தற்போதைய செய்திகள்

அசைக்க முடியாத மாபெரும் மக்கள் சக்தியாக கழகம் மாறும் – மாவட்ட செயலாளர் வி.வி.ராஜன்செல்லப்பா உறுதி

மதுரை

வரும் சட்டமன்ற தேர்தலில் தி.மு.க.வை வீழ்த்தி கழகம் வெற்றிபெற்று மாபெரும் மக்கள் சக்தியாக மாறும் என்று மதுரை புறநகர் கிழக்கு மாவட்ட கழக செயலாளர் வி.வி.ராஜன்செல்லப்பா எம்.எல்.ஏ. கூறினார்.

மதுரை புறநகர் கிழக்கு மாவட்டம் அவனியாபுரம் கிழக்கு பகுதி கழகம் சார்பில் அவனியாபுரத்தில் 49அடி உயர கம்பத்தில் கழக கொடியேற்று விழா நடைபெற்றது. விழாவுக்கு பகுதி கழக செயலாளர் முருகேசன் தலைமை தாங்கினார். மாவட்ட இளைஞரணி செயலாளர் வக்கீல் ரமேஷ், திருப்பரங்குன்றம் ஒன்றிய கழக செயலாளர் நிலையூர் முருகன், மாவட்ட கழக துணை செயலாளர் முத்துக்குமார் ஆகியோர் முன்னிலை வகித்தனர். அவனியாபுரம் மேற்கு பகுதி கழக செயலாளர் கருணா வரவேற்றார்.

இந்நிகழ்ச்சியில் மதுரை புறநகர் கிழக்கு மாவட்ட கழக செயலாளர் வி.வி.ராஜன் செல்லப்பா எம்.எல்.ஏ. கலந்து கொண்டு கழக கொடியை ஏற்றி வைத்து பேசியதாவது:- 

புரட்சித்தலைவர் எம்.ஜி.ஆர் 1972-ல் அனைத்திந்திய அண்ணா திராவிட முன்னேற்றக் கழகத்தை ஆரம்பித்தார். இதனைத்தொடர்ந்து அவர் முதலமைச்சராகி 11 ஆண்டுகாலம் பொற்கால ஆட்சியை நடத்தினார். அதனைத் தொடர்ந்து புரட்சித்தலைவர் வழியில் புரட்சித்தலைவி அம்மா அவர்கள் புனித ஆட்சி நடத்தினார்.

தற்போது புரட்சித்தலைவி அமம்ா அவர்களின் வழியில் முதலமைச்சரும், துணை முதலமைச்சரும் நல்லாட்சி நடத்துவோடு தமிழக மக்களுக்கு திட்டங்களை வாரி வழங்கி வருகிறார்கள். குறிப்பாக குடிமராமத்து திட்டத்தின் மூலம் இப்பகுதியில் நீராதாரம் பெருகி உள்ளது.

ஆனால் இன்றைக்கு எதிர்க்கட்சிகள் கழக அரசின் திட்டங்களை ஆராயாமல் பொய் பிரச்சாரம் செய்து வருகின்றனர். ஒரு கணம் ஸ்டாலின் சிந்தித்து பார்க்க வேண்டும். திமுக ஆட்சியில் மின்வெட்டு இருந்தது. இப்போது உள்ளதா? திமுக ஆட்சியில் சட்டம்- ஒழுங்கு சீர்கெட்டு இருந்தது. இப்போது உள்ளதா? இதுபோன்ற பல்வேறு கேள்விகளை எழுப்பினால் அவரால் பதில் சொல்ல முடியாது. ஏனென்றால் கருணாநிதி ஆட்சிக்கு வரும்போதெல்லாம் தன் குடும்பத்தை பற்றி தான் சிந்திப்பார். மக்கள் நலனை பற்றி சிந்திக்க மாட்டார் என்பது நாட்டு மக்களுக்கு நன்றாக தெரியும்.

2021 சட்டமன்ற தேர்தலில் வெற்றிபெறுவது போல ஒரு மாய தோற்றத்தை உருவாக்கி ஸ்டாலின் பேசி வருகிறார். மாயத்தோற்றம் என்றைக்கும் உண்மையின் தோற்றமாக மாறாது. வருகின்ற சட்டமன்ற தேர்தலில் கழகம் அமோக வெற்றி பெற்று அசைக்க முடியாத மக்கள் சக்தியாக உருவாகும். இத்தேர்தலோடு திமுக காணாமல் போய்விