தற்போதைய செய்திகள்

வெள்ளை அறிக்கை கேட்பது ஸ்டாலினின் சிறுபிள்ளைத்தனம் – அமைச்சர் கே.டி.ராஜேந்திரபாலாஜி பேட்டி…

விருதுநகர்

வெள்ளை அறிக்கை கேட்பது ஸ்டாலினின் செயல் சிறுபிள்ளைத்தனமானது என்று அமைச்சர் கே.டி.ராஜேந்திர பாலாஜி கூறினார்.

பால்வளத்துறை அமைச்சர் கே.டி.ராஜேந்திர பாலாஜி விருதுநகரில் செய்தியாளர்களுக்கு பேட்டி அளித்தார். அப்போது அவர் கூறியதாவது:-

அந்நிய முதலீடுகளை ஈர்க்க முதலமைச்சர் வெளிநாட்டு பயணம் சென்றது மிகப்பெரிய வெற்றி. அமெரிக்கா, துபாய் போன்ற நாடுகளுக்கு சென்று கால்நடை வளர்ப்பு தீவன உற்பத்தி போன்றவற்றை பார்வையிட்டோம். பால்வளத் துறை சார்பில் சேலம் மாவட்டத்தில் கால்நடை ஆராய்ச்சி மையம் பசு வளர்ப்பு இனவிருத்தி தீவன உற்பத்தி ஆகியவற்றை ஒருங்கிணைந்த மிகப்பெரிய பால் பண்ணை அமைக்கப்படும்.

லாஸ் ஏஞ்சல்ஸ் கலிபோர்னியா உள்ளிட்ட மாகாணங்களுக்கு சென்று கால்நடை வளர்ப்பை பார்வையிட்டோம். அதேபோல் தமிழகத்தில் ஊட்டி, கொடைக்கானல், சேலம் போன்ற மலை பிரதேசங்களில் மிகப்பெரிய பால் பண்ணை அமைத்து தமிழகத்தில் பால் புரட்சி ஏற்படுத்தப்படும். அதற்கான பூர்வாங்க பணிகள் துவங்கப்பட்டு ஒரு வருடத்திற்கு முடிக்கப்படும்.

முதலமைச்சர் எடப்பாடி கே. பழனிசாமி வெளிநாட்டுக்கு சென்று 2850 கோடி அளவில் தமிழகத்தில் முதலீடை ஈர்த்துள்ளார். முதலமைச்சரின் முடிவை அனைவரும் போற்றுகிறார்கள். ஸ்டாலினை தவிர அனைவரும் வரவேற்கிறார்கள். எவ்வளவு முதலீடு என்பதை வெள்ளை அறிக்கையாக தர வேண்டும் என ஸ்டாலின் கேட்டுள்ளார். வெள்ளை அறிக்கை என்ன மஞ்சள் அறிக்கை, பச்சை அறிக்கையும் கொடுப்போம். ஸ்டாலினுக்கு வெள்ளரிக்காயும் கொடுப்போம்.

துபாய்க்கு சென்ற போது நடு இரவிலும் தமிழர்கள், வெளிநாடு வாழ் இந்திய தமிழர்கள் அனைவரும் எங்களை வரவேற்றார்கள். முதலமைச்சரின் நடவடிக்கை ஒரு ஆரோக்கியமான நடவடிக்கை. முதலமைச்சர் எடப்பாடி கே.பழனிசாமி தமிழ்நாட்டுக்காக தியாக வாழ்க்கை வாழ்ந்து கொண்டிருக்கிறார். தமிழை விற்று தமிழர்களை ஏமாற்றி நாடகம் நடத்தி அரசியல் செய்தவர் ஸ்டாலின்.

கழக ஆட்சியில் அவரது நாடகம் எடுபடாது. முதலமைச்சரின் வெளிநாட்டு பயணத்தால் பல தொழில் அதிபர்கள் தமிழகத்திற்கு வந்து தொழில் தொடங்குவார்கள். வேலையில்லாத பல இளைஞர்களுக்கு இதன் மூலம் வேலை வாய்ப்பு கிடைக்கும். ஸ்டாலின் துணை முதல்வராக இருந்துள்ளார். புரிந்துணர்வு ஒப்பந்தம் போட்டவுடன் உடனடியாக தொழில் துவங்க முடியாது என அவருக்கே தெரியும். ஸ்டாலின் பேச்சு சிறுபிள்ளைத்தனமானது. ஒன்றும் தெரியாதது போல் நாடகமாடுகிறார்.

விருதுநகர் மாவட்டம் ஸ்ரீவில்லிபுத்தூரில் பால் பண்ணை தொடங்கப்படும். சிவகாசியில் நறுமண பால் பண்ணை தொடங்கப்படும். வெளிநாட்டு சுற்றுப் பயணத்தின் மூலம் அந்நிய முதலீடுகள் ஈர்க்கப்பட்டு தமிழகத்தில் நாற்பதாயிரம் இளைஞர்களுக்கு வேலைவாய்ப்பு அளிக்கப்படும். மேலும் ஐம்பதாயிரம் இளைஞர்களுக்கு வேலைவாய்ப்பு கிடைக்க நடவடிக்கை எடுக்கப்படும்.

இவ்வாறு அமைச்சர் கே.டி.ராஜேந்திரபாலாஜி தெரிவித்தார்