சிறப்பு செய்திகள்

எத்தனை தடை வந்தாலும் அவற்றை தகர்த்தெறிந்து மக்கள் நலத்திட்டங்களை நிறைவேற்றியே தீருவோம் – முதலமைச்சர் சூளுரை

திருநெல்வேலி

எத்தனை தடைகள் வந்தாலும் அவற்றை தகர்த்தெறிந்து மக்கள் நலத்திட்டங்களை நிறைவேற்றியே தீருவோம் என்று முதலமைச்சர் எடப்பாடி கே.பழனிசாமி சூளுரைத்தார்.

நாங்குநேரி சட்டமன்ற தொகுதி இடைத்தேர்தலில் போட்டியிடும் கழக வேட்பாளர் ரெட்டியார்பட்டி வெ.நாராயணனை ஆதரித்து களக்காடு டவுன், சிங்கிகுளம் ஆகிய இடங்களில் கழக இணை ஒருங்கிணைப்பாளரும், முதலமைச்சருமான எடப்பாடி கே.பழனிசாமி 14.10.2019 அன்று பொதுமக்களிடம் வாக்கு சேகரித்து பேசியதாவது:-

புரட்சித்தலைவர் எம்.ஜி.ஆர்., புரட்சித்தலைவி அம்மா ஆகிய இருபெரும் தலைவர்களால் கட்டி காக்கப்பட்ட மாபெரும் இயக்கம் அனைத்திந்திய அண்ணா திராவிட முன்னேற்றக் கழகம். அம்மாவின் வழியில் இந்த அரசு மக்களுக்காக எண்ணற்ற நலத்திட்டங்களை அறிவித்து செயல்படுத்தி வருகிறது. மக்களுக்காக அறிவிக்கின்ற எந்த திட்டமாக இருந்தாலும், அதை தடுக்கும் வகையில் தி.மு.க. ஈடுபட்டு வருகிறது. எத்தனை தடைகள் வந்தாலும், மக்களுக்காக அறிவித்த அனைத்து திட்டங்களையும் அம்மாவின் அரசு நிறைவேற்றியே தீரும் என்பதை இந்த நேரத்தில் தெரிவித்துக் கொள்கிறேன். சாதி, மத, கட்சி பாகுபாடு இன்றி அறிவித்த அனைத்து மக்கள் நல திட்டங்களையும் வழங்கி வரும் அரசு அம்மாவின் அரசு.

நீர் மேலாண்மை திட்டத்தை இந்த அரசு சிறப்பாக செயல்படுத்தி வருகிறது. மழை காலங்களில் பெய்கின்ற மழை நீர் வீணாகாமல் தடுத்திடும் வகையில் சட்டமன்ற உறுப்பினர்கள் ஓடைகள் மற்றும் நதியின் குறுக்கே எங்கெங்கு தடுப்பணைகள் வேண்டும் என கோரிக்கை வைக்கிறார்களோ அந்தப் பகுதிகளில் தடுப்பணைகள் கட்டப்படும். அதற்காக ரூ.1000 கோடி நிதி ஒதுக்கீடு செய்யப்பட்டு தற்போது ரூ.600 கோடி மதிப்பில் பணிகள் நடைபெற்று வருகிறது.

2019-ம் ஆண்டு நடைபெற்ற உலக முதலீட்டாளர்கள் மாநாட்டில் 304 புரிந்துணர்வு ஒப்பந்தங்கள் மூலம் ரூ.3 லட்சத்து 431 கோடிக்கு முதலீடுகள் ஈர்க்கப்பட்டு 10.50 லட்சம் படித்த இளைஞர்களுக்கு வேலை வாய்ப்பு உருவாக்க வழிவகை செய்யப்பட்டுள்ளது. தமிழகத்தில் தொழில் தொடங்க தேவையான அனைத்து உட்கட்டமைப்பு வசதிகளும் செய்து தரப்படும். குறிப்பாக தடையில்லா மின்சாரம், சாலை வசதிகள், தொழில் தொடங்குவதற்கு விண்ணப்பித்தவுடன் அதற்கான அனுமதி உடனுக்குடன் வழங்கப்படும். இதனால் தமிழகத்தில் அதிக அளவில் தொழில் தொடங்குவதற்கான சூழ்நிலை ஏற்பட்டுள்ளது.

தி.மு.க. தலைவர் ஸ்டாலின் தேர்தல் கூட்டங்களில் பேசும் போது, புரட்சித்தலைவர் எம்.ஜி.ஆரும், புரட்சித்தலைவி அம்மா அவர்களும் நாட்டு மக்களுக்காக நலத்திட்டங்களை அறிவித்து செயல்படுத்தவில்லை என பச்சை பொய் பேசுகிறார். ஏழை, எளிய மக்களின் வாழ்க்கை முன்னேற்றத்திற்காகவே உருவான இயக்கம் அண்ணா தி.மு.க என்பதால் பல்வேறு மக்கள் நலத்திட்ட உதவிகளை வாரி, வாரி வழங்கியவர்கள் புரட்சித்தலைவர் எம்.ஜி.ஆரும், அம்மா அவர்களும் ஆவார்கள்.

