தற்போதைய செய்திகள்

ரூ.8.54 கோடி மதிப்பில் புதிய தார்சாலை பணி – அமைச்சர் கே.பி.அன்பழகன் தொடங்கி வைத்தார்

தருமபுரி

பாப்பிரெட்டிப்பட்டி ஊராட்சி ஒன்றியத்திற்குட்பட்ட 4 இடங்களில் ரூ.8.54 கோடி மதிப்பில் புதிய தார்சாலை பணிகளை அமைச்சர் கே.பி.அன்பழகன் தொடங்கி வைத்தார்.

தருமபுரி மாவட்டம், பாப்பிரெட்டிப்பட்டி ஊராட்சி ஒன்றியத்தில் ரூ.8 கோடியே 54 லட்சத்து 58 ஆயிரம் மதிப்பீட்டில் மூக்காரெட்டிப்பட்டி, அ.பள்ளிப்பட்டி, வெங்கடசமுத்திரம், பொம்மிடி ஆகிய 4 இடங்களில் புதிய தார்சாலைகள் அமைக்கும் பணிகளை உயர்கல்வித்துறை அமைச்சர் கே.பி.அன்பழகன் பூமிபூஜை செய்து தொடங்கி வைத்தார். இந்நிகழ்ச்சிக்கு மாவட்ட ஆட்சித்தலைவர் எஸ்.மலர்விழி தலைமை வகித்தார்.

பின்னர் அமைச்சர் கே.பி.அன்பழகன் தெரிவித்ததாவது:-

புரட்சித்தலைவி அம்மா அவர்களின் அரசின் சார்பில் முதலமைச்சர் அவர்களின் உத்தரவின் படி, தருமபுரி மாவட்டத்தில் பல்வேறு வளர்ச்சி திட்ட பணிகள் தொடங்கப்பட்டு நடைபெற்று வருகிறது. பாப்பிரெட்டிப்பட்டி ஊராட்சி ஒன்றியத்தில் பாரத பிரதம மந்திரியின் சாலை மேம்பட்டு திட்டம் 2019-2020-ம் ஆண்டின் கீழ் மூக்காரெட்டிப்பட்டி ஊராட்சியில் ரூ.91.21 லட்சம் மதிப்பீட்டில் மூக்காரெட்டிப்பட்டி முதல் காந்திநகர் வழியாக தொட்டிக்கல் பெரும்பள்ளம் வரை 2.4 கி.மீ. தொலைவிற்கு புதிய தார்சாலை அமைக்கும் பணி,

அ.பள்ளிப்பட்டி ஊராட்சியில் ரூ.3.72 கோடி மதிப்பீட்டில் அ.பள்ளிப்பட்டி முதல் சாலூர் வழியாக கோட்டமேடு வரை 5.85 கி.மீ. தொலைவிற்கு புதிய தார்சாலை அமைக்கும் பணி, வெங்கடசமுத்திரம் ஊராட்சியில் ரூ.2.68 கோடி மதிப்பீட்டில் மல்லாபுரம் சாலை முதல் வாணியாறு அணை வரை 2.85 கி.மீ. தொலைவிற்கு புதிய தார்சாலை அமைக்கும் பணி மற்றும் பொம்மிடி ஊராட்சியில் ரூ.1.24 கோடி மதிப்பீட்டில் மல்லாபுரம் சாலை முதல் செம்பியானூர் வரை 2.35 கி.மீ. தொலைவிற்கு புதிய தார்சாலை அமைக்கும் பணி என மொத்தம் 4 பணிகள் ரூ.8 கோடியே 54 லட்சத்து 58 ஆயிரம் மதிப்பில் தொடங்கப்பட்டுள்ளது. இப்பணிகள் விரைந்து முடிக்கப்பட்டு பொதுமக்கள் பயன்பாட்டிற்கு கொண்டு வரப்படும்.

இவ்வாறு அமைச்சர் கே.பி.அன்பழகன் தெரிவித்தார்.

இந்நிகழ்ச்சியில் பாப்பிரெட்டிப்பட்டி சட்டமன்ற உறுப்பினர் ஆ.கோவிந்தசாமி, அரூர் சார் ஆட்சியர் மு.பிரதாப் மாவட்ட ஊரக வளர்ச்சி முகமை திட்ட இயக்குநர் ஆர்த்தி, அரூர் கூட்டுறவு சர்க்கரை ஆலைத்தலைவர் விஸ்வநாதன், மாவட்ட ஊராட்சிக்குழு உறுப்பினர் பூங்கொடிசேகர், கூட்டுறவு சங்கத்தலைவர் நல்லதம்பி, வட்டாட்சியர் கற்பகவடிவு, வட்டார வளர்ச்சி அலுவலர்கள் இரவிச்சந்திரன், கிருஷ்ணன் மற்றும் உதவி பொறியாளர்கள் வெங்கடேசன், சத்தியவாணி ஆகியோர் கலந்து கொண்டனர்.