தற்போதைய செய்திகள்

வெளிநாடு சென்று திரும்பிய மீனவர்கள் மாவட்ட ஆட்சியரின் சான்று இல்லாமல் சேமிப்பு மற்றும் நிவாரணத் திட்டத்தில் சேரலாம் – அமைச்சர் டி.ஜெயக்குமார் தகவல்

சென்னை

வெளிநாடு சென்று திரும்பிய மீனவர்கள் மாவட்ட ஆட்சியரின் சான்று இல்லாமலேயே சேமிப்பு மற்றும் நிவாரணத் திட்டத்தில் சேரலாம் என்று அமைச்சர் டி.ஜெயக்குமார் தெரிவித்துள்ளார்.

இது குறித்து மீன்வளம், பணியாளர் மற்றும் நிருவாகச் சீர்த்திருத்தத்துறை அமைச்சர் டி.ஜெயக்குமார் வெளியிட்டுள்ள அறிக்கையில் கூறியிருப்பதாவது:-

சேமிப்பு மற்றும் நிவாரணத் திட்டத்தின் கீழ் பயனாளிகள் சேர்க்கை சேமிப்பு மற்றும் நிவாரணத் திட்டத்தின் கீழ் கடல் மீனவர் மற்றும் மீனவ மகளிர் ஒருவர் தனது பங்குத் தொகையாக 9 மாதங்களில் மொத்தம் ரூ. 1500-செலுத்துவர். பயனாளிகள் செலுத்தும் பங்குத் தொகைக்கு ஈடாக அரசு பங்குத் தொகையாக மொத்தம் ரூ.3000- சேர்த்து மீன்பிடி குறைவு காலங்களில் நிவாரணத் தொகையாக மொத்தம் ரூ.4500- பயனாளிகளுக்கு ஆண்டு தோறும் வழங்கப்பட்டு வருகிறது. மீனவரை பொறுத்தமட்டில் அரசு பங்குத் தொகை மத்திய மாநில அரசுகளால் ஏற்றுக் கொள்ளப்படுகிறது. மீனவ மகளிரை
பொறுத்தமட்டில் அரசு பங்குத் தொகை முழுவதையும் தமிழக அரசே ஏற்றுக்கொள்கிறது.

2019-20ம் ஆண்டில் சேமிப்பு மற்றும் நிவாரணத் திட்டத்தின் கீழ் 13 கடலோர மாவட்டங்களை சேர்ந்த 2 லட்சம் கடல் மீனவர்களுக்கு அரசின் பங்குத் தொகையாக 60 கோடி ரூபாயும், 1.95 லட்சம் கடல் மீனவ மகளிருக்குஅரசின் பங்குத் தொகையாக 58.65 கோடி ரூபாயும் நிவாரணத் தொகையாக வழங்கப்பட்டுள்ளது.

அவ்வாறே 2020-21ம் ஆண்டிற்கான சேமிப்பு மற்றும் நிவாரணத் திட்டத்தின் கீழ் தகுதியான பயனாளிகள் சேர்க்கும் பணி நடைபெற்று வருகிறது.இத்திட்டத்தில் புதிய மீனவர்கள் சேர்க்கையின்போது மாவட்ட ஆட்சியரின் மெய்தன்மை சான்று பெறப்பட வேண்டும். தற்போது வெளிநாடுகள் மற்றும் வேறு மாநிலங்களுக்கு சென்று, மீண்டும் சொந்த ஊர்களுக்கு திரும்பும் மீனவர்களும் மாவட்ட ஆட்சியர்களிடம் மெய்தன்மை சான்று பெற வேண்டிய நிலை உள்ளது.

பல்வேறு தரப்பு மீனவ பிரதிநிதிகளிடமிருந்து பெறப்பட்ட கோரிக்கைகளை ஏற்று, மீனவர்கள் எளிதாக இத்திட்டத்தில் சேர்ந்து பயன்பெறும் வகையில், வெளிநாடுகள் மற்றும் வேறு மாநிலங்களுக்கு சென்ற மீனவர்கள் மூன்றாண்டுகளுக்குள் சொந்த ஊர்களுக்கு திரும்பும் பொழுது மாவட்ட ஆட்சித்தலைவரின் மெய்தன்மை சான்று இல்லாமலேயே சேமிப்பு மற்றும் நிவாரணத் திட்டத்தில் சேர்ந்து பயன்பெற வழிவகை செய்யப்பட்டுள்ளது.இவ்வாறு அமைச்சர் டி.ஜெயக்குமார் தெரிவித்துள்ளார்.