சிறப்பு செய்திகள்

ஏப்ரல் 1-ந்தேதி முதல் விவசாயிகளுக்கு 24 மணி நேரமும் இலவச மின்சாரம்-முதலமைச்சர் அறிவிப்பு

சென்னை

ஏப்ரல் 1-ந்தேதி முதல் விவசாயிகளுக்கு 24 மணி நேரமும் மும்முனை மின்சாரம் வழங்கப்படும் என்று முதலமைச்சர் எடப்பாடி கே.பழனிசாமி அறிவித்துள்ளார்.

முதலமைச்சர் எடப்பாடி கே.பழனிசாமி நேற்று சேலம் மாவட்டம் மேட்டூர் திப்பம்பட்டியில் நடைபெற்ற மேட்டூர் அணையின் வெள்ள உபரி நீரை சேலம் மாவட்டம் சரபங்கா வடிநிலத்தில் உள்ள வறண்ட ஏரிகளுக்கு நீரேற்றும் மூலம் நீர் வழங்கும் திட்டத்தை தொடங்கி வைத்து பேசியதாவது:-

அம்மாவின் அரசு ஏராளமான திட்டங்களை செயல்படுத்தி வருகிறது. 50 ஆண்டு காலமாக நிறைவேற்ற முடியாமல், விவசாயப் பெருங்குடி மக்கள் ஏங்கியிருந்த திட்டத்தை நிறைவேற்றி, டெல்டா மாவட்ட விவசாயிகளின் துயர் துடைக்க அம்மா அவர்கள் சட்டப் போராட்டம் நடத்தினார்.

அம்மாவின் அரசும் உச்சநீதிமன்றத்தில் சட்டப் போராட்டம் நடத்தி காவேரி நதிநீர் பிரச்சனை தீர்க்கப்பட்டுள்ளது. நான் முதலமைச்சராகப் பொறுப்பேற்று இந்த காவேரி நதிநீர் தீர்ப்பைப் பெற்றுத் தந்தது ஒரு வரலாற்றுச் சாதனையாகும்.

டெல்டா பகுதிகளை பாதுகாக்கப்பட்ட வேளாண் மண்டலமாக அறிவிக்க வேண்டும் என்ற விவசாயிகளின் கோரிக்கையை ஏற்று டெல்டா பகுதியை பாதுகாக்கப்பட்ட வேளாண் மண்டலமாக அறிவித்து எங்கள் அரசு சாதனை புரிந்துள்ளது. வறட்சி, புயல், வெள்ளத்தால் பாதிக்கப்பட்ட விவசாயிகளின் கோரிக்கைகளை ஏற்று, 16,43,000 விவசாயிகள் தொடக்க வேளாண் கூட்டுறவு வங்கிகளில் வாங்கிய ரூ.12,110 கோடி பயிர்கடன் தள்ளுபடி செய்யப்பட்டுள்ளது.

விவசாயிகளின் கோரிக்கைகளை, எண்ணங்களை நிறைவேற்றிய அரசு அம்மாவின் அரசு. ஐந்தாண்டு காலத்தில் இரண்டு முறை பயிர்கடனை ரத்து செய்து வரலாற்றை படைத்த அரசு அம்மாவின் அரசு. இதயதெய்வம் புரட்சித் தலைவி அம்மா அவர்கள் 2016 தேர்தல் அறிக்கையில், நான் முதலமைச்சராக தேர்தெடுக்கப்பட்டவுடன் விவசாயிகள் பெற்ற பயிர்கடன் ரத்து செய்யப்படும் என்று தெரிவித்ததை, ஆட்சிப் பொறுப்பேற்றவுடன் ரத்து செய்தார்.

தேர்தல் நேரத்தில் வருகின்ற கோரிக்கையை தேர்தல் அறிக்கையில் கட்சியினர் குறிப்பிடுவர். ஆனால், அம்மாவின் அரசு, விவசாயிகள் கோரிக்கை வைத்தவுடன் தேர்தலுக்கு முன்பாகவே அதனை நிறைவேற்றி வரலாற்றைப் படைத்துள்ளது. விவசாயிகளின் கோரிக்கையான மும்முனை மின்சாரம், ஏப்ரல் 1-ந்தேதியில் இருந்து 24 மணி நேரமும் அனைத்து விவசாயிகளுக்கும் வழங்கப்படும்.

இவ்வாறு முதலமைச்சர் எடப்பாடி கே.பழனிசாமி பேசினார்.