சிறப்பு செய்திகள்

மக்கள் நலத்திட்டங்கள் தொடர கழகத்தை வெற்றி பெற செய்வீர் – துணை முதல்வர் வேண்டுகோள்

திருநெல்வேலி

நாங்குநேரி சட்டமன்ற தொகுதி இடைத்தேர்தலில் கழகத்தின் சார்பில் போட்டியிடும் ரெட்டியார்பட்டி வெ.நாராயணனை ஆதரித்து நேற்று பல்வேறு இடங்களில் கழக ஒருங்கிணைப்பாளரும், துணை முதலமைச்சருமான ஓ.பன்னீர்செல்வம் சூறாவளி பிரச்சாரம் மேற்கொண்டார்.

அவர் சென்ற இடங்களில் எல்லாம் மக்கள் கடலலை போல் திரண்டு வந்து உற்சாகத்துடன் வரவேற்றார்கள். புரட்சித்தலைவி அம்மா வாழ்க என்று முழக்கமிட்டவாறு துணை முதலமைச்சரை வரவேற்றனர். சாலையின் இரு புறங்களிலும் கழக கொடியுடன் தொண்டர்கள் துணை முதலமைச்சருக்கு எழுச்சிமிகு வரவேற்பு அளித்தனர்.

பிரச்சார கூட்டங்களில் துணை முதலமைச்சர் ஓ.பன்னீர்செல்வம் பேசியதாவது:-

இத்தொகுதியில் இன்று இடைத்தேர்தல் வருவதற்கு காங்கிரசின் சுயநலம் தான் காரணம். காங்கிரஸ் கட்சி இத்தொகுதி மக்களுக்கு மட்டுமல்ல, தமிழக மக்களுக்கே தொடர்ந்து துரோகம் இழைத்து வருகிறது. ஈழத் தமிழர்களுக்கு துரோகம் இழைத்தது. காவேரி டெல்டா பகுதி விவசாய பெருமக்களுக்கு துரோகம் இழைத்தது. நீட் தேர்வு கொண்டு வந்து துரோகம் இழைத்தது. இப்படி பல்வேறு துறைகளிலும் மத்தியில் ஆட்சி செய்த காங்கிரஸ் தமிழகத்துக்கு துரோகம் செய்தது. அந்த கட்சிக்கு உறுதுணையாக இருந்து துணை போனது தான் தி.மு.க..

நீட் தேர்வை இன்று தெரு தெருவாக எதிர்த்து பேசி வரும் ஸ்டாலின் காங்கிரஸ் கட்சி மத்தியில் ஆட்சியில் இருந்தபோது நீட் தேர்வு கொண்டு வந்தபோது அதற்கு எதிர்ப்பு தெரிவிக்காமல் ஆதரவு அளித்தது தான் தி.மு.க.. காவேரி பிரச்சினை எத்தகைய ஜீவாதாரன பிரச்சினை என்பது உங்களுக்கெல்லாம் நன்றாக தெரியும்.

காவேரி நடுவர் மன்ற தீர்ப்புக்காக பல ஆண்டுகள் போராடி 2007-ம் ஆண்டு நமக்கு சாதகமான தீர்ப்பு வெளியானபோது புரட்சித்தலைவி அம்மா அவர்கள் அந்த தீர்ப்பை மத்திய அரசிதழில் வெளியிடுமாறு அப்போது முதலமைச்சராக இருந்த கருணாநிதியிடம் பலமுறை வற்புறுத்தினார். ஆனால் அதை அப்போதைய முதலமைச்சர் கருணாநிதி காதில் போட்டுக் கொள்ளவே இல்லை. அதற்கு துணையாக இருந்தவர் ஸ்டாலின்.

காங்கிரஸ் கூட்டணி ஆட்சியின் போது தான் நீட் தேர்வும் அறிமுகப்படுத்தப்பட்டது. அப்போதெல்லாம் எதிர்ப்பு தெரிவிக்காதவர்கள் இப்போது ஏதோ நான்தான் அதை கொண்டு வந்தது போல் ஆவேசத்துடன் எதிர்க்கிறார்கள். மக்களிடம் போய் பொய் பிரச்சாரம் செய்கிறார்கள். கடந்த நாடாளுமன்ற தேர்தலின்போது காங்கிரஸ் கட்சி என்ன பிரச்சாரம் செய்தது என்பதைநினைத்து பார்க்க வேண்டும். நாங்கள் ஆட்சிக்கு வந்தவுடன் காவேரி நடுவர் மன்ற ஆணையத்தை கலைப்போம் என்று அறிவித்தது. இது எவ்வளவு பெரிய ராஜ துரோகம்.அது மட்டுமல்ல, மேகதாதுவில் கர்நாடக அரசு அணை கட்டுவதற்கு அனுமதி அளிப்போம் என்று அறிவித்தது. அப்போதெல்லாம் வாயை மூடிக் கொண்டிருந்த தி.மு.க. இப்போது எதிர்ப்பு நாடகத்தை அரங்கேற்றி கொண்டிருக்கிறது.

