தற்போதைய செய்திகள்

நியாய விலைக்கடை பணியாளர்களுக்கு ஊதிய உயர்வு வழங்க குழு அமைப்பு – சட்டப்பேரவையில் அமைச்சர் செல்லூர் கே.ராஜூ தகவல்

சென்னை

நியாயவிலை கடை ஊழியர்களுக்கு ஊதிய உயர்வு வழங்க குழு அமைக்கப்படும் என்று சட்டப்பேரவையில் அமைச்சர் செல்லூர் கே.ராஜூ தெரிவித்தார்.

சட்டப்பேரவையில் கூட்டுறவுத்துறை மானியக் கோரிக்கை மீதான விவாதத்திற்கு அமைச்சர் செல்லூர் கே.ராஜூ பதிலளித்து பேசியதாவது:-

இந்திய கூட்டுறவு வரலாற்றில். தமிழ்நாட்டில் தான், முதன் முதலில், 1904ம் ஆண்டில், அதாவது 116 ஆண்டுகளுக்கு முன்பாகவே, விவசாயிகளுக்காக, திருவள்ளூர் மாவட்டம், திரூர் என்ற கிராமத்தில், விவசாயக் கூட்டுறவுச் சங்கமும், நுகர்வோர்களுக்காக, சென்னை திருவல்லிக்கேணியில், நகரக் கூட்டுறவுச் சங்கமும், 1905-ஆம் ஆண்டில், நகர்ப்புற மக்களுக்காக, பெரிய காஞ்சிபுரத்தில், நகரக் கூட்டுறவு வங்கியும், துவங்கப்பட்டு, இன்று கூட்டுறவுத்துறையின் கீழ் மட்டும் 7,524 சங்கங்களுடன் இந்தியாவிற்கே முன்னோடி மாநிலமாக தமிழ்நாடு திகழ்கிறது

பயிர்கடன்

காடு வெளைஞ்சென்ன மச்சான்.
நமக்கு கையும் காலும்தானே மிச்சம்.

என்று கலங்கிய விவசாயிகளை எண்ணி நாளை போட போறேன் சட்டம் பொதுவில் நன்மை பயக்கும் திட்டம் என்று புரட்சித்தலைவர் ஆறுதல் கூறியதற்கு ஏற்ப வேளாண்மை, பொருளாதாரத்தை மேம்படுத்த, கூட்டுறவுச் சங்கங்கள் மூலம், வட்டியில்லாப் பயிர்க்கடன்கள், வழங்கப்பட்டு வருகிறது. 2011-12ம் ஆண்டு முதல், 7.3.2020 வரையில், மாநிலத்தில் உள்ள தொடக்க வேளாண்மைக் கூட்டுறவுக் கடன் சங்கங்கள் மூலமாக, 93 லட்சத்து, 46 ஆயிரத்து, 917 விவசாயிகளுக்கு, 50 ஆயிரத்து, 285 கோடியே, 70 இலட்ச ரூபாய் அளவிற்கு, பயிர்க்கடன் வழங்கி, சாதனை படைத்துள்ளோம்.

அம்மா வழியில் ஆட்சி நடத்தும் எடப்பாடியாரின் அரசால், கடந்த 16.02.2017 முதல் 07.03.2020 வரை 36,21,144 விவசாயிகளுக்கு ரூ. 23,562 கோடி அளவிற்கு பயிர்க்கடன் வழங்கப்பட்டுள்ளது. ஆனால், திமுக. ஆட்சியில், ரூ.9,163 கோடி மட்டுமே பயிர் கடனாக வழங்கப்பட்டது. மத்திய அரசு, 01.04.2020 முதல், பயிர்க்கடன், மற்றும் நகை அடமானத்தின் பேரிலான, பயிர்க்கடன், ஆகியவை, விவசாயக் கடன் அட்டை திட்டத்தின் கீழ் வழங்கினால் மட்டுமே, வட்டி மானியம் வழங்கப்படும், என, தெரிவித்துள்ள நிலையில் முதலமைச்சரின் ஆணைப்படி, தமிழ்நாட்டில் உள்ள, அனைத்து விவசாயிகளுக்கும், விவசாயக் கடன் அட்டைகள் மூலம், தங்குதடையின்றி பயிர்க்கடன் வழங்கப்படும் என்பதையும் இங்கே உறுதி செய்கிறேன்.

