தற்போதைய செய்திகள்

இளைஞர்கள், இளம்பெண்களுக்கு தலைசிறந்த ஒரு இயக்கம் கழகம் தான் – வி.பி.பி.பரமசிவம் எம்.எல்.ஏ பேச்சு

தருமபுரி

கழகத்தில் ஜனநாயகம் வேரூன்றி இருக்கிறது. இளம்பெண்களுக்கும், இளைஞர்களுக்கும் ஒரு தலைசிறந்த இயக்கம் நமது கழகம் தான் என்று டாக்டர் வி.பி.பி.பரமசிவம் எம்.எல்.ஏ பேசினார்.

தருமபுரி மாவட்ட கழக இளைஞர் மற்றும் இளம்பெண்கள் பாசறை சார்பில் உறுப்பினர் சேர்க்கைக்கான ஆலோசனை கூட்டம் தருமபுரி மாவட்டம் பென்னாகரத்தில் மாவட்ட கழக செயலாளரும், அமைச்சருமான கே.பி.அன்பழகன் தலைமையில் நடைபெற்றது.

இக்கூட்டத்திற்கு பாப்பிரெட்டிபட்டி தொகுதி சட்டமன்ற உறுப்பினர் ஏ.கோவிந்தசாமி, அரூர் தொகுதி சட்டமன்ற உறுப்பினர் வே.சம்பத்குமார், கழக அம்மா பேரவை இணை செயலாளரும், முன்னாள் சட்ட மன்ற உறுப்பினருமான கே.சிங்காரம், இளைஞர் மற்றும் இளம்பெண்கள் பாசறை மாநில இணை செயலாளர் முத்துசாமி, தருமபுரி மாவட்ட கூட்டுறவு ஒன்றிய தலைவர் பொன்னுவேல், இளைஞர் மற்றும் இளம்பெண்கள் பாசறை இணை செயலாளர் கே.பி.ஆனந்த், மாவட்ட கழக அவைத்தலைவர் தொ.மு.நாகராஜன், மாவட்ட கழக துணை செயலாளர் ராமச்சந்திரன், பொருளாளர் நல்லத்தம்பி ஆகியோர் முன்னிலை வகித்தனர்.

இதில் கழக விவசாய பிரிவு தலைவரும், தருமபுரி மாவட்ட பால் உற்பத்தியாளர்கள் கூட்டுறவு ஒன்றிய தலைவருமான டி.ஆர்.அன்பழகன் வரவேற்புரையாற்றினார்.இக்கூட்டத்தில் தருமபுரி மாவட்ட கழக செயலாளரும், அமைசருமான கே.பி.அன்பழகன், கழக இளைஞர் மற்றும் இளம்பெண்கள் பாசறை மாநில செயலாளரும், வேடந்தூர் தொகுதி சட்டமன்ற உறுப்பினருமான வி.பி.பி.பரமசிவம் ஆகியோர் கலந்து கொண்டு இளைஞர் மற்றும் இளம்பெண்கள் பாசறை சார்பில் உறுப்பினர் சேர்க்கைக்கான படிவங்களை வழங்கினர்.

பின்னர் டாக்டர் வி.பி.பி.பரமசிவம் எம்.எல்.ஏ பேசியதாவது:-

இளைஞர்களுக்கும், இளம்பெண்களுக்கும் தலைசிறந்த ஒரு இயக்கம் இருக்கிறதென்றால் அது அதிமுகவாகத்தான் இருக்க முடியும். ஒன்று இந்த இயக்கத்தில் தான் ஜனநாயகம் வேரூன்றி இருக்கிறது. மேலும் உயிரோட்டம் அதிகமாக இருக்கிறது.
அதிமுக புரட்சித்தலைவரால் தொடங்கப்பட்ட காலத்தில் இருந்து இன்று வரை கடைக்கோடியில் உள்ள ஒரு தொண்டன் கூட கட்சியின் தலைமைக்கு வரமுடியும் என்ற ஜனநாயகத்தை சிலுவம்பாளையத்தில் கிளை செயலளாராக 21 வயதில் இருந்து தனது தந்தையின் சொல்லை மீறி அதிமுக கொடியை ஏற்றி தனது அரசியல் பயணத்தை தொடங்கியவர். இந்த நாள் தமிழகத்தின் முதல்வராக இந்த இயக்கத்தின் இணை ஒருங்கிணைப்பாளராக உயர்ந்திருக்கிறார் என்று சொன்னால் அது ஜனநாயகம்.

தேனியில் ஒரு குக்கிராமத்தில் தனது வாழ்க்கையை தொடங்கி கிளை செயலாளராக, மாவட்ட செயலாளராக, பெரியகுளம் நகர்மன்ற சேர்மனாக, அமைச்சராக, மறைந்த முதல்வர் அம்மா அவர்களுக்கு சோதனை வந்த போது, அவருடைய பொறுப்பை வகித்தவர் துணை முதலைமைச்சர் ஓ.பி.எஸ். சாதாரணமாக இருந்து உச்சத்தை அடைந்துள்ளார். அதுதான் அதிமுகவின் ஜனநாயகம்.

திமுகவில் குடும்ப அரசியல், அராஜக அரசியல் நடக்கும். கருணாநிதி தலைவராக இருந்தார். பின்னர் ஸ்டாலின் வந்தார். தற்போது உதயநிதி ஸ்டாலின் வந்துள்ளார். அங்கு மூத்த முன்னாள் அமைச்சர்கள், உறுப்பினர்களெல்லாம் புழுங்கி கொண்டு இருக்கின்றனர். எனது குடும்பத்தில் இருந்து மகன், மகள் உள்ளிட்ட குடும்ப உறுப்பினர்கள் யாரும் அரசியலுக்கு வரமாட்டார்கள் என்று ஸ்டாலின் கூறினார். இன்று திமுகவை ஆட்டி படைப்பது அவரது மனைவி, மருமகன், மகன். இதை யாரும் மறுக்க முடியாது. அவர்கள் கை நீட்டுபவர்களுக்கு தான் எம்.எல்.ஏ சீட்டு என்கிறார்கள். தற்போது உதயநிதி ஸ்டாலின் மகனின் போட்டோ போஸ்டரில் இடம் பெற்றிருப்பது எதில் போய் முடியும் என தெரியவில்லை.

சாமானியன் சாதனையை சமூக வலைத்தளங்களில் மறைக்கின்றனர். இளைஞர்கள் தங்களது இதய தராசில் எடைபோட்டு நம் முதல்வர் என்ன செய்கிறார். ஸ்டாலின் என்ன செய்கிறார் என பார்க்க வேண்டும். முதல்வர் அம்மா மறைவிற்கு பின்னர் அவரது திட்டங்களில் சிறிதும் குறைவின்றி அத்தனை திட்டங்களையும் தொடர்ந்து தந்துள்ளார். கல்வியை பாதியில் நிறுத்தாமல் இருக்க பெண்களுக்கு அம்மா அவர்கள் 4 கிராம் தங்கம் வழங்கினார். இத்திட்டம் மேம்படுத்தப்பட்டு 8 கிராமாக வழங்கப்படுகிறது. லேப்-டாப், சைக்கிள், வேலைக்கு செல்லும் பெண்களுக்கு ரூ.25 ஆயிரம் மானியத்தில் ஸ்கூட்டர், கர்ப்பிணி பெண்களுக்கு ரூ.18 ஆயிரம் என சிறப்பான திட்டங்களை முதல்வர் வழங்கி வருகிறார்.

இவ்வாறு டாக்டர் வி.பி.பி.பரமசிவம் எம்.எல்.ஏ பேசினார்.