சிறப்பு செய்திகள்

விழுப்புரம் அம்மா பல்கலைக்கழகத்தை வேறு பல்கலை.யுடன் இணைக்கக்கூடாது-அரசுக்கு, எதிர்க்கட்சி தலைவர்வேண்டுகோள்

சென்னை,

விழுப்புரம் அம்மா பல்கலைக்கழகத்தை வேறு பல்கலை.யுடன் இணைக்கக் கூடாது என்று அரசுக்கு எதிர்க்கட்சி தலைவர் எடப்பாடி கே.பழனிசாமி வேண்டுகோள் விடுத்துள்ளார்.

கழக ஒருங்கிணைப்பாளரும், முன்னாள் முதலமைச்சரும், சட்டமன்ற எதிர்க்கட்சி துணைத்தலைவருமான ஓ.பன்னீர்செல்வம், கழக இணை ஒருங்கிணைப்பாளரும், முன்னாள் முதலமைச்சரும், சட்டமன்ற எதிர்க்கட்சி தலைவருமான எடப்பாடி கே.பழனிசாமி ஆகியோர் நேற்று தலைமைக்கழகத்தில் ஆலோசனை நடத்தினர்.

பின்னர் அவர்கள் கூட்டாக செய்தியாளர்களை சந்தித்தனர். அப்போது கழக இணை ஒருங்கிணைப்பாளரும், முன்னாள் முதலமைச்சரும், சட்டமன்ற எதிர்க்கட்சி தலைவருமான எடப்பாடி கே.பழனிசாமி கூறியதாவது:-

விழுப்புரம் மாவட்டத்தில் டாக்டர் ஜெ.ஜெயலலிதா பல்கலைக்கழகத்தை நடத்த வேண்டிய அவசியம் இல்லை என்று அமைச்சர் பொன்முடி தெரிவித்துள்ளார். இதுகுறித்து தங்களின் கருத்து என்ன என்று செய்தியாளர்கள் கேள்வி எழுப்பினர்.

இதற்கு பதில் அளித்த எதிர்க்கட்சி தலைவர் எடப்பாடி கே.பழனிசாமி, விழுப்புரம் மாவட்டத்தை பொறுத்தவரையில் விழுப்புரம், கடலூர், கள்ளக்குறிச்சி என மூன்று மாவட்டத்திலும் ஏழை எளிய மக்கள் அவர்களின் குழந்தைகள் உயர்கல்வி படிப்பதற்காக பின்தங்கிய, தாழ்த்தப்பட்ட மாணவர்கள் உயர்கல்வி படிப்பதற்காக அம்மாவின் திருநாமத்தின் பெயரிலே பல்கலைக்கழகம் அமைக்கப்படும் என்ற அறிவிப்பை அளித்து அதனை நடைமுறைப்படுத்தினோம்.

ஆனால் இன்றைக்கு வந்த தி.மு.க. அமைச்சர் பொன்முடி அதனை வேறு பல்கலைக்கழகத்துடன் இணைக்கப்படும் என்று தெரிவித்துள்ளார். அமைச்சர் பொன்முடி அந்த மாவட்டத்தை சேர்ந்தவர். அந்த மாவட்ட மக்களுக்கு தேவையான நன்மைகளை செய்வதற்கு பதிலாக அம்மாவின் அரசு பின்தங்கிய பகுதியில் இருக்கின்ற மாணவர்களின் எதிர்காலம் சிறக்க வேண்டும் என்பதற்காக அம்மாவின் திருநாமத்தில் அதனை திறந்தோம்.

ஆனால் வேண்டுமென்றே திட்டமிட்டு, அம்மாவின் பெயர் இருக்கும் காரணத்தினால் அந்த பல்கலைக்கழகம் அங்கு இயங்கக்கூடாது என்பதற்காகவே அவர்கள் வேறு பல்கலைக்கழகத்தில் இந்த பல்கலைக்கழகத்தை இணைக்க முயற்சிக்கிறார்கள். இது கண்டனத்திற்குரியது.

அதுமட்டுமல்லாமல் இதற்கு அவர்கள் குறிப்பிடும் காரணம் சரியான காரணம் இல்லை. அமைச்சர் பொன்முடி நிதிநிலை எங்களுக்கு குறைவாக இருக்கிறது என்று சொல்கிறார். அப்படி நிதி நிலை இல்லை என்று சொல்லும் பொழுது முன்னாள் முதலமைச்சர் கருணாநிதி பெயரில் மதுரையில் நூலகம் அமைக்கப்படும் என்று தெரிவிக்கிறார். புதியதாக ஆரம்பிக்கும் நூலகத்தை நாங்கள் எதிர்க்கவில்லை. நூலகம் தேவை. அவர்கள் தலைவர் பெயரில் வைக்கிறார்கள். அதனை நாங்கள் எதிர்க்கவில்லை. அங்கு நூலகம் அமைப்பது பொருத்தமானதாக தான் இருக்கிறது.

