விழுப்புரம்

வன்னியர்கள் மீது ஸ்டாலினுக்கு திடீர் பாசம் ஏன்? அன்புமணி ராமதாஸ் கேள்வி

விழுப்புரம்

வன்னியர்கள் மீது ஸ்டாலினுக்கு திடீர் பாசம் ஏன்? என்று அன்புமணி ராமதாஸ் கேள்வி எழுப்பி உள்ளார். விக்கிரவாண்டி சட்டமன்ற தொகுதி கழக வேட்பாளர் எம்.ஆர்.முத்தமிழ்செல்வனை ஆதரித்து வாக்கூர் மேல்காரணையில் பா.ம.க. சார்பில் தேர்தல் பிரச்சார பொதுக்கூட்டம் பா.மக. மாநில தலைவர் ஜி.கே.மணி தலைமையில் நடைபெற்றது.

இக்கூட்டத்தில் பா.ம.க. இளைஞரணி தலைவர் டாக்டர் அன்புமணி ராமதாஸ் எம்.பி. பேசியதாவது:-

இந்த தேர்தலை மு.க.ஸ்டாலினுக்கும், நடக்கும் இடையே நமக்கும் போட்டியாக கருதுகிறேன். டாக்டர் ராமதாஸ் சொல்லும் வேட்பாளர் வெற்றி பெற வேண்டும். இது அவரது கட்டளையாகவும், எனது வேண்டுகோளாகவும் உங்களிடம் வைக்கிறேன்.

இந்த தேர்தலில் அ.இ.அ.தி.மு.க. வேட்பாளரை மிகப்பெரிய வெற்றிபெற செய்து மு.க.ஸ்டாலின் முகத்தில் கரியை பூச வேண்டும். அவர் வாயை திறந்தாலே பொய் தான். கடந்த நாடாளுமன்ற தேர்தலில் ஏராளமான பொய்யை சொல்லி மக்களை ஏமாற்றினார். ஆனால் இப்போது வன்னியர்கள் மீது திடீர் பாசம் காட்டுவது ஏன்?

தேர்தல் வந்தால் தான் ஸ்டாலினுக்கு வன்னியர்கள் மீது பாசம் வரும். மு.க.ஸ்டாலினுக்கும், வன்னியர்களுக்கும் என்ன சம்பந்தம் உள்ளது. தி.மு.க. வெற்றி பெற்று ஆட்சிக்கு வந்தால் வன்னியர்களுக்கு உள் இடஒதுக்கீடு பெற்று தருவோம் என்று ஸ்டாலின் சொல்கிறார். 5 முறை கருணாநிதி முதலமைச்சராகவும், ஒரு முறை ஸ்டாலின் துணை முதலமைச்சராகவும் இருந்தார்கள். அப்போது என்ன செய்தார்கள்? கருணாநிதி முதலமைச்சராக இருந்த போது உள் இடஒதுக்கீடு கொடுங்கள் என்று டாக்டர் ராமதாஸ் கேட்டார். அப்போது அவர்களுக்கு கேட்கவில்லையா? தற்போது இடைத்தேர்தல் வந்ததும் ஸ்டாலினுக்கு வன்னியர் மீது பாசம் வருகிறது.

இந்த தொகுதியில் முதல் முறையாக போட்டியிட்ட ஏ.கோவிந்தசாமி தான் தி.மு.க.வுக்கு உதயசூரியன் சின்னத்தை கொடுத்தார். 1967-ல் தி.மு.க. ஆட்சி அமைந்த போது அவருக்கு அமைச்சர் பதவி தர முடியாது என்றார்கள். பின்னர் பல்வேறு போராட்டத்திற்கு பிறகு அமைச்சர் பதவி வழங்கப்பட்டது.