கிடங்குகள் / தானிய ஈட்டுக்கடன்

வானம் பொழியுது பூமி விளையுது தம்பி பயலே
நாம வாடி வதங்கி வளப்படுத்துறோம் வயலே
ஆனால் தானியம் எல்லாம் வலுத்தவனுடைய கையிலே

என்று ஏங்கி தவித்த சிறு குறு விவசாயிகளின் துயர் துடைக்க, அவர்கள் விளைவித்த, பொருட்களை, இருப்பு வைத்து, விலையேற்ற காலங்களில், அதிக விலைக்கு, விற்றுப் பயனடையும் வகையில், கூட்டுறவுச்சங்கங்கள் மூலம், 29.02.2020 வரை, 2 லட்சத்து, ஓராயிரத்து, 805 விவசாயிகளுக்கு, 2 ஆயிரத்து, 585 கோடியே, 45 லட்ச ரூபாய், தானிய ஈட்டுக்கடன் வழங்கப்பட்டுள்ளது. இதற்கு ஏதுவாக, கூட்டுறவுச் சங்கங்களுக்கு, ரூ.533.78 கோடி செலவில், 5 லட்சத்து, 47 ஆயிரத்து, 100 மெட்ரிக்டன் கொள்ளவு கொண்ட, 4,044 கிடங்குகள், அம்மா அவர்களின் அரசால் கட்டிக் கொடுக்கப்பட்டது.

விவசாயிகளுக்கு நிவாரணங்கள்

தமிழகத்தில் ஏற்பட்ட வறட்சி,புயல்,பெருமழை,வெள்ளம் போன்ற இயற்கை சீற்றங்களால் ஏற்படும் இடர்பாடுகளிலிருந்து விவசாயிகளுக்கு ஏற்படும் இன்னல்களைத் தவிர்க்கும் பொருட்டு, பயிர்காப்பிட்டுத் திட்டத்தின் கீழ் 29.02.2020 வரை, இந்தியாவில் எந்த மாநிலத்திலும் இல்லாத வகையில், அதிக அளவாக 36,44,000 விவசாயிகளுக்கு ரூ.7,618 கோடி பயிர் காப்பீட்டு இழப்பீடு பெற்று கொடுத்தது, உட்பட, பயிர்கடன் தள்ளுபடி, குறுவை, சம்பா சாகுபடி தொகுப்பு, என, 1 கோடியே, 58 லட்சத்து, 62 ஆயிரத்து, 332 விவசாயிகளுக்கு, ரூ.21,061.29 கோடி அளவில், பல்வேறு நிவாரணங்கள், மற்றும் சலுகைகளை, வழங்கியுள்ளோம்.

நவீனமயமாக்கல், கணினிமயம், பாதுகாப்பு வசதி

காலம்தோறும் பாடம்கூறும் மாறுதல் இங்கே தேவை என்ற புரட்சித்தலைவரின் பாடலுக்கேற்ப, தேசிய மற்றும் தனியார் வங்கிகளுக்கு இணையாக தொடக்க வகை சங்கங்கள் முதல் மாநில அளவிலான சங்கங்கள் வரை மொத்தம் 7,701 சங்கங்களில், நவீன மயம், பாதுகாப்பு வசதிகள், உட்சுற்று கண்காணிப்பு கேமராக்கள், புதிய கட்டிடங்கள் என மேம்படுத்தப்பட்ட உள்கட்டமைப்பு வசதிகளுடன் வாடிக்கையாளர்களுக்கு சிறப்பான சேவையாற்றி அபரிமிதமான வளர்ச்சி பெற்றுள்ளன.