கடந்த 8 ஆண்டுகளில் இந்த ஆட்சி என்ன சாதித்தது என்று தி.மு.க. தலைவர் கேட்கிறார். அவர்கள் ஆட்சியில் இருந்தபோது செய்யாதவற்றை எல்லாம் இந்த எட்டு ஆண்டுகளில் அம்மாவின் அரசு நிறைவேற்றி சாதனை படைத்திருக்கிறது. அவர்கள் ஆட்சியில் ரூ.24 ஆயிரம் கோடிக்கு தான் தொழிற்சாலைகள் தொடங்கப்பட்டன. கழகத்தின் 8 ஆண்டுகால ஆட்சியில் ரூ.1 லட்சத்து 47 ஆயிரம் கோடிக்கு தொழிற்சாலைகள் தொடங்கப்பட்டு சுமார் 40 ஆயிரம் பேருக்கு வேலைவாய்ப்பு வழங்கப்பட்டு இருக்கிறது. 8 ஆண்டுகளில் 8 சட்டக் கல்லூரிகள் தொடங்கப்பட்டுள்ளன.

மாவட்டம் தோறும் ஒரு மருத்துவக் கல்லூரி தொடங்கப்படும் என்று அறிவித்து இன்று பல மருத்துவக் கல்லூரிகள் புதிதாக தொடங்கப்பட்டுள்ளன. பெண்கள் இந்த நாட்டின் கண்கள் என்று கருதிய புரட்சித்தலைவி அம்மா அவர்கள் பெண்களுக்கான பல அரிய திட்டங்களை அமல்படுத்தினார்.அவர்களுக்காக தாலிக்கு தங்கம், பேறுகால நிதியுதவி, திருமண நிதியுதவி, ஆடு, மாடுகள் வளர்ப்பு திட்டம் போன்றவற்றை நிறைவேற்றி இன்று கிராமத்தில் உள்ள பெண்களின் வாழ்வாதாரம் வளர்ந்தோங்கி இருப்பதை காண முடிகிறது.

மானிய விலையில் ஸ்கூட்டர் வழங்குவோம் என்று அம்மா அறிவித்தார். அது இப்போது வழங்கப்பட்டு வருகிறது. சத்துணவு மையங்கள் எல்லாம் புதுப்பொலிவுடன் செயல்பட்டு வருகின்றன. நாள்தோறும் புதிய வகை சாதம் வழங்கப்பட வேண்டும் என்று உத்தரவு பிறப்பிக்கப்பட்டு உள்ளது. எல்.கே.ஜி, யு.கே.ஜி. வகுப்புகள் கூட தொடங்கப்பட்டு இருக்கின்றன. ஆக அம்மாவின் ஆட்சியில் எல்.கே.ஜி.யில் இருந்து பிளஸ்-2 வரை ஒரு காசு செலவில்லாமல் படித்து முன்னேறுவதற்கு அனைத்து உதவிகளையும் இந்த அரசு செய்து கொடுக்கிறது.

இதுபோன்ற திட்டங்கள் வேறு எந்த மாநிலத்திலாவது இருக்கிறதா? தி.மு.க. ஆட்சியில் 5 ஆண்டுகள் தமிழகமே இருண்டு கிடந்தது. மின்சாரம் இல்லாமல் மக்கள் அவதிப்பட்டார்கள். இதனால் தொழிற்சாலைகள் தொடங்க முடியாத நிலைமை ஏற்பட்டது. பள்ளிக் குழந்தைகளின் படிப்பு பாழாகியது. மின்சாரம் கூட தங்கு தடையின்றி வழங்க முடியாத தி.மு.க. ஆட்சியின் தலைவர் தான் இன்று நம்மை பார்த்து என்ன சாதீத்தீர்கள் என்று கேட்கிறார்.

5 ஆண்டுகால தி.மு.க. ஆட்சியில் இருண்டு கிடந்த தமிழகத்தை அம்மா ஆட்சிக்கு வந்ததும் ஒரே ஆண்டில் மின்தட்டுப்பாட்டை நிவர்த்தி செய்ததோடு ஒருசில ஆண்டுகளிலேயே தமிழகத்தை மின்மிகை மாநிலமாக மாற்றி அமைத்து புதிய தொழிற்சாலைகள் தொடங்குவதற்கு வழிவகை செய்தார்களே, இதெல்லாம் ஸ்டாலின் கண்களுக்கு தெரியவில்லையா, இது சாதனை இல்லையா?

எனவே தமிழகத்திற்கு சாதனை மேல் சாதனைகளை செய்து ெகாடுத்து மக்கள்நலத்திட்டங்களை நிறைவேற்றி வரும் கழக அரசு தொடர்ந்து தொடர்ந்து மக்கள் நலத்திட்டங்களை நிறைவேற்றிட இந்த இடைத்தேர்தல் மட்டுமல்ல வரும் உள்ளாட்சித் தேர்தலிலும், சட்டமன்ற பொதுத்தேர்தலிலும் கழகத்தை வெற்றி பெற செய்ய வேண்டுமாறு கேட்டுக் கொள்கிறேன். தமிழகத்திற்கு துரோகம் இழைத்த காங்கிரஸ் கட்சியை இத்தொகுதியில் ஓட ஓட விரட்டியடிக்க வேண்டும்.

இவ்வாறு துணை முதலமைச்சர் ஓ.பன்னீர்செல்வம் பேசினார்.