அரியலூர்

2447 களப்பணியாளர்களுக்கு கொரோனா தடுப்பு உபகரணங்கள் – அரசு தலைமைக்கொறடா தாமரை எஸ்.இராஜேந்திரன் வழங்கினார்

அரியலூர்

அரியலூர் மாவட்டத்தில் 201 ஊராட்சிகளை சேர்ந்த 2447 களப்பணியாளர்களுக்கு கொரோனா தடுப்பு உபகரணங்களை அரசு தலைமைக்கொறடா தாமரை.எஸ்.இராஜேந்திரன் வழங்கினார்.

அரியலூர் மாவட்ட ஆட்சியர் அலுவலக வளாகத்தில் ஊரக வளர்ச்சி மற்றும் ஊராட்சித்துறை சார்பில் ஊராட்சி ஒன்றியங்களைச் சேர்ந்த மேல்நிலை குடிநீர்தொட்டி இயக்குபவர், தூய்மை பணியாளர் மற்றும் தூய்மை காவலர் என 2447 களப்பணியாளர்களுக்கு கொரோனா தடுப்பு உபகரணங்கள் வழங்கும் நிகழ்ச்சி அரசு தலைமைக்கொறடா தாமரை எஸ்.இராஜேந்திரன் தலைமையில், மாவட்ட ஆட்சித்தலைவர் த.ரத்னா முன்னிலையில் நேற்று நடைபெற்றது.

இந்நிகழ்ச்சியில் அரசு தலைமைக்கொறடா தாமரை.எஸ்.இராஜேந்திரன் தெரிவித்ததாவது:-

முதலமைச்சர் ஆணையின்படி, அரியலூர் மாவட்டத்தில் கொரோனா தடுப்பு நடவடிக்கைகள் போர்க்கால அடிப்படையில் மேற்கொள்ளப்பட்டு வருகின்றன. அதன் அடிப்படையில், மாவட்ட நிர்வாகத்தின் மூலம் கொரோனா வைரஸ் தடுப்பு நடைவடிக்கைகள் மற்றும் விழிப்புணர்வு நிகழ்வுகள் தீவிரமாக மேற்கொள்ளப்பட்டு வருகிறது.

அதன்படி அரியலூர் மாவட்டம் முழுவதும் பொதுமக்கள் அதிகம் கூடும் இடங்களான பேருந்து நிலையங்கள், கடைவீதி, மருத்துவமனைகள் உள்ளிட்ட இடங்களில் கிருமி நாசினி தெளிக்கும் பணிகள் முழு வீச்சில் நடைபெற்று வருகிறது.

மேலும், சமூக இடைவெளியினை கடைபிடிக்க விழிப்புணர்வு நிகழ்வுகளும் நடத்தப்பட்டு, வீடு, வீடாக பணியாளர்கள் மூலம் துண்டு பிரசுரங்கள் வழங்கி, பொதுமக்கள் சமூக இடைவெளியினை கடைபிடிப்பது பற்றியும், நோய் தொற்று பரவா வண்ணம் விழிப்புணர்வு ஏற்படுத்தப்பட்டு வருகிறது.

மேலும், கொரோனா தடுப்பு நடவடிக்கைகளில் ஈடுபட்டு வரும் 201 ஊராட்சிகளை சேர்ந்த 921 மேல்நிலை குடிநீர் தொட்டி இயக்குபவர்களுக்கும், 408 தூய்மை பணியாளர்களுக்கும், 1118 தூய்மை காவலர்களுக்கும் என மொத்தம் 2447 களப்பணியாளர்களுக்கு கொரோனா தொற்றிலிருந்து பாதுகாத்திடும் வகையில் கொரோனா வைரஸ் தடுப்பு உபகரணங்கள் வழங்கப்படுகின்றன. இப்பாதுகாப்பு பெட்டகத்தில் மூன்றடுக்கு முககவசம், கண்ணாடி தடுப்பு முககவசம், கையுறைகள், கோவிட் சாவி, சானிடைசர் உள்ளிட்ட 15 பாதுகாப்பு உபகரணங்கள் இடம் பெற்றுள்ளன.

இவ்வாறு அரசு தலைமைக்கொறடா தாமரை எஸ்.இராஜேந்திரன் தெரிவித்தார்.

அதனைத்தொடர்ந்து, அரியலூர் மாவட்டம், ஆலந்துறையார் கட்டளை மதுரா, பனங்கூர் கிராமத்தைச் சேர்ந்த கலியபெருமாள் என்பவர் 23.12.2019 அன்று சாலை விபத்தில் உயிரிழந்தமைக்காக அவரது வாரிசுதாரரான லலிதா, என்பவருக்கு முதலமைச்சர் பொது நிவாரண நிதியிலிருந்து வழங்கப்பட்ட நிதியுதவித்தொகை ரூ.1,00,000க்கான காசோலையை அரசு தலைமைக்கொறடா தாமரை எஸ்.இராஜேந்திரன் வழங்கினார்.

இந்நிகழ்ச்சியில், மாவட்ட வருவாய் அலுவலர் இரா.ஜெய்னூலாப்தீன், கோட்டாட்சியர் கண்மணி, ஊராட்சி ஒன்றியக்குழுத்தலைவர் செந்தமிழ்செல்வி, மாவட்ட ஆட்சியரின் நேர்முக உதவியாளர் (பொது) ரவிச்சந்திரன், உதவி இயக்குநர் (ஊராட்சிகள்) பழனிசாமி மற்றும் அலுவலர்கள் உட்பட பலர் கலந்து கொண்டனர்.