வைப்புத்தொகை

நமது அரசின் மீதும், கூட்டுறவு அமைப்புகள் மீதும், பொதுமக்களிடம் ஏற்பட்டுள்ள அசைக்க முடியாத நம்பிக்கையால், கூட்டுறவு வங்கிகளில், 31.3.2011 அன்று, 26 ஆயிரத்து, 245 கோடியே, 17 லட்சம் ரூபாயாக இருந்த வைப்புத்தொகை தற்போது. 56 ஆயிரத்து, 85 கோடியே, 57 லட்ச ரூபாய் அளவிற்கு உயர்ந்துள்ளது. அதாவது, கடந்த தி.மு.க ஆட்சியில் இருந்ததைவிட இரண்டு மடங்கு வைப்புத் தொகை உயர்ந்துள்ளது என்பதை இங்கே பெருமையோடு தெரிவித்துக்கொள்கிறேன்.

இந்த வைப்புத் தொகையை கொண்டு விவசாயிகள் மட்டும் அல்லாமல் எல்லோரும் எல்லாமும் பெறவேண்டும் இங்கு இல்லாமை இல்லாத நிலை வேண்டும் என்ற மக்களாட்சி தத்துவத்தின்படி, அம்மா அவர்களின் அரசால் அனைத்து தரப்பினருக்கும் பல்வேறு கடன்கள் வழங்கப்பட்டு வருகின்றன. குறிப்பாக 3,54,961 நபர்களுக்கு ரூ. 2,712 கோடி, பண்ணைசாராக் கடனும், 6 கோடியே, 10 லட்சம், நபர்களுக்கு, ரூ. 2,35,221 கோடி, நகை கடனும், ஒரு லட்சத்து, 36 ஆயிரம், நபர்களுக்கு ரூ. 4,504 கோடி, வீட்டுவசதி கடனும் இதுவரை வழங்கப்பட்டுள்ளது.

மகளிர் முன்னேற்றம்-சுயஉதவிக்குழு கடன்

பட்டங்கள் ஆள்வதும் சட்டங்கள் செய்வதும் பாரினில் பெண்கள் நடத்த வந்தோம் – என்றார் பாரதியார், மங்கையராய் பிறப்பதற்கு நல்ல மாதவம் செய்திடல் வேண்டுமம்மா என்றார் கவிமணி தேசிக விநாயகம் பிள்ளை, அவ்வகையில், தந்தை பெரியார், பேரறிஞர் அண்ணா, புரட்சித்தலைவர், ஆகியோரின் கனவை நனவாக்கும் வகையில், ஆணுக்கு பெண் நிகராக வேண்டும் என்ற எண்ணத்தில், பெண்களின் நலனுக்காக, ஏராளமான நலத்திட்டங்களை தீட்டிய அம்மா அவர்கள், தமிழகத்தில் உள்ள 6.96 லட்சம் சுய உதவி குழுக்களில், கூட்டுறவுத்துறையின் மூலம் 3,77,681 சுய உதவி குழுக்களுக்கு, ரூ.6,403 கோடி, சுய உதவி குழு கடன், 1,31,101 மகளிருக்கு, ரூ.558 கோடி, மகளிர் தொழில் முனைவோர் கடன், 85,103 மகளிருக்கு, ரூ.614 கோடி பணிபுரியும் மகளிர் கடன், வழங்கப்பட்டுள்ளது.

மாற்றுத் திறனாளிகளுக்கு சிறுவணிக கடன், 

வலியோர் ஏழையை வாட்டிடும் கொடுமை இனியொரு நாளும் நடக்காது என்ற புரட்சித்தலைவர் பாடலுக்கேற்ப ஏழை எளிய சிறு வணிகர்களான டீக்கடை, பெட்டி கடை, காய்கறி விற்போர், பூ. விற்போர், நடைபாதை வியாபாரிகள் போன்றவர்களை, கந்துவட்டிகாரர்களின் கொடுமையிலிருந்து, மீட்டெடுக்கும் வகையில், 15 லட்சத்து, 63 ஆயிரத்து, 296 சாலையோர வியாபாரிகள், மற்றும் சிறு வணிகர்களுக்கு, ஆயிரத்து, 921 கோடியே, 85 லட்சம் ரூபாய் சிறு வணிகக் கடன் வழங்கப்பட்டுள்ளது.