ஏழை எளிய மக்களின் குழந்தைகளும் விஞ்ஞானப்பூர்வமான கல்வியைப் பெற வேண்டும் என்பதற்காக 48 லட்சம் மடிகணினிகள் வழங்கப்பட்டுள்ளது. இதற்காக ரூ.6,800 கோடி செலவு செய்யப்பட்டுள்ளது. இதெல்லாம் ஸ்டாலின் கண்ணுக்கு தெரியவில்லை. வியர்வையை சிந்தி உழைக்கும் விவசாயிகளுக்கு பல்வேறு நலத்திட்ட உதவிகளையும் அம்மாவின் அரசு செயல்படுத்தி இருக்கிறது. வறட்சி காலங்களில் பாதிக்கப்பட்ட விவசாயிகளுக்கு வறட்சி நிவாரணம் வழங்கிய அரசு அம்மாவின் அரசு. அதேபோன்று பயிர் காப்பீட்டுத்திட்டத்தின் மூலம் அதிக அளவு இழப்பீட்டுத்தொகையை பெற்றுத்தந்த அரசு அம்மாவின் அரசு.

தி.மு.கவினர் அராஜகத்தில் ஈடுபடுகிறார்கள் அவர்கள் மீது நடவடிக்கை எடுக்காமல் ஸ்டாலின் கட்டப்பஞ்சாயத்து செய்கிறார். இவர் கட்சிக்குத்தலைவரா? அல்லது கட்டப்பஞ்சாயத்து தலைவரா? என்பதை நாட்டு மக்கள் தெரிந்து கொள்ள வேண்டும். பெண்களின் பாதுகாப்பு பற்றி ஸ்டாலின் பேசுகிறார். அதை பற்றி பேசுவதற்கு அவருக்கு என்ன தகுதி இருக்கிறது. பெண்கள் பாதுகாப்புடன் வாழ்வதற்கு உகந்த மாநிலமாக தமிழ்நாடு இன்றும் திகழ்ந்து வருகிறது. அனைத்திந்திய அண்ணா திராவிட முன்னேற்ற கழகத்தையும், அம்மாவின் அரசையும் குறை கூறுவதற்கு ஸ்டாலினுக்கு எந்த தகுதியும் இல்லை.

தமிழகத்தில் சட்டம் ஒழுங்கு முறையாக பராமரிக்கப்பட்டு தமிழகம் அமைதிப்பூங்காவாக திகழ்கிறது. அப்படி இருந்ததன் காரணமாகத்தான் பாரதப் பிரதமரும், சீன அதிபரும் தமிழ்நாட்டை தேர்வு செய்து மகாபலிபுரத்தில் சந்தித்துப் பேசினார்கள் என்றால் இதைவிட தமிழ்நாட்டிற்கு வேறு என்ன பெருமை இருக்க முடியும். மேலும், தமிழகம் வந்த இரு பெரும் தலைவர்களுக்கு நல்ல உபசரிப்பு, நல்ல வரவேற்பு, அருமையான ஏற்பாடு செய்ததை அறிந்து பாரத பிரதமரும், சீன அதிபரும் தமிழக அரசை பாராட்டி இருக்கிறார்கள்.

திருநெல்வேலி மாவட்டம் எலுமிச்சை ஆற்றில் நீர்த்தேக்கம் அமைக்க அறிவிக்கப்பட்ட திட்ட பணி விரைவில் துவங்கப்படும். இதன் மூலம் மணிமுத்தாறு பிரதான கால்வாய் மூலம் நீர் கூடுதலாக வழங்கப்படும். கிள்ளிகுளம் கிராமத்தில் பச்சையாற்றில் உள்ள சுப்பாகுட்டி அணைக்கட்டு, பொன்னாகுடி அணைக்கட்டு புனரமைக்கும் பணி ரூ.5 கோடி செலவில் மேற்கொள்ளப்படும். இதன் மூலம் அதனை சுற்றியுள்ள 45 குளங்கள் பயன்பெறும். மேலும், பல்வேறு கோரிக்கைகளை நீங்கள் தெரிவித்துள்ளீர்கள்.

உங்களது கோரிக்கைகள் நிறைவேற்றித்தரப்படும் என தெரிவித்துக் கொள்கிறேன். அனைத்திந்திய அண்ணா திராவிட முன்னேற்றக் கழகம் சார்பில் நாங்குநேரி சட்டமன்றத் தொகுதியில் போட்டியிடும் கழக வேட்பாளர் ரெட்டியார்பட்டி வெ.நாராயணனுக்கு புரட்சித்தலைவர் எம்.ஜி.ஆர். அவர்கள் உருவாக்கிய, புரட்சித்தலைவி அம்மா அவர்களால் கட்டிக் காக்கப்பட்ட வெற்றிச் சின்னமான இரட்டை இலை சின்னத்தில் வாக்களித்து பெருவாரியான வாக்குகள் வித்தியாசத்தில் வெற்றி பெறச் செய்யுமாறு அன்போடு கேட்டுக் கொள்கிறேன்.

இவ்வாறு முதலமைச்சர் எடப்பாடி கே.பழனிசாமி பேசினார்.