ஆனால் இப்போது ஏ.கோவிந்தசாமி மீது மு.க.ஸ்டாலினுக்கு பாசம் வந்துள்ளது. அவருக்கு மணிமண்டபம் கட்டுவோம் என்கிறார். அது நடக்கப் போவதில்லை. ஏனென்றால் அவர்கள் ஆட்சிக்கு வரப்போவது இல்லை. ஆட்சியில் இருந்தால் தான் மணிமண்டபம் கட்ட முடியும். நாங்கள் ஆட்சியில் இல்லாமலேயே குருவுக்கு மணிமண்டபம் கட்டி இருக்கிறோம். கலைஞருக்கு இப்போது நினைவு மண்டபம் கட்டுவார்களாம், ஆனால் ஏ.கோவிந்தசாமிக்கு ஆட்சிக்கு வந்த பின்னர் தான் மண்டபம் கட்டுவார்களாம்.

கடந்த நாடாளுமன்ற தேர்தலின் போது தி.மு.க. கூட்டணி கட்சிகளான கம்யூனிஸ்டு கட்சிகள் மற்றும் கொங்கு நாடு பேரவைக்கு கோடிக்கணக்கில் பணம் கொடுத்துள்ளனர். ஆனால் எங்களை பார்த்து பெட்டி வாங்கினோம் என்று சொல்கிறார்கள். 30 ஆண்டுகளாக நாங்கள் நேர்மையாக கட்சி நடத்தி வருகிறோம். மக்கள் பிரச்சினைக்காக போராடி வருகிறோம். இனியும் நேர்மையாக தான் கட்சி நடத்துவோம். டாக்டர் ராமதாஸ் பற்றியும், என்னை பற்றியும் பேச மு.க.ஸ்டாலினுக்கு தகுதி இல்லை.

ஏ.கோவிந்தசாமிக்கு 2 ஆண்டுகளுக்கு முன்பு நூற்றாண்டு விழா நடந்தது. அப்போது அதை கண்டு கொள்ளாத தி.மு.க தலைவர் மு.க.ஸ்டாலின் இப்போது ஓட்டுக்காகவே பேசுகிறார். தேர்தல் வந்ததும் செய்து தருவேன் என்பார். வெற்றி பெற்றதும் மறந்து விடுவார். தற்போது அவர் சொல்லும் பொய்யை நம்புவதற்கு மக்கள் தயாராக இல்லை. தோல்வி அவர்களுக்கு நிச்சயம். வெற்றி எங்களுக்கு நிச்சயம்.

நீட் தேர்வு, மீத்தேன் போன்ற தமிழகத்தில் உள்ள அனைத்து பிரச்சினைகளுக்கும் தி.மு.க தான் காரணம். நந்தன் கால்வாய் திட்டத்தை கொண்டு வருவோம் என்கிறார் ஸ்டாலின். 60 ஆண்டுகளுக்கு முன்பே ஏ.கோவிந்தசாமி கொண்டு வந்த திட்டம் இதுவாகும். அப்போது ஏன் இதை செய்யவில்லை?

கடந்த நாடாளுமன்ற தேர்தலில் டாக்டர் ராமதாசையும், என்னையும் பற்றி கொச்சைப்படுத்தி பேசிய அவர்களுக்கு இந்த தேர்தலில் மக்கள் சரியான பாடம் புகட்டுவார்கள். ஆளும் கட்சிக்கு வாக்களித்தால் நல்ல திட்டங்கள் கிடைக்கும். தொகுதி முன்னேற்றம் அடையும். இந்த தொகுதியில் தேர்ந்தெடுக்கப்பட்ட ரவிக்குமார் எம்.பி. நேரில் வந்து பார்க்கவில்லை. தொகுதிக்கு எதுவும் செய்யவில்லை. அது போன்று எதிர்க்கட்சி வெற்றி பெற்றால் தொகுதிக்கு எதுவும் கிடைக்காது. எனவே நீங்கள் ஏமாந்து விடாதீர்கள்.

இவ்வாறு டாக்டர் அன்புமணி ராமதாஸ் எம்.பி. பேசினார்.

இக்கூட்டத்தில் அமைச்சர்கள் சி.வி.சண்முகம், கே.ஏ.செங்கோட்டையன், கழக வர்த்தக அணி மாநில செயலாளர் சிந்து ரவிச்சந்திரன் மற்றும் கழக கூட்டணி கட்சியினர் திரளாக கலந்து கொண்டனர்.