அதேபோல, மாற்றுத் திறனாளிகளின் வாழ்க்கைத் தரம் உயர, இந்தியாவிலேயே, முதன் முதலில், 2002 ஆண்டு, மாற்றுத் திறனாளிகளுக்கு கடன் வழங்கும் திட்டத்தை அம்மா அவர்கள் தான் கொண்டு வந்தார்கள். மேலும், 2011 முதல், மாற்றுத்திறனாளிகளுக்கு வழங்கும் கடன்களுக்கு, வட்டியே வேண்டாம் எனவும், அறிவித்தார். அந்த வகையில், கடந்த 9 ஆண்டுகளில், 29.02.2020 வரை 62,047 மாற்றுத் திறனாளிகளுக்கு, ரூ.254 கோடி வட்டியில்லா கடன் வழங்கப்பட்டுள்ளது.

ரூ.100 கோடி விலை நிலை நிறுத்தம் நிதியம்

எல்லோரும் எல்லாமும் பெறவேண்டும் இங்கு இல்லாமை இல்லாத நிலை வேண்டும் என்ற பாடலுக்கு ஏற்ப மாநிலத்தில் உள்ள 34 மாவட்ட நுகர்வோர் கூட்டுறவு மொத்த விற்பனை பண்டகசாலைகள் மற்றும் 370 தொடக்க கூட்டுறவு பண்டகசாலைகள் மூலமாக, விலையேற்ற காலத்தில், விலையை கட்டுப்படுத்துவதற்காக, அம்மா அவர்கள், ரூ. 100 கோடியில் விலை நிலை நிறுத்தும் நிதியத்தை ஏற்படுத்தினார்.

இந்நிதியின் மூலம், அரிசி, துவரம் பருப்பு, புளி, மிளகாய்வற்றல், வெங்காயம், உருளைகிழங்கு போன்ற அத்தியாவசியப் பொருட்களின் விலையேற்றத்தின்போது, அவை உற்பத்தியாகும் இடங்களிலேயே கொள்முதல் செய்து, பொதுமக்களுக்கு, குறைந்த விலையில் வழங்கி, விலைவாசியை கட்டுப்படுத்துவதில், கூட்டுறவு அமைப்புகள், சிறப்பாக செயல்பட்டு வருகின்றன. சில மாதங்களுக்கு முன், ஒரு கிலோ வெங்காயம் ரூ.160 வரை உயர்ந்தபோது, நமது கூட்டுறவு நிறுவனங்களில், ஒரு கிலோ ரூ.40 முதல் ரூ.50 வரை குறைந்த விலையில், விற்பனை செய்யப்பட்டது, என்பதையும், இதனை, அனைத்து தரப்பினரும் பாராட்டினார்கள்.

மருந்தகங்கள்

நலமான மாநிலமே, வளமான மாநிலம், எனவும், ஆரோக்கியமான மக்களால்தான் நாட்டின் பொருளாதார வளர்ச்சிக்கு உண்மையாக பங்காற்ற இயலும் என்ற அம்மாவின் அமுத மொழிக்கேற்ப, பொது மக்களுக்கு 116 அம்மா மருந்தகங்கள், மற்றும் 173 கூட்டுறவு மருந்தகங்கள் வாயிலாக, 20 சதவிகிதம் வரை தள்ளுபடி விலையில், தரமான மருந்துகள், விற்பனை செய்யப்படுகின்றன. இத்திட்டத்தின் மூலம், 946 கோடியே, 80 லட்ச ரூபாய் மதிப்பிற்கு மருந்துகள் விற்பனை செய்யப்பட்டுள்ளன. குறிப்பாக, திருநெல்வேலியில் செயல்படும், அம்மா மருந்தகத்தில் மட்டும், நாள் ஒன்றுக்கு ரூ.2.5 லட்சம் வரை மருந்துகள் விற்பனையாகிறது. இதனால், தனியார் மருந்து கடைகளும் தற்போது தள்ளுபடி விலையில் மருந்துகளை விற்பனை செய்யும் நிலை ஏற்பட்டுள்ளது.

