சிறப்பு செய்திகள்

மாநகராட்சி-நகராட்சி-பேரூராட்சிகளில் ரூ.1000 கோடி மதிப்பில் சாலைகள் சீரமைப்பு – சட்டப்பேரவையில் முதலமைச்சர் அறிவிப்பு

சென்னை

அனைத்து மாநகராட்சி, நகராட்சி, பேரூராட்சிகளில் ரூ.1000 கோடி மதிப்பீட்டில் சாலைகள் சீரமைக்கப்படும் என்று சட்டப்பேரவையில் முதலமைச்சர் எடப்பாடி கே.பழனிசாமி அறிவித்தார்.

சட்டப்பேரவையில் முதலமைச்சர் எடப்பாடி கே.பழனிசாமி 110 விதியின் கீழ் வெளியிட்ட அறிவிப்புகள் வருமாறு-

நகராட்சி நிர்வாகம் மற்றும் குடிநீர் வழங்கல் துறை சார்பில் கீழ்கண்ட அறிவிப்புகளை வெளியிட விரும்புகிறேன்:-

பெருநகர சென்னை மாநகராட்சி உள்ளிட்ட அனைத்து மாநகராட்சிகள், நகராட்சிகள் மற்றும் பேரூராட்சிகளில் பாதாள சாக்கடைத் திட்டம், குடிநீர் மேம்பாட்டு திட்டப் பணிகள் மற்றும் இயற்கை சீற்றங்களால் பழுதடைந்துள்ள சாலைகள், நகர்ப்புற சாலை உட்கட்டமைப்புத் திட்டத்தின் கீழ் 1,000 கோடி ரூபாய் மதிப்பீட்டில் சீரமைக்கப்படும்.

கோயம்புத்தூர் மாநகராட்சியுடன் புதியதாக இணைக்கப்பட்ட பகுதிகளான துடியலூர், வடவள்ளி, கவுண்டம்பாளையம் மற்றும் வீரகேரளம் பகுதிகளை உள்ளடக்கிய 14 வார்டுகளில், 610 கோடி ரூபாய் மதிப்பீட்டில் பாதாள சாக்கடைத் திட்டப் பணிகள் மேற்கொள்ளப்படும்.

மதுரை மாநகராட்சியின் அனைத்துப் பகுதிகளில் உள்ள வீடுகளுக்கும், குடிநீர் இணைப்பு ஏற்படுத்திக் கொடுப்பதற்காக ஏற்கனவே இரண்டு கட்டங்களாக பணிகள் நடைபெற்று வருகின்றன. மூன்றாம் கட்டமாக, எஞ்சியுள்ள 57 வார்டுகளிலும், குடிநீர் விநியோகக் குழாய் பதித்து, வீட்டு இணைப்புகள் வழங்க, 310 கோடி ரூபாய் மதிப்பீட்டில் பணிகள் மேற்கொள்ளப்படும்.

கோயம்புத்தூர் மற்றும் மதுரை மாநகரத்தில் போக்குவரத்து மேலாண்மை, போக்குவரத்து தகவல் மைய திட்டம் போன்றவைகளை கட்டளை மற்றும் கட்டுப்பாட்டு மையங்களுடன் ஒருங்கிணைத்து, போக்குவரத்து நெரிசல் குறைய வழிவகை செய்யும் வகையில், திறன்மிகு போக்குவரத்து முறையை செயல்படுத்திட ஆய்வுகள் மேற்கொள்ளப்பட்டு விரிவான திட்ட அறிக்கைகள் தயாரிக்கப்படும்.

சென்னையில் சிறுதொழில் முனைவோர் மற்றும் மாணவர்களின் கண்டுபிடிப்புகளை சமூகத்திற்கு அறிமுகப்படுத்தி விளக்கும் பாலமாக “புதுமுறைக் காணல் மையம்” ஏற்படுத்தப்படும். இம்மையம், சீர்மிகு நகர நிறுவனத்தின் கீழ் செயல்படும்.

மாநிலத்தில் பசுமைச் சூழலை அதிகரிக்கும் வகையில், மாநகராட்சி மற்றும் நகராட்சி பகுதிகளில் பயன்பாடின்றி உள்ள திறந்தவெளி நிலங்களில், “மியாவாக்கி” முறையில் குறைந்த இடத்தில் அதிக எண்ணிக்கையிலான மரங்கள் நடப்படும்.
மாநராட்சி மற்றும் நகராட்சி பகுதிகளில் போதிய இடவசதி உள்ள பூங்காக்களில் திறந்தவெளி உடற்பயிற்சிக் கூடம் மற்றும் யோகா மையம் அமைக்கப்படும்.

