தற்போதைய செய்திகள்

கொரோனா வைரஸ் தடுப்பு மருந்துகள் விரைவில் நல்ல செய்தி வரும் : பேரவையில் அமைச்சர் டாக்டர் சி.விஜயபாஸ்கர் தகவல்

சென்னை 

கொரோனா வைரஸ் தடுப்பு மருந்துகள் தொடர்பாக விரைவில் நல்ல செய்தி வரும் என்று பேரவையில் அமைச்சர் விஜயபாஸ்கர் தெரிவித்தார்

தமிழக சட்டப்பேரவையில்  கேள்வி நேரத்தில் தி.மு.க. சட்டமன்ற உறுப்பினர் பொன்முடி கொரோனா வைரஸ் அச்சம் மக்களை அச்சுறுத்தி வருகிறது. தனியார் மருத்துவமனைகளையும் கொரோனா வைரஸ் பரிசோதனை செய்ய பயன்படுத்தி கொள்ள வேண்டும். அத்தகைய திட்டம் அரசிடம் உள்ளதா? என்று துணை கேள்வி எழுப்பினார். இதற்கு அமைச்சர் சி.விஜயபாஸ்கர் எதிர்க்கட்சித் தலைவர் நேற்று கூட இந்த கோரிக்கையை வைத்தார். ஒரு பரிசோதனை மையத்தில் நாளொன்றுக்கு 100 பேருக்கு கொரோனா பரிசோதனை செய்ய முடியும் .

ராஜீவ்காந்தி மருத்துவமனையிலும் கொரோனா வைரஸ் பரிசோதனை மையம் அமைக்க மத்திய அரசு அனுமதி வழங்கி உள்ளது. தமிழகத்தில் 5 இடங்களில் உள்ள பரிசோதனை கூடங்களில் நாளொன்றுக்கு 500 பேருக்கு பரிசோதனை செய்ய முடியும். அப்பல்லோ, வேலூர் சி.எம்.சி போன்ற சிறப்பான வசதிக் கொண்ட தனியார் மருத்துவக்கல்லூரி மருத்துவமனையிலும் கொரோனா வைரஸ் பரிசோதனையில் பயன்படுத்தி கொள்ள ஐ.சி.எம்.ஆர் அனுமதி பெற்று ஈடுபடுத்திக்கொள்ளப்படுவார்கள்.

தனியார் மருத்துவக்கல்லூரி மருத்துவமனைகள், கார்ப்பரேட் மருத்துவமனைகளில் கொரோனா வைரஸ் பரிசோதனையில் ஈடுபடுத்திக்கொள்ள அரசு அனுமதி வழங்க உள்ளது. அதற்கான கட்டணத்தை அரசு நிர்ணயம் செய்யும். ராஜீவ்காந்தி மருத்துவமனையில் நான் திடீர் ஆய்வு மேற்கொண்டேன். அப்போது பன்னாட்டு நிறுவனத்தில் பணியாற்றும் ஒருவர். தனக்கு கொரோனா வைரஸ் பரிசோதனை செய்ய வேண்டும் என்று கேட்டுக்கொண்டார்.

அவரிடம் கேட்டபோது, தனக்கு இருமல் இருப்பதால், ராஜீவ்காந்தி மருத்துவமனையில் கொரோனா பாதிப்பில்லை என்று சான்றிதழ் பெற்று வருமாறு கூறியுள்ளனர் என்றார். அப்போது அவரிடம் இருமல் இருக்கிறதா, காய்ச்சல் இருக்கிறதா? மூச்சு திணறல் இருக்கிறதா என்று கேட்டேன். இந்த 3 அறிகுறிகள் இருந்தால் மட்டுமே கொரோனா வைரஸ் பரிசோதனை செய்யப்படும் என்று தெரிவித்தேன். கொரோனா வைரசால் பாதிக்கப்பட்ட நாடு மற்றும் மாநிலங்களுக்கு சென்று வந்தவர்களுக்கு கொரோனா வைரஸ் பரிசோதனை செய்யப்படும் என்றார்.

இதனை தொடர்ந்து எதிர்க்கட்சி தலைவர் ஸ்டாலின் தொலைக்காட்சி மற்றும் ஊடகங்களில் கொரோனாவுக்கு தடுப்பு மருந்து கண்டுபிடிக்கப்பட்டதாக செய்திகள் வெளியாகி உள்ளது. அதேபோல் அமெரிக்காவிலும் மருந்து கண்டுபிடிக்கப்பட்டதாக செய்திகள் வெளியாகி உள்ளன. அது பற்றி அரசுக்கு தெரியுமா? என்று கேட்டார்.

இதற்கு அமைச்சர் விஜயபாஸ்கர் எம்.ஜி.ஆர். மருத்துவ பல்கலைக்கழகத்தில் சர்வதேச கருத்தரங்கு ஒன்று நடைபெற்றது. அதில் உலக சுகாதார அமைப்பின் விஞ்ஞானிகள், அட்லாண்டாவை சேர்ந்த விஞ்ஞானிகள் கலந்து கொண்டனர். கொரோனாவுக்கு புதிய மருந்து கண்டுபிடிக்கும் நிலை குறித்து விவாதிக்கப்பட்டது.

நான் செய்தியாளர்களிடம் பேட்டி அளிக்கும்போது, கொரோனா வைரசுக்கு மருந்து கண்டுபிடிக்காத நிலையில், ராஜீவ் காந்தி மருத்துவமனையில் சிகிச்சை பெற்றவர் எப்படி குணமானார்? என்று கேள்வி எழுப்பினார். கொரோனா வைரசுக்கு நேரடி மருந்து கண்டுபிடிக்கவில்லை. ஆனால் சப்போட்டிங் மருந்துகள் உள்ளன. இருமல், காய்ச்சல், மூச்சுத்திணறல் போன்றவற்றுக்கு உள்ள மருந்துகளை கூட்டு மருந்தாக அளித்து அதனை குணப்படுத்தி உள்ளோம். கூட்டு மருந்து குறித்தும் ஆய்வு மேற்கொண்டுள்ளோம். மற்ற மாநிலங்களில் நடைபெறும் ஆய்வு குறித்தும் அறிந்து வருகிறோம். கொரோனா வைரஸ் தடுப்பு மருந்து ஆய்வுகள் நடைபெற்று வருகின்றன. விரைவில் நல்ல செய்தி வரும் என்றார்