தற்போதைய செய்திகள்

எண்ணேகொல்புதூர்-தும்பலஹள்ளி அணை நீர்த்தேக்க திட்டம் விரைவில் நிறைவேறும் – அமைச்சர் கே.பி.அன்பழகன் உறுதி

தருமபுரி

தருமபுரி மாவட்டம் எண்ணேகொல்புதூர்-தும்பலஹள்ளி அணை நீர்த்தேக்க திட்டம் விரைவில் நிறைவேறும் என்று அமைச்சர் கே.பி.அன்பழகன் தெரிவித்தார்.

தருமபுரி மாவட்டம் காரிமங்கலம் கிழக்கு ஒன்றியம் கோவிலூர் ஊராட்சிக்குட்பட்ட பூனாத்தனஹள்ளி, புதூர், கோவிலூர், சென்றாயனஹள்ளி, மோட்டூர், தொன்னையன்கொட்டாய், மொளப்பனஹள்ளி, திப்பம்பட்டி, தளிக்கானூர், குய்யாலங்கொட்டாய், நேதாஜி நகர், மோளிக்கொல்லை கிராமங்களிலிருந்து 500-க்கும் மேற்பட்டோர் மாற்றுக்கட்சிகளில் இருந்து விலகி தருமபுரி மாவட்ட கழக செயலாளரும், உயர்கல்வி மற்றும் வேளாண்மை துறை அமைச்சருமான கே.பி.அன்பழகன் முன்னிலையில் கழகத்தில் இணைந்தனர். கழகத்தில் இணைந்தவர்களுக்கு வேட்டி சேலை துண்டு ஆகியவைகளை அணிவித்து அமைச்சர் வரவேற்றார்.

பின்னர் அமைச்சர் கே.பி.அன்பழகன் பேசியதாவது:-

காரிமங்கலம் கிழக்கு ஒன்றியத்துக்கு உட்பட்ட கோவிலூர் ஊராட்சி கழகத்தின் கோட்டை ஆகும். அம்மா அவர்களால் கொண்டு வரப்பட்ட திட்டங்கள் அண்டை மாநிலங்களான கேரளா, கர்நாடகா, தெலுங்கானா, ஆந்திரா உள்ளிட்ட மாநிலங்களில் எங்குமே இல்லை.

நான்கு லட்சத்து 80 ஆயிரம் பேர் அரசு பள்ளிகளில் பிளஸ் 2 படித்தார்கள். அப்படி படிக்கின்ற காலகட்டத்தில் மருத்துவ படிப்புக்கு சேர்ந்தவர்கள் வெறும் 6 பேர் மட்டுமே. 7.5 சதவீத ஒதுக்கீட்டை நிறைவேற்றி இன்றைக்கு அரசு பள்ளியில் படித்த 413 மாணவ,மாணவிகள் டாக்டர்களாக உருவாக்கக்கூடிய சூழ்நிலையை உருவாக்கித் தந்தவர் முதலமைச்சர் எடப்பாடியார் ஆவார். தர்மபுரி மாவட்டத்தில் மட்டும் 21 பேர் மருத்துவப் படிப்புக்கு தேர்வு செய்யப்பட்டு உள்ளனர். கிராம பகுதியில் உள்ள மக்களின் வாழ்வாதாரத்தை உயர்த்தும் என்ற எண்ணத்தோடு தமிழ்நாடு முதலமைச்சர் அவர்கள் இருக்கின்றார். அவருடைய அத்தனை திட்டங்களும் ஏழை எளியோரை மேற்கொண்டு வருகின்ற திட்டமாகும்.

நலத்திட்டங்கள் வழங்குவதில் தமிழகம் சிறந்து விளங்குகிறது.இந்தியாவில் இருக்கின்ற மாநிலங்களுக்கு தமிழகம் முன்னோடி மாநிலமாக திகழ்கிறது. நீண்ட நெடிய நாட்களாக நாம் போராடிக் கொண்டிருக்கிறோம். திமுகவினர் இதுவரை எந்த திட்டங்களையும் மாவட்டத்துக்கு செய்யவில்லை. ஆனால் குறை மட்டும் கூறுவார்கள். நமது முதலமைச்சர் அவர்களின் முயற்சியால் கூடிய விரைவில் எண்ணேகொல் புதூரிலிருந்து துப்பலஹள்ளி அணைக்கட்டிற்கு தண்ணீர் கொண்டு வரும் திட்டம் நிறைவேறும்.

கூடுதல் பணம் கொடுப்பதாக கூறிய உடன் விவசாய நிலத்தை கொடுப்பதற்கு மாவட்ட விவசாயிகள் முன்வந்திருக் கிறார்கள். அதனால் நிலம் கையகப்படுத்தும் பணி தொடங்கி விட்டது. எதை எதையெல்லாம் செய்ய வேண்டும் என்று திட்டத்தை நிறைவேற்ற வேண்டும் என்று நாம் பார்த்து பார்த்து செய்து கொண்டிருக்கிறோம். ஒரு சிலர் திட்டத்திற்கு மக்கள் ஒத்துழைப்பு தர வேண்டும்.

இவ்வாறு அமைச்சர் கே.பி.அன்பழகன் பேசினார்.

இந்நிகழ்ச்சியில் பாப்பிரெட்டிப்பட்டி தொகுதி சட்டமன்ற தொகுதி உறுப்பினர் ஏ.கோவிந்தசாமி, அரூர் தொகுதி சட்டமன்றத் தொகுதி உறுப்பினர் வே.சம்பத்குமார், காரிமங்கலம் கிழக்கு ஒன்றிய செயலாளர் செந்தில்குமார், ஒன்றிய மாணவரணி செயலாளர் ரவிஷங்கர், மாவட்ட மத்திய கூட்டுறவு வங்கி இயக்குனர் என்.ஜி.எஸ்.சிவப்பிரகாசம், மாவட்ட ஊராட்சி குழு உறுப்பினர் காவேரி, கூட்டுறவு சங்கத் தலைவர் சந்திரன், ஒன்றிய குழு தலைவர் சாந்தி பெரியண்ணன், ஒன்றியக்குழு உறுப்பினர் கணபதி, மாவட்ட தகவல் தொழில்நுட்ப பிரிவு துணை செயலாளர் சாந்தகுமார் உள்ளிட்ட ஏராளமானோர் கலந்து கொண்டனர்.