தேனி மாவட்டத்திலுள்ள போடிநாயக்கனூர் நகராட்சி 1916 ஆம் ஆண்டு உருவாக்கப்பட்டு, 100 ஆண்டுகள் கடந்த ஒரு சிறப்பு மிக்க நகராட்சி ஆகும். மேற்கு தொடர்ச்சி மலை அடிவாரத்தில் அமைந்துள்ள இந்நகராட்சி, 7.23 சதுர கிலோ மீட்டர் பரப்பளவும், 75 ஆயிரத்து 665 மக்கள் தொகையையும் கொண்டு, ஏலக்காய் வணிகத்திற்கு பெயர் பெற்றது.

இந்த நகராட்சியின் பாரம்பரியத்தை கருத்தில் கொண்டு, இங்கே வாழ்கின்ற மக்களின் நீண்ட நாள் கோரிக்கையை நிறைவேற்றும் வகையில், இந்நகராட்சியிலுள்ள பேருந்து நிலையத்திற்கு ஒரு புதிய ஓடுதளமும், வாரச்சந்தை உள்பட பல உட்கட்டமைப்புகளும் அமைக்கப்படும். இது தவிர, இந்நகரிலுள்ள பூங்காக்கள் மேம்படுத்தப்படும். இத்திட்டத்தை செயல்படுத்த அம்மாவின் அரசு சிறப்பு நிதியாக 50 கோடி ரூபாய் வழங்கும்.

15 மாநகராட்சிகள், 121 நகராட்சிகள், 528 பேரூராட்சிகள் மற்றும் 12,525 கிராம ஊராட்சிகளில் மொத்தம் 64 ஆயிரத்து 583 துப்புரவுப் பணியாளர்கள் பணிபுரிந்து வருகிறார்கள். இது தவிர, பல்வேறு துறைகளிலும் துப்புரவு பணியாளர்கள் தூய்மைப் பணியை செய்து வருகிறார்கள். பொது இடங்களில் தூய்மையை பேணிக்காப்பது, புயல், மழை போன்ற இயற்கைச் சீற்றங்களின்போது தூய்மைப் பணிகளை மேற்கொள்வது, தெருக்களில் சேரும் குப்பைகளை அகற்றி சுற்றுசூழல் மற்றும் சுகாதாரம் பேணுவது மற்றும் பேருந்து நிலையம், சந்தைகள், ஆலயங்கள் மற்றும் வணிக வளாகப் பகுதிகளில் உள்ள குப்பைகள் மற்றும் கழிவுகளை அகற்றி இவர்கள் மேற்கொண்டு வரும் துப்புரவுப் பணி, மக்களின் நலனையும், பொது சுகாதாரத்தையும் பேணுவதில் முக்கியப் பங்கு வகிக்கிறது.

இவர்களது நலனைப் பேணுவதில் அக்கறை கொண்டு, இப்பணியாளர்களுக்கு குடியிருப்பு கட்டுதல், அவர்தம் குடும்பத்தினருக்கென குறிப்பிட்ட கால இடைவெளியில் மருத்துவப் பரிசோதனை முகாம்கள் நடத்துதல், அவர்களது குழந்தைகளின் எதிர்கால நன்மையைக் கருதி சிறப்பு வேலைவாய்ப்பு முகாம்கள் நடத்துதல் மற்றும் திறன் பயிற்சி அளித்தல் போன்ற நடவடிக்கைகளை அம்மாவின் அரசு மேற்கொண்டு வருகிறது.

அதனைத் தொடர்ந்து, இப்பணியாளர்களின் செயல்பாடுகளை கௌரவிக்கும் வகையிலும், அவர்களின் நீண்ட நாள் கோரிக்கையினை நிறைவேற்றிடவும், அனைத்துத் துப்புரவுப் பணியாளர்களும், இனி “தூய்மைப் பணியாளர்கள்” என்று அழைக்கப்படுவார்கள் என்பதை மிக்க மகிழ்ச்சியுடன் தெரிவித்துக் கொண்டு அமைகிறேன்.

இவ்வாறு முதலமைச்சர் எடப்பாடி கே.பழனிசாமி அறிவித்துள்ளார்.