சிறப்பு செய்திகள் தற்போதைய செய்திகள்

மேலரசம்பட்டு அணைக்கட்டை கட்டி நீரை தேக்க அரசு பாடுபடும் – பேரவையில் முதலமைச்சர் திட்டவட்டம்

சென்னை

மேலரசம்பட்டு அணைக்கட்டை கட்டி முடித்து நீரை தேக்க அரசு பாடுபடும் என்று சட்டப்பேரவையில் முதலமைச்சர் திட்டவட்டமாக தெரிவித்தார்.

முதலமைச்சர் எடப்பாடி கே.பழனிசாமி  சட்டப்பேரவையில், திராவிட முன்னேற்றக் கழக சட்டமன்ற உறுப்பினர்
ஏ.பி. நந்தகுமார் அணைக்கட்டு தொகுதியில் மேலரசம்பட்டு அணை கட்டுவது குறித்து எழுப்பிய கேள்விக்கு அளித்த விளக்கம் வருமாறு:-

பதினைந்து ஆண்டு காலமாக நிலம் எடுக்கின்ற பிரச்சனை இருந்து கொண்டு இருக்கிறது என்று சொல்கிறீர்கள். ஆகவே, நிலத்தை கையகப்படுத்திய பிறகு தான், அந்தப் பணியை செய்ய முடியும். பதினைந்து ஆண்டு காலம் என்றால், உங்களுடைய ஆட்சிக்காலத்திலும் நிலம் எடுக்கின்ற பணி நடைபெற்று கொண்டிருந்தது. நிலம் எடுக்கின்ற பணி நிறைவு பெற்ற பிறகு, இந்தப் பணியை துவக்கினால் தான் உரிய காலத்திலே நாம் அந்தப் பணியை நிறைவு செய்ய முடியும்.

விவசாயிகளிடத்திலே உடனே போய் அந்த நிலத்தை எடுத்துவிட முடியாது. விவசாயிகளிடத்திலே பக்குவமாக பேசப்பட்டு வருகிறது. அவர்களிடத்திலே சமாதானக் கடிதம் பெற்று, நீங்கள் நினைக்கின்றதைப் போல் அங்கே ஒரு அணைக்கட்டை கட்டி, நீரை தேக்கி, அங்கே இருக்கின்ற விவசாய பெருமக்களுக்கு தேவையான நீரை வழங்கி, உற்பத்தியை பெருக்கி, அவர்களுடைய வாழ்வு செழிக்க எங்களுடைய அரசு நிச்சயம் பாடுபடும் என்பதை தெரிவித்துக் கொள்கிறேன்.

அம்மாவுடைய அரசு எடுத்த நடவடிக்கையின் காரணமாக பிரசவ காலங்களிலே இறக்கின்ற தாய்மார்களுடைய இறப்பு குறைக்கப்பட்டு இருக்கிறது. அதேபோல, பிறக்கின்ற குழந்தைகளின் இறப்பு குறைக்கப்பட்டு இருக்கின்றது. 2030-ல் எட்ட வேண்டிய இலக்கை இப்பொழுதே தமிழ்நாடு அரசு அடைந்திருக்கிறது என்பதை உறுப்பினருக்கு தெரிவித்துக் கொள்கிறேன்.

இவ்வாறு முதலமைச்சர் எடப்பாடி கே.பழனிசாமி பதில் அளித்து பேசினார்.