தற்போதைய செய்திகள்

பொதுமக்களின் உரிமை குரலாக கழகத்தின் குரல் ஓங்கி ஒலிக்கும்-அக்ரி எஸ்.எஸ்.கிருஷ்ணமூர்த்தி திட்டவட்டம்

திருவண்ணாமலை

வாக்குறுதியை நிறைவேற்றாத தி.மு.க. அரசை கண்டித்து வரும் 28-ந்தேதி நடைபெறும் போராட்டத்தின்போது பொதுமக்களின் உரிமை குரலாக கழகத்தின் குரல் ஓங்கி ஒலிக்கும் என்று முன்னாள் அமைச்சர் அக்ரி எஸ்.எஸ்.கிருஷ்ணமூர்த்தி கூறினார்.

வாக்குறுதிகளை நிறைவேற்றாத தி.மு.க. அரசை கண்டித்து வருகிற 28-ந்தேதி உரிமைக்குரல் முழக்கப்போராட்டம் நடத்துவது குறித்து திருவண்ணாமலை தெற்கு மாவட்ட கழக அலுவலகத்தில் மாவட்ட கழக நிர்வாகிகளுடன் மாவட்ட கழக செயலாளரும், முன்னாள் அமைச்சரும், சட்டமன்ற பேரவை மதிப்பீட்டுக் குழு உறுப்பினரும், போளூர் தொகுதி சட்டமன்ற உறுப்பினருான அக்ரி எஸ்.எஸ்.கிருஷ்ணமூர்த்தி ஆலோசனை நடத்தினார். இக்கூட்டத்தில் அவர் பேசியதாவது:-

வாக்குறுதிகளை நிறைவேற்றாத தி.மு.க. அரசை கண்டித்து வருகிற 28-ந்தேதி தமிழகம் முழுவதும் கழகத்தின் சார்பில் உரிமைக்குரல் முழக்கப் போராட்டம் நடைபெறும் என்று கழக ஒருங்கிணைப்பாளர்கள் அறிவித்துள்ளனர்.

அதன்படி வாக்குறுதிகளை நிறைவேற்ற தவறிய தி.மு.க. அரசை கண்டித்து மாவட்டத்தின் அனைத்து நகரங்கள், கிராமங்களில் பதாகையை ஏந்தி நாம் உரிமை குரல் எழுப்ப வேண்டும். மக்களின் கவனங்களை ஈர்க்கும் வகையிலும், ஆளுவோரின் செவிப்பறையைசென்று சேரும் வகையிலும் ஓங்கி ஒலிக்க வேண்டும்.

திருவண்ணாமலைதெற்கு மாவட்ட கழகத்திற்குட்பட்ட நகராட்சி, பேரூராட்சி, கிராமங்களில் மாவட்ட சார்பு அணி நிர்வாகிகள், ஒன்றிய, நகர, பேரூர், நிர்வாகிகள் மற்றும் தொண்டர்கள் தங்களது இல்லத்தின் முன்பாக பதாகைகளை ஏந்தி கவனஈர்ப்பு முழக்கங்களை எழுப்பி தமிழ்நாட்டு மக்களின் உரிமை குரலாய் ஒலிக்க வேண்டும்.

இவ்வாறு முன்னாள் அமைச்சரும், திருவண்ணாமலை தெற்கு மாவட்ட கழக செயலாளரும், போளூர் தொகுதி சட்டமன்ற உறுப்பினருமான அக்ரி எஸ்.எஸ். கிருஷ்ணமூர்த்தி பேசினார்.