பண்ணை பசுமை நுகர்வோர் கடைகள்

வெளிச்சந்தையில், காய்கறி விலை உயர்வைக் கட்டுப்படுத்த, இதயதெய்வம் புரட்சித்தலைவி அம்மா அவர்களால், விவசாயிகளையும், நுகர்வோர்களையும் இடைத்தரகரின்றி இணைக்கக்கூடிய வகையில், உருவாக்கப்பட்ட திட்டம்தான், பண்ணைப் பசுமை நுகர்வோர் கடைகள். மாநில அளவில், மூன்று நகரும் பண்ணைப் பசுமை நுகர்வோர் கடைகள் உட்பட, 79 பண்ணைப் பசுமை நுகர்வோர் கடைகள் மூலம், தரமான காய்கறிகள், குறைந்த விலையில், விற்பனை செய்யப்படுகின்றன.

குறிப்பாக தூத்துக்குடியில் உள்ள ஒரு கடையில் மட்டும் நாளொன்றுக்கு ரூ.2.50 லட்சம் அளவிற்கு விற்பனை செய்யப்பட்டு, பெண்களிடம் பெரும் வரவேற்பை பெற்றுள்ளது. இதன் மூலம், 17.03.2020 வரை 53,370 மெட்ரிக் டன் காய்கறிகள், 157 கோடியே, 85 லட்சம் ரூபாய் மதிப்பிற்கு, விற்பனை செய்யப்பட்டுள்ளதோடு, காய்கறிகள், தங்குதடையின்றி மக்களுக்கு தொடர்ச்சியாக கிடைக்கும் வகையில், கூட்டுறவு வங்கிகளின் மூலமாக, 3 ஆயிரத்து, 565 கோடியே, 21 லட்சம் ரூபாய் அளவிற்கு வட்டியில்லா காய்கறி சாகுபடி கடன் வழங்கப்பட்டுள்ளது.

பெட்ரோல் / டீசல் வழங்கும் நிலையங்கள்

அம்மா அவர்கள் அரசால் கூட்டுறவுத்துறையின் மூலம், புதிதாக 33 பெட்ரோல் / டீசல் சில்லறை விற்பனை நிலையங்கள் திறக்கப்பட்டுள்ளன. மேலும், 9 நிலையங்களை புதிதாக துவக்கவும் நடவடிக்கை எடுக்கப்பட்டு வருகிறது.இந்நிலையங்கள், பொதுமக்களிடம் பெரும் வரவேற்பை பெற்றுள்ளதற்கு சான்றாக, கடந்த 1.04.2019 முதல் 29.02.2020 வரை ரூ.340 கோடி அளவில் விற்பனை ஆகின்றது. இதன் பலனாக, கூட்டுறவு நிறுவனங்களின் கூடுதல் நிதி ஆதாரங்கள் அதிகரித்து, லாபத்துடன் செயல்பட வழிவகை செய்யப்பட்டுள்ளது.

பொதுவினியோகத்திட்டம்

தனி ஒருவனுக்கு உணவில்லையேல் இந்த ஜகத்தினை அழித்திடுவோம் என்றார் – பாரதியார். ஏழையின் சிரிப்பில் இறைவனை காண்போம் என்றார் – பேரறிஞர் அண்ணா. சத்தான சத்துணவு தந்தார் சரித்திர நாயகன் – புரட்சித்தலைவர்.
விலையில்லா அரிசி தந்து பசியில்லா மாநிலமாக தமிழகத்தை மாற்றினார் – இதயதெய்வம் அம்மா.
அவ்வகையில், இந்திய வரலாற்றில், எந்த மாநிலத்திலும் செயல்படுத்திடாத, விலையில்லா அரிசி வழங்கும் திட்டத்தினை, கூட்டுறவுத்துறையின் கீழ் செயல்படும், 32,965 நியாயவிலைக்கடைகள் மூலம், மாதந்தோறும் அதிகபட்சமாக ஒரு குடும்பத்திற்கு, விலையில்லாமல் 45 கிலோ வரை அரிசி வழங்கப்படுகிறது.

