சிறப்பு செய்திகள்

நாங்குநேரி- விக்கிரவாண்டி தொகுதிகளில் கழகத்திற்கு பிரகாசமான வெற்றி வாய்ப்பு – துணை முதலமைச்சர் பேட்டி

சென்னை

நாங்குநேரி, விக்கிரவாண்டி தொகுதிகளில் கழகத்திற்கு பிரகாசமான வெற்றி வாய்ப்பு உள்ளது என்று துணை முதலமைச்சர் ஓ.பன்னீர்செல்வம் கூறினார்.

சென்னை விமான நிலையத்தில் துணை முதலமைச்சர் ஓ.பன்னீர்செல்வம்  செய்தியாளர்களுக்கு பேட்டி அளித்தார். அப்போது அவர் கூறியதாவது:-

நாங்குநேரி, விக்கிரவாண்டி தொகுதி இடைத்தேர்தலில் கழகத்தின் வெற்றி வாய்ப்பு பிரகாசமாக உள்ளது. அதிகமான வாக்கு வித்தியாசத்தில் இரண்டு தொகுதிகளிலும் கழகம் மகத்தான வெற்றி பெறும்.

இவ்வாறு அவர் கூறினார்.

தொடர்ந்து செய்தியாளர்கள் கேட்ட கேள்விகளும், அதற்கு துணை முதல்வர் அளித்த பதில்களும் வருமாறு:-

கேள்வி:- ராஜீவ்காந்தி மரணம் பற்றி சீமான் தெரிவித்த கருத்து பற்றி நீங்கள் என்ன கருதுகிறீர்கள்?

பதில்:- அந்த பிரச்சினை குறித்து இப்போது சீமான் கருத்து தெரிவித்திருப்பதை தவிர்த்து இருக்கலாம் என்பதே எங்களுடைய கருத்தாகும்.

கேள்வி:- எந்த தேர்தலாக இருந்தாலும் தொடர்ச்சியாக நாங்கள் தான் ஜெயித்து வருகிறோம் என்று ஸ்டாலின் கூறி வருகிறாரே?

பதில்:- அவர் நாடாளுமன்ற தேர்தலை மனதில் வைத்து சொல்கிறார். அதற்கு பிறகு நடைபெற்ற வேலூர் நாடாளுமன்ற தேர்தலில் கழகம் 3 சட்டமன்ற தொகுதிகளிலும், 3 சட்டமன்ற தொகுதிகளில் தி.மு.க.வும் வெற்றி பெற்றுள்ளது. இப்போது நாங்குநேரி, விக்கிரவாண்டி சட்டமன்ற தொகுதி இடைத்தேர்தல் உள்பட எந்த தேர்தல் வந்தாலும் கழகம் வெற்றி பெறும் சூழ்நிலை உருவாகி இருக்கிறது.

நாடாளுமன்ற தேர்தல் நடைபெற்றபோது இருந்த நிலைமை வேறு. இ்ப்போது நிலைமை வேறு. இப்போது நிலைமை முற்றிலும் மாறி இருக்கிறது. தி.மு.க.வின் பொய் பிரச்சாரத்தையும், பொய்யான வாக்குறுதிகளையும் மக்கள் முழுமையாக புரிந்து கொண்டு எங்கள் பக்கம் கவனத்தை திருப்பி இருக்கிறார்கள்.

கேள்வி:- உள்ளாட்சி தேர்தலுக்கு அ.இ.அ.தி.மு.க. தயாராகி விட்டதா?

பதில்:- நாங்கள் எப்போதும் தயாராகத் தான் இருக்கிறோம். எப்போது தேர்தல் வந்தாலும் சந்தித்து வெற்றி பெறுவதற்கான வாய்ப்பை பெறுவோம். அதில் எந்த சந்தேகமும் வேண்டாம்.

கேள்வி:- அ.இ.அ.தி.மு.க. பொதுக்குழு எப்போது கூடும்?

பதில்:- அ.இ.அ.தி.மு.க. பொதுக்குழு நடக்க வேண்டிய நேரத்தில் நடக்கும்.

இவ்வாறு துணை முதலமைச்சர் ஓ.பன்னீர்செல்வம் கூறினார்.