கன்னியாகுமரி

யானைகள் தாக்கியதில் தந்தை- மகள் படுகாயம்-என்.தளவாய்சுந்தரம் எம்.எல்.ஏ. ஆறுதல்

கன்னியாகுமரி

கன்னியாகுமரி அருகே யானைகள் தாக்கியதில் தந்தை, மகள் படுகாயம் அடைந்தனர். அவர்களை என்.தளவாய்சுந்தரம் எம்.எல்.ஏ. சந்தித்து ஆறுதல் கூறினார்.

கன்னியாகுமரி மாவட்டம் கீரிப்பாறை வாளையத்து வயல் பகுதியை சேர்ந்தவர் மணிகண்டன் (வயது 52). இவர் கீரிப்பாறை அருகே மாறாமலை எஸ்டேட் பகுதியில் டீக்கடை நடத்தி வருகிறார். இவரது மகள் ஸ்ரீணா (வயது 20). கோவையில் உள்ள வேளாண் கல்லூரியில் இரண்டாம் ஆண்டு படித்து வருகிறார்.

இவர் தற்போது சொந்த ஊருக்கு வந்துள்ளார். கடந்த 20-ந்தேதி காலை 7 மணிக்கு மணிகண்டன் வழக்கம் போல டீக்கடையை திறப்பதற்காக மோட்டார் சைக்கிளில் புறப்பட்டு சென்றார். அவருடன் கோயிலுக்கு செல்வதற்காக மகள் ஸ்ரீணாவும் சென்றார். அப்போது வழியில் 3 காட்டு யானைகள் நின்று கொண்டிருந்தன.

இதனைப் பார்த்த மணிகண்டன் உடனடியாக மோட்டார் சைக்கிளை திருப்ப முயன்றார். அதற்குள் யானை மோட்டார் சைக்கிளை காலால் மிதித்து தள்ளியது. இதனால் தந்தையும், மகளும் கீழே விழுந்தனர்.

ஒரு யானை ஸ்ரீணாவை காலால் மிதித்தது. இதில் அவர் படுகாயமடைந்தார். இதேபோன்று கீழே விழுந்த மணிகண்டனுக்கு இடது காலில் முறிவு ஏற்பட்டது. இவர்களின் அலறல் சத்தம் கேட்டு அக்கம், பக்கத்தில் உள்ளவர்கள் ஓடிவந்து கூச்சலிட்டு யானைகளை துரத்தினர். இதனால் யானைகள் அங்கிருந்து சென்று விட்டன.

இதனைத்தொடர்ந்து படுகாயமடைந்த தந்தை மற்றும் மகளை பொதுமக்கள் மீட்டு நாகர்கோவிலில் உள்ள தனியார் மருத்துவமனையில் அனுமதித்தனர். தற்போது மாணவிக்கு தீவிர சிகிச்சை பிரிவில் சிகிச்சை அளிக்கப்பட்டு வருகிறது. இவருடைய தந்தை மணிகண்டனுக்கு இடது காலில் அறுவை சிகிச்சை செய்யப்பட்டுள்ளது.

இது பற்றி கேள்விப்பட்ட கன்னியாகுமரி தொகுதி சட்டமன்ற உறுப்பினர் என்.தளவாய்சுந்தரம் மருத்துவமனைக்கு நேரில் சென்று யானைகள் தாக்கி காயமடைந்த தந்தை, மகள் இருவரையும் சந்தித்து ஆறுதல் கூறினார்.

பின்னர் இது பற்றி என்.தளவாய்சுந்தரம் எம்.எல்.ஏ. கூறுகையில், கீரிப்பாறை மற்றும் அதன் சுற்று வட்டார பகுதிகளில் அடிக்கடி இதுபோன்ற சம்பவங்கள் ஏற்பட்டு பொதுமக்கள் பாதிக்கப்பட்டு வருகிறார்கள். இதனை தடுத்து மக்களை பாதுகாப்பதற்கு நிரந்தர தீர்வு காண அரசு உரிய நடவடிக்கை எடுக்க வேண்டும் என்று தெரிவித்தார்.

இந்நிகழ்வின்போது தோவாளை ஊராட்சி ஒன்றியக்குழு பெருந்தலைவர் சாந்தினி பகவதியப்பன், தோவாளை வடக்கு ஒன்றிய கழக செயலாளர் பொன்.சுந்தர்நாத், நாகர்கோவில் நகர செயலாளர் சந்துரு ஆகியோர் உடனிருந்தனர்.