தற்போதைய செய்திகள்

ஈரோடு பவானி ஆற்றின் குறுக்கே தடுப்பணை கட்டும் பணி விறுவிறுப்பு-முன்னாள் அமைச்சர் கே.ஏ.செங்கோட்டைன் ஆய்வு

ஈரோடு,

ஈரோடு பவானி ஆற்றின் குறுக்கே புதிய தடுப்பணை கட்டும் பணி விறுவிறுப்பாக நடைபெற்று வருகிறது. இப்பணிகளை முன்னாள் அமைச்சர் கே.ஏ.செங்கோட்டையன் எம்.எல்.ஏ நேரில் பார்வையிட்டு ஆய்வு செய்தார்.

ஈரோடு மாவட்டம் பவானிசாகர் அணையிலிருந்து திறக்கப்படும் தண்ணீர் கொடிவேரி அணையில் தேக்கி வைக்கப்பட்டு தடப்பள்ளி மற்றும் அரக்கன்கோட்டை பாசன பகுதிகளுக்கு திறந்து விடப்படும். இந்த தடுப்பணையை போல அம்மா ஆட்சியில் ரூ.81 கோடி செலவில் ஆலத்து கோம்பை, பேய் அணை, வாணிப்புத்தூர், ஜம்பை உள்ளிட்ட 7 இடங்களில் தடுப்பணைகள் கட்ட நிதி ஒதுக்கீடு செய்து அதற்கான பணிகள் துவங்கி நடைபெற்று வருகிறது.

இந்த நிலையில் காசிபாளையம் வழியாக செல்லும் பவானி ஆற்றின் குறுக்கே பேய் அணையில் ரூ.15 கோடியே 40 லட்சம் மதிப்பீட்டில் புதிய தடுப்பணை கட்டப்படும் பணிகள் முழு வீச்சில் நடைபெற்று வருகிறது. இந்த பணிகளை ஈரோடு புறநகர் மேற்கு மாவட்ட கழக செயலாளரும், முன்னாள் அமைச்சருமான கே.ஏ.செங்கோட்டையன் எம்.எல்.ஏ நேரில் சென்று ஆய்வு செய்து அதிகாரிகளுடன் ஆலோசனை மேற்கொண்டார்.

மேலும் இந்த பணிகளை விரைவில் முடித்து விவசாயிகளுக்கு தண்ணீர் வழங்க அதிகாரிகளுக்கு ஆலோசனைகளை வழங்கினார். இந்த தடுப்பணை கட்டப்படுவதன் மூலம் அரக்கன்கோட்டை பாசன பகுதிகளில் நிலத்தடி நீர்மட்டம் உயரும் என்பதால் அரக்கன்கோட்டை பாசன விவசாயிகள் மகிழ்ச்சி அடைந்துள்ளனர்.

இந்த ஆய்வின்போது ஆவின் தலைவர் கே.கே.காளியப்பன், முன்னாள் நாடாளுமன்ற உறுப்பினர் வி.சத்தியபாமா, நம்பியூர் ஒன்றிய செயலாளர் தம்பி (எ) கே.ஏ.சுப்பிரமணியம், சசி பிரபு, முன்னாள் மாவட்ட மாணவர் அணி செயலாளர் பிரினியோ கணேஷ், ஒன்றிய கழக அவைத்தலைவர் வாத்தியார் வேலுச்சாமி, காசிபாளையம் பேரூராட்சி செயலாளர் மணி (எ) சந்திரசேகரன் மற்றும் பலர் உடனிருந்தனர்.