தற்போதைய செய்திகள்

கொரோனா வைரஸ் – சென்னை பத்திரிகையாளர் மன்றத்தில் விழிப்புணர்வு நிகழ்ச்சி

சென்னை

கொரோனா வைரஸ் தொடர்பாக சென்னை பத்திரிக்கையாளர் மன்றத்தில் விழிப்புணர்வு நிகழ்ச்சி நடைபெற்றது.

சென்னை பத்திரிகையாளர் மன்றம் சார்பில் பத்திரிகையாளர்களுக்காக கொரோனா நோய் தொற்று தடுப்பு விழிப்புணர்வு நிகழ்ச்சியும், நோய்த்தொற்று ஆபத்து உள்ள இடங்களில் களப்பணி ஆற்றும் செய்தியாளர்கள், ஒளிப்பத்திவாளர்கள், புகைப்பட கலைஞர்கள் மற்றும் செய்தி சேகரிக்க செல்லும் வாகன ஓட்டுநர்களுக்கு மறு பயன்பாட்டுக்கு பயன்படும் முக கவசங்கள், கிருமி நாசினி வழங்கும் நிகழ்வும் நேற்று நடைபெற்றது.

கைகைளை எப்படி முறையாக் சுத்தம் செய்யவேண்டும் என்பதை ஓமந்தூரார் அரசு மருத்துவக் கல்லூரியின் முதல்வர் டாக்டர் நாராயண பாபு தலைமையிலான மருத்துவ குழுவினர் செயல்முறை விளக்கம் அளித்தனர். கொரோனா நோய்த்தொற்று தடுப்பு விழிப்புணர்வு தகவல்களை தமிழக அரசின் முதன்மை செயலாளர் மற்றும் வருவாய் நிர்வாக ஆணையருமான டாக்டர் ஜெ.ராதாகிருஷ்ணன், சுகாதாரத்துறை செயலாளர் பீலா ராஜேஷ், பேரிடர் மேலாண்மை வாரியத்தின் இயக்குனர் ஜெகந்நாதன் மற்றும் யுனிசெப் அமைப்பின் தமிழ்நாடு மற்றும் கேரளாவிற்கான தலைமை தொடர்புகள் வல்லுநர் சுகாட்டா ராய், தோழமை அமைப்பின் இயக்குனர் தேவநேயன் ஆகியோர் பங்கேற்றனர்.

வருவாய் நிர்வாக ஆணையர் மற்றும் சுகாதாரத்துறை செயலாளர் ஆகியோர் கோரோனா நோய்த் தடுப்பு முயற்சிகளில் ஊடகத்துறையின் பங்களிப்பை பாராட்டியதுடன் தொடர்ந்து விழிப்புணர்வு செய்தியை மக்களிடம் கொண்டு போய் சேர்க்கவும் வேண்டுகோள் விடுத்தனர். யுனிசெப் அமைப்பின் தமிழ்நாடு மற்றும் கேரளாவிற்கான தலைமை தொடர்புகள் வல்லுநர் சுகாட்டா ராய், கொரோனா நோய்த்தொற்று குறித்து பல தகவல்களை விளக்கமாக தெரிவித்தார்.

மேலும் தலைமை செயலகத்தில் உள்ள செய்தியாளர் அறையில் அமைச்சர் விஜயபாஸ்கர் நேற்று மாலை ஆய்வு செய்தார். செய்தியாளர்களுக்கு பல்வேறு ஆலோசனைகளை வழங்கினார்.