தற்போதைய செய்திகள்

அம்மா அரசின் சாதனைகளை மக்களிடம் எடுத்து செல்ல வேண்டும் – கே.வி.இராமலிங்கம் வேண்டுகோள்

ஈரோடு

புரட்சித்தலைவி அம்மா அரசின் சாதனைகளையும், திட்டங்களையும் இளைஞர் இளம்பெண்கள் பாசறையினர் பொதுமக்களிடம் எடுத்து செல்ல வேண்டும் என்று ஈரோடு மாநகர் மாவட்ட கழக செயலாளர் கே.வி.இராமலிங்கம் எம்.எல்.ஏ பேசினார்.

ஈரோடு மாநகர் மாவட்டம் ஈரோடு மேற்கு தொகுதி ஈரோடு ஒன்றியம் சித்தோடு பேரூராட்சியில் இளைஞர், இளம் பெண்கள் பாசறையினருக்கான ஆலோசனை கூட்டம் நடைபெற்றது. ஈரோடு மாநகர் மாவட்ட கழக செயலாளர் கே.வி.இராமலிங்கம் எம்.எல்.ஏ தலைமை தாங்கினார். சட்டமன்ற அவைக்குழு தலைவர் கே.எஸ்.தென்னரசு எம்.எல்.ஏ முன்னிலை வகித்தார்.

பின்னர் கே.வி.இராமலிங்கம் எம்.எல்.ஏ. கூறியதாவது:- 

மண்ணை விட்டு மறைந்தாலும் மக்கள் மனதில் என்றென்றும் வாழ்ந்து வரும் புரட்சித்தலைவி அம்மாவின் வழியில் முதலமைச்சர் எடப்பாடி கே.பழனிசாமி, துணை முதலமைச்சர் ஓ.பன்னீர்செல்வம் ஆகியோர் நல்லாட்சி நடத்தி வருகிறார்கள். புரட்சித்தலைவி அம்மா அவர்கள் 2008ம் ஆண்டு மார்ச் 7-ந்தேதி இளைஞர் மற்றும் இளம்பெண்கள் பாசறையை துவக்கினார். கழகத்தில் ஏராளமான இளம்பெண்களும், இளைஞர்களும் உறுப்பினராக இணைந்தனர்.

இளைஞர் இளம்பெண்கள் பாசறையினர் கடினமாக உழைத்தனர். அம்மாவின் ஆட்சியின் சாதனைகளை பொது மக்களிடம் எடுத்து சென்றனர். கழகம் 2011, 2016-ல் மாபெரும் வெற்றிபெற்றது. இளைஞர் மற்றும் இளம்பெண்கள் பாசறையினர் திமுகவின் அராஜகங்களையும், அம்மா வழியில் நடைபெறும் நல்லாட்சியில் நடைபெறும் நலத்திட்டங்களையும், அரசின் சாதனைகளையும் வீடு வீடாக எடுத்து செல்ல வேண்டும். 2021ம் ஆண்டிலும் கழக அரசு மீண்டும் மாபெரும் வெற்றிபெற உழைக்க வேண்டும்.

ஆண்டுதோறும் பாசறை உருவான தினமான மார்ச் 7-ம்தேதி கழகத்தின் சார்பில் தமிழகம் முழுவதும் மாபெரும் பொதுக் கூட்டங்கள் நடத்தப்பட்டு வருகிறது. நாடாளுமன்ற தேர்தலில் திமுகவினர் பொய்யான வாக்குறுதிகளை கூறி மக்களை ஏமாற்றினர். வருகின்ற தேர்தலில் திமுகவிற்கு மக்கள் தகுந்த பாடம் புகட்டுவார்கள்.

இவ்வாறு கே.வி.இராமலிங்கம் எம்.எல்.ஏ. பேசினார்.