுடனான வணிக தொடர்புகள் வலுவாக இருந்துள்ளது தமிழர்களுக்கு பெருமை சேர்ப்பதாகும். ஏற்கனவே 1956-ம் ஆண்டு, மேதகு சீன நாட்டு பிரதமர் சூ.என்லாய், மாமல்லபுரம் அருகிலுள்ள குழிப்பான்தண்டலம் கிராமத்திற்கு வருகை தந்ததை இங்கே நினைவு கூர விரும்புகிறேன்.

இந்த இரு தலைவர்களின் சந்திப்பு யுனெஸ்கோ உலக பாரம்பரிய மையமான மாமல்லபுரத்தில் நடைபெறுவது, பண்டைய வரலாற்றின் தொடர்ச்சியாகவே அமைந்துள்ளது குறிப்பிடத்தக்கது. மேதகு சீன நாட்டு குடியரசுத் தலைவரின் வருகை, தமிழ்நாட்டுக்கு மட்டுமின்றி, இந்தியாவிற்கே வரலாற்று சிறப்பு வாய்ந்த ஒரு நிகழ்வாகும்.

தமிழ்நாட்டிற்கு வருகை புரியும் மேதகு சீன நாட்டு குடியரசுத் தலைவர் ஷி.ஜின்பிங், பாரதப் பிரதமர் நரேந்திர மோடி ஆகியோருக்கு, தமிழ்நாட்டு மக்கள் அனைவரும் உள்ளார்ந்த உணர்வோடு உற்சாக வரவேற்பு அளிக்க வேண்டும் என அன்புடன் கேட்டுக்கொள்கிறேன்.

இவ்வாறு முதலமைச்சர் எடப்பாடி கே.பழனிசாமி வெளியிட்டுள்ள அறிக்கையில் தெரிவித்துள்ளார்.