சிறப்பு செய்திகள்

திண்டுக்கல், மதுரை மாவட்ட முதல்போக பாசனத்திற்காக வைகை அணையிலிருந்து தண்ணீரை துணை முதலமைச்சர் திறந்து விட்டார்

தேனி

திண்டுக்கல், மதுரை மாவட்ட முதல் போக பாசனத்திற்காக தேனி மாவட்டம் வைகை அணையிலிருந்து தண்ணீரை துணை முதலமைச்சர் ஓ.பன்னீர்செல்வம் திறந்து விட்டார்.

துணை முதலமைச்சர் ஓ.பன்னீர்செல்வம்  கூட்டுறவுத்துறை அமைச்சர் செல்லூர் கே.ராஜூ, வருவாய் மற்றும் பேரிடர் மேலாண்மைத்துறை மற்றும் தகவல் தொழில்நுட்பவியல் துறை அமைச்சர் ஆர்.பி.உதயகுமார் ஆகியோர் முன்னிலையில், தேனி மாவட்ட ஆட்சித்தலைவர் ம.பல்லவி பல்தேவ் மற்றும் மதுரை மாவட்ட ஆட்சித்தலைவர் மரு.டி.ஜி.வினய் ஆகியோர் தலைமையில் திண்டுக்கல் மற்றும் மதுரை மாவட்ட முதல் போக பாசனத்திற்காக வைகை அணையிலிருந்து தண்ணீரை திறந்து விட்டார்.

பின்னர் துணை முதலமைச்சர் ஓ.பன்னீர்செல்வம் தெரிவித்ததாவது:-

தமிழக அரசு, பெரியாறு பிரதானக் கால்வாய் பாசனப் பகுதியின் கீழ் உள்ள இருபோக பாசன பகுதியில் முதல் போக பாசன நிலங்களுக்கு வைகை அணையிலிருந்து தண்ணீர் திறந்துவிட வேண்டும் என்ற வேளாண் பெருங்குடி மக்களின் கோரிக்கையினை ஏற்று, பெரியாறு பிரதானக் கால்வாய் பாசனப் பகுதியின் கீழ் உள்ள இருபோக பாசன பகுதியில் முதல் போக பாசன பரப்பான 45,041 ஏக்கர் நிலங்களுக்கு வினாடிக்கு 900 கனஅடி வீதம், 45 நாட்களுக்கு முழுமையாகவும், அடுத்த 75 நாட்களுக்கு முறை வைத்தும் ஆக மொத்தம் 120 நாட்களுக்கு நேற்று முதல் திறந்து விட உத்தரவிட்டுள்ளது.

அதனடிப்படையில், வைகை அணையிலிருந்து திறந்து விடப்படும் தண்ணீர் வாயிலாக திண்டுக்கல் மாவட்டம், நிலக்கோட்டை வட்டத்திற்குட்பட்ட 1,797 ஏக்கர் நிலங்களும், மதுரை மாவட்டம், வாடிப்பட்டி வட்டத்திற்குட்பட்ட 16,452 ஏக்கர் நிலங்களும், மதுரை மாவட்டம், வடக்கு வட்டத்திற்குட்பட்ட 26,792 ஏக்கர் நிலங்களும் என மொத்தம் 45,041 ஏக்கர் நிலங்கள் பாசன வசதி பெறும்.

மேலும், கடந்த 13.08.2020 அன்று பெரியாறு அணையிலிருந்து தேனி மாவட்டம் கம்பம் பள்ளத்தாக்கு ஆயக்கட்டு பகுதிகளில் முதல் போக சாகுபடிக்கு 14,707 ஏக்கர் நிலங்களுக்கு வினாடிக்கு 200 கன அடியும், தேனி மாவட்ட குடிநீர் தேவைக்கு 100 கன அடியும் ஆக மொத்தம் வினாடிக்கு 300 கன அடி வீதம் தண்ணீர் திறந்து விடப்பட்டுள்ளது. எனவே, விவசாயப் பெருங்குடி மக்கள் நீரை சிக்கனமாக பயன்படுத்தி, நீர் மேலாண்மை மேற்கொண்டு உயர் மகசூல் பெற்று பயனடைய வேண்டும்.

இவ்வாறு துணை முதலமைச்சர் ஓ.பன்னீர்செல்வம் தெரிவித்தார்.