தற்போதைய செய்திகள்

ரூ.29.93 லட்சத்தில் பாதுகாக்கப்பட்ட குடிநீர் இணைப்பு திட்டம் – அமைச்சர் ஆர்.காமராஜ் தொடங்கி வைத்தார்

திருவாரூர்

திருவாரூர் மாவட்டம், குடவாசல் ஒன்றியம், மஞ்சக்குடி ஊராட்சியில் ஜல்ஜீவன் மிஷன் திட்டத்தின் கீழ் அனைத்து வீடுகளுக்கும் பாதுகாக்கப்பட்ட குடிநீர் இணைப்பு வழங்கும் திட்டத்தை அமைச்சர் ஆர்.காமராஜ் தொடங்கி வைத்தார்.

திருவாரூர் மாவட்டம், குடவாசல் ஒன்றியம், மஞ்சக்குடி ஊராட்சியில் ஜல் ஜீவன் மிஷன் திட்டத்தின் கீழ் அனைத்து வீடுகளுக்கும் ரூ.29.93 லட்சம் மதிப்பீட்டில் பாதுகாக்கப்பட்ட குடிநீர் இணைப்பு வழங்கும் திட்டத்தை உணவுத்துறை அமைச்சர் ஆர்.காமராஜ் தொடங்கி வைத்தார். இந்நிகழ்ச்சிக்கு திருவாரூர் மாவட்ட ஆட்சித்தலைவர் த.ஆனந்த் தலைமை வகித்தார்.

பின்னர் அமைச்சர் ஆர்.காமராஜ் செய்தியாளர்களிடம் தெரிவித்ததாவது:-

நீர் மேலாண்மையில் உலகுக்கே வழிகாட்டும் விதமாக கட்டாய மழைநீர் சேகரிப்பு திட்டத்தை தந்த புரட்சித்தலைவி அம்மா அவர்களின் நல்ஆசியோடு நல்லாட்சி புரிந்து வருகின்ற முதல்வர் நீர்வளத்தை பெருக்கி, சேமித்து திறம்பட பயன்படுத்து வதற்கான பல்வேறு திட்டம் மற்றும் பணிகளை செயல்படுத்தி நீர் பங்கீட்டினை கடைநிலை வரை கொண்டு செல்வதற்கும் பல்வேறு நடவடிக்கைகளை சிறப்பாக மேற்கொண்டு வருகிறார்.

தமிழக முதல்வராக எடப்பாடி கே.பழனிசாமி பொறுப்பேற்ற பின்னர் கடந்த மூன்று ஆண்டுகளில் 6 முறை இம்மாவட்டத்தினுடைய வளர்ச்சி பணிகளை பார்வையிடுதல் உள்ளிட்ட பல்வேறு நிகழ்வுகளுக்காக இம்மாவட்டத்திற்கு வருகை தந்துள்ளார். அப்பொழுது, முதல்வர் திருவாரூர் மக்களின் தேவைகளை கோரிக்கைகளாக வைக்கும் பட்சத்தில், அந்த கோரிக்கைகள் விவசாயம் சார்ந்த கோரிக்கைகள் அல்லது எந்த வித துறை சார்ந்த கோரிக்கையாக இருந்தாலும் அந்த கோரிக்கைகளை ஏற்று தொடர்ந்து நிறைவேற்றி தந்துள்ளார்.

அந்தவகையில் வளர்ச்சிப்பணிகள் குறித்து ஆய்வு செய்யவும், முடிவுற்ற பணிகளை திறந்து வைக்கவும், புதிதாக தொடங்கவுள்ள பணிகளுக்கு அடிக்கல் நாட்டவும் மற்றும் பயனாளிகளுக்கு நலத்திட்ட உதவிகள் வழங்கவும் இம்முறை திருவாரூர் மாவட்டத்திற்கு வருகைதந்த போது நீர் மேலாண்மையை வளப்படுத்தும் வகையில் காவிரி உப வடிநிலப்பகுதி யிலுள்ள பாசன அமைப்புகளை விரிவுப்படுத்துதல், புனரமைத்தல் மற்றும் நவீனப்படுத்துதலாக ரூ.3 ஆயிரம் கோடிக்கு மேலான மதிப்பீட்டில் நீர் மேலாண்மை சார்ந்த திட்டங்கள் செயல்படுத்தப்படும். மேலும், திருவாரூர் மாவட்டத்தில் ரூ.10கோடி மதிப்பீட்டில் உணவு பூங்கா ஒன்று தோற்றுவிக்கப்படும் எனவும் அறிவித்துள்ளார்.

திருவாரூர் மாவட்டத்தை பொறுத்தவரையில் வேளாண்மைத்துறை தான் பிரதான தொழிலாக உள்ளது. வேறு எந்த தொழிலும் பிரதான தொழிலாக இல்லை. எனவே, விவசாயிகள் மற்றும் இம்மாவட்ட மக்களின் கோரிக்கையினை ஏற்று விவசாயிகள் உற்பத்தி செய்கின்ற விளைபொருட்களை கொண்டு ஒரு புதிய தொழில் இந்த மாவட்டத்தில் தொடங்குவதற்கு அரசு முயற்சிக்கும் என முதல்வர் அறிவித்துள்ளார். இம்மாவட்ட மக்களின் கோரிக்கையினை ஏற்று மாவட்ட வளர்ச்சிக்காக, பல்வேறு அறிவிப்புகளை தந்த முதலமைச்சருக்கு இம்மாவட்ட மக்களின் சார்பாக நன்றியினை தெரிவித்து கொள்கிறேன்.

இவ்வாறு அமைச்சர் ஆர்.காமராஜ் தெரிவித்தார்.

இந்நிகழ்வில் கூடுதல் ஆட்சியர் ஏ.கே.கமல்கிஷோர், வருவாய் கோட்டாட்சியர் ஜெயபீரித்தா, மாவட்ட ஊராட்சி உறுப்பினர் பாப்பா சுப்ரமணியன், ஒன்றியக்குழு தலைவர் கிளாரா செந்தில், ஒன்றியக்குழு துணைத்தலைவர் தென்கோவன், கல்வி புரவலர் தினகரன், முன்னாள் ஒன்றியக்குழு துணைத்தலைவர் எஸ்.ராஜேந்திரன், குடவாசல் தொடக்க வேளாண்மை கூட்டுறவு வங்கித்தலைவர் சுவாமிநாதன், வட்டார வளர்ச்சி அலுவலர் ஆர்.சுப்ரமணியன், ஊராட்சி மன்றத்தலைவர் வனிதா கண்ணதாசன் மற்றும் அரசு அலுவலர்கள், உள்ளாட்சி அமைப்பின் பிரதிநிதிகள் கலந்து கொண்டனர்.