ஆனால் ஏற்கனவே தொடங்கப்பட்ட பல்கலைக்கழகத்தை வேறு இடத்தில் இணைப்பது சரியா? அதுவும் சொல்கின்ற காரணம். நிதி இல்லை என்றால். அங்கே எப்படி புதிய நூலகம் அமைக்கப்படும். அதற்கு எங்கிருந்து நிதி வந்தது. அதுமட்டுல்லாமல் அந்த இடம் குறுகியதாக உள்ளதாக தெரிவித்தார். அந்த இடத்தில் தான் சட்டக்கல்லூரியும் நடைபெற்றது.

பிறகு அதற்கு தேவையான நிதிஉதவி செய்து பிரமாண்டானதாக அதனை உருவாக்கி தந்துள்ளோம். ஒரு பல்கலைக்கழகத்தை ஆரம்பிக்கும் போது ஏதே ஒரு இடத்தில் ஆரம்பிக்கப்படும். பிறகு வேறு இடத்திற்கு மாற்றப்படும். புதிய மாவட்டங்களை நாங்கள் அறிவித்தோம். சிறிய இடத்தில் தான் மாவட்ட ஆட்சியர்கள் அலுவலகம் துவங்கப்பட்டது. அதற்கு பிறகு தேவையான கட்டிட வசதியை ஏற்படுத்தி மாற்று இடத்தை ஏற்படுத்தினோம்.

இதுபோன்ற நிலையில் வேண்டுமென்றே திட்டமிட்டு இதயதெய்வம் அம்மாவின் பெயரிலே பல்கலைக்கழகம் அமைக்கப்பட்ட காரணத்தினாலே அதனை வேறு மாவட்டத்தில் உள்ள பல்கலைக்கழத்துடன் இணைக்கப்படுவதாக அறிவித்துள்ளார்கள். இது கண்டனத்திற்குரியது. அங்கு இருக்கும் மாணவர்களின் நலன் கருதி, அறிவிக்கப்பட்ட இடத்திலேயே அம்மாவின் பெயரால் உள்ள பல்கலைக்கழகம் இயங்க வேண்டும் என்று கேட்டுக்கொள்கிறேன்.

இவ்வாறு எதிர்க்கட்சி தலைவர் எடப்பாடி கே.பழனிசாமி தெரிவித்தார்.

ஒருங்கிணைப்பாளர் ஓ.பன்னீர்செல்வம்

இதனைத் தொடர்ந்து கழக ஒருங்கிணைப்பாளரும், முன்னாள் முதலமைச்சரும், சட்டமன்ற எதிர்க்கட்சி துணைத்தலைவருமான ஓ.பன்னீர்செல்வம் செய்தியாளர்களிடம் கூறியதாவது:-

அம்மாவின் பெயரால் அமைக்கப்பட்டுள்ள பல்கலைக்கழகத்திற்கு அம்மாவின் பெயர் வைக்கப்பட்டது எந்த அளவுக்கு பொருத்தம் என்பதனை நாம் எல்லாம் எண்ணி பார்க்க வேண்டும். உயர்கல்வித்துறையில் அம்மா எடுத்த நல்ல நடவடிக்கையின் காரணமாக தேசிய அளவில் உயர்கல்வி படிக்கும் மாணவர்களின் சராசரி எண்ணிக்கை 24 சதவீதம்.

அம்மா அரசின் நடவக்கையால் இன்றைக்கு தமிழகத்தில் உயர்கல்வி படிக்கும் மாணவர்களின் சாரசரி எண்ணிக்கை 48-லிருந்து 52 ஆக உயர்ந்தது தான் அந்த பல்கலைக்கழகத்திற்கு அம்மாவின் பெயர் வைக்க காரணம். அம்மாவின் ஆட்சியில் உயர்கல்வியில் ஒரு பொற்காலம் என்பதை சுட்டிக்காட்ட கடமைப்பட்டுள்ளோம். அவ்வளவு நல்லமுறையில் அம்மா அவர்கள் ஆட்சி நடத்தி கல்வியில் மிகப்பெரிய மாற்றத்தை ஏற்படுத்தி மாணவர்களை வளப்படுத்தினார்.

இவ்வாறு கழக ஒருங்கிணைப்பாளரும், முன்னாள் முதலமைச்சரும், சட்டமன்ற எதிர்க்கட்சி துணைத்தலைவருமான ஓ.பன்னீர்செல்வம் கூறினார்.