தேசிய உணவுப் பாதுகாப்புச் சட்டப்படி, முன்னுரிமை குடும்பங்களுக்கு மட்டுமே, அரிசி வழங்க வேண்டும் என, வலியுறுத்தியபோதும், அம்மா அவர்களின் அரசு தகுதியுள்ள அனைத்துத் தரப்பினருக்கும் விலையில்லா அரிசி வழங்கி வருகிறது. பொதுமக்களின் நலனைக் கருத்தில் கொண்டு, 2011 முதல் நாளது தேதிவரை 2,428 நியாயவிலைக் கடைகள் புதிதாகத் திறக்கப்பட்டுள்ளன. .1,963 நியாயவிலைக் கடைகளுக்குப் புதிதாகக் கட்டிடங்கள் கட்டிக் கொடுக்கப்பட்டுள்ளன.

உலகம் சமநிலை பெறவேண்டும், இங்கு, உயர்வு தாழ்விலா நிலை வேண்டும் என்ற நிலையை உருவாக்க, மலைப்பகுதிகள் மற்றும் எளிதில் அணுக இயலாத ஊரகப் பகுதிகளில் வசிக்கும், மக்களுக்கு, அத்தியாவசியப் பொருட்களை, அவர்கள் வசிக்கும் பகுதிகளுக்கே கொண்டு சென்று வழங்க, 46 நகரும் நியாயவிலைக் கடைகள் செயல்படுகின்றன. இதனால், 351 குக்கிராமங்களில் உள்ள, 28,674 குடும்பங்கள் பயனடைகின்றன.

இதில், திருச்சிராப்பள்ளி மாவட்டத்தில், 19 குடும்பங்களே உள்ள, பெரியபழமலை, திருப்பூர் மாவட்டம் உடுமலைப் பேட்டையிலிருந்து, 85 கி.மீ. தொலைவில் உள்ள, மாவடைப்பு மற்றும் குழிப்பட்டி ஆகிய கிராமங்களில் உள்ள மலைவாழ் மக்கள் வசிக்கும் பகுதிகளுக்கே சென்று அத்தியாவசியப் பொருட்கள் வழங்கப்பட்டு வருகிறது என்பது குறிப்பிடத்தக்கதாகும்.

முதலமைச்சர் ஆணைப்படி, தமிழ்நாடு முழுவதும், இடவசதியுள்ள நியாயவிலைக் கடைகளின் ஒரு பகுதியில், 703 அம்மா சிறு கூட்டுறவுச் சிறப்பங்காடிகள் திறக்க, நடவடிக்கை எடுக்கப்பட்டு, இதுவரை 653 அம்மா சிறு கூட்டுறவுச் சிறப்பங்காடிகள் திறக்கப்பட்டு 5 சதவிகித தள்ளுபடி விலையில்,300 வகையான பொருட்கள் விற்பனை செய்யப்படுகிறது. இதனால், ஏழை, எளிய, நடுத்தர மக்கள், தரமான பொருட்களை, குறைவான விலையில் அந்தந்தப் பகுதிகளிலேயே பெற்றுப் பயனடைந்து வருகிறார்கள்.

பொங்கல் பரிசு தொகுப்பு 

கர்ணனை போல கொடை உள்ளம் கொண்ட முதலமைச்சர் எடப்பாடியார், மாநிலத்தில், தகுதியுள்ள 2 கோடியே 30 ஆயிரத்து 431 குடும்ப அட்டைகளில், 1 கோடியே 98 லட்சத்து, 20 ஆயிரத்து 999 குடும்ப அட்டைதாரர்களுக்கு, பொங்கல் தொகுப்புடன், ரூ.1,000 (இரண்டு 500 ரூபாய் நோட்டுகள்) வழங்கினார்கள் என்பதை மகிழ்ச்சியோடும், பெருமிதத்துடனும் இம்மாமன்றத்திற்குத் தெரிவித்துக் கொள்கிறேன்.

சம்பள உயர்வு

தொடக்க சங்கங்கள் முதல் தலைமை சங்கங்கள் வரை உள்ள அனைத்து கூட்டுறவு நிறுவனங்களிலும் பணிபுரியும் 22,048 பணியாளர்களுக்கு கூட்டுறவு, வரலாறு காணாத அளவிற்கு, 21 சதவிகிதம் வரை சம்பள உயர்வு, 2 முறை அளித்தது அம்மா அவர்களின் அரசு மட்டுமே. அதுமட்டுமின்றி, அரசு ஊழியர்களுக்கு இணையாக, கூட்டுறவுச் சங்கங்களின் பணிபுரியும் 41,061 பணியாளர்கள் மற்றும் அவர்களின் 1,14,986 குடும்ப உறுப்பினர்கள் என மொத்தம் 1,56,047 நபர்களுக்கு அம்மா அவர்களின் அரசு மருத்துவ காப்பீட்டு திட்டத்தை செயல்படுத்தி வருகிறது.

நியாயவிலைக் கடை பணியாளர்களுக்கு வழங்கப்பட்ட சலுகைகள்

நியாயவிலைக் கடை பணியாளர்களுக்கு ஏற்கனவே வழங்கப்பட்டு வந்த குடும்ப நல நிதியை ரூ.2 லட்சத்திலிருந்து ரூ.3 லட்சமாக உயர்த்தியும், ஈமச்சடங்கு நிதி ரூ. 5000 லிருந்து ரூ.25,000 ஆக உயர்த்தியும், அரசு ஊழியர்களுக்கு இணையாக மாற்றுத்திறனாளி படி வழங்கியும், சிறப்பு திட்டங்களை நிறைவேற்றும்போது குடும்ப அட்டைக்கு 50 காசு, மற்றும் 2 சீருடைகள் வழங்கவும் ஆணையிடப்பட்டுள்ளது. மேலும், நியாயவிலைக் கடை பணியாளர்களுக்கு உரிய காலத்தில் ஊதிய உயர்வு வழங்க குழு அமைக்கப்படும்.

சமூக நலனில் கூட்டுறவுத்துறையின் பங்கு

கூட்டுறவு வங்கிகள் சிறப்பான வளர்ச்சி பெற்றுள்ள நிலையில் அம்மா அவர்கள் ஆட்சியில் தமிழ்நாடு மாநிலத் தலைமைக் கூட்டுறவு வங்கியின் பொதுநல நிதியிலிருந்து பாதுகாப்பு நடவடிக்கைக்காகக் காவல்துறையின் மூலம் சென்னை மாநகரில் சி.சி.டி.வி அமைக்க, ரூ.75 லட்சமும், இதய தெய்வம் புரட்சித்தலைவி அம்மா அவர்கள் நினைவிடத்தில், ரூ.25 லட்சம் மதிப்பில் சுத்திகரிக்கப்பட்ட குடிநீர் வழங்கும் நிலையமும் அமைக்கப்பட்டுள்ளது என்பதை மனநிறைவோடு தெரிவித்துக் கொள்கிறேன்.

விருதுகள்

தமிழ்நாட்டில் கூட்டுறவு இயக்கம் ஆற்றி வரும் அளப்பரிய சாதனைகளால், இந்தியாவில் உள்ள, அனைத்து மாநிலங்களுக்கும், தமிழ்நாடுதான், முன்னோடி மாநிலமாகத் திகழ்கிறது என்பதற்குச் சான்றாக, தமிழ்நாட்டின் கூட்டுறவு அமைப்புகள், கடந்த, 9 ஆண்டுகாலத்தில் தேசிய அளவில் 28 விருதுகளைப் பெற்று, சாதனை படைத்துள்ளன. குறிப்பாக மாற்றுத்திறனாளிகளுக்கு அதிக அளவில் கடன் வழங்கியதற்காக 2 முறை மேதகு குடியரசுத் தலைவரிடம் தேசிய அளவிலான விருதுகள் பெறப்பட்டுள்ளன என்பதையும் இங்கே பெருமையோடு தெரிவிக்க கடமைப்பட்டுள்ளேன்.

இவ்வாறு அமைச்சர் செல்லூர் கே.ராஜூ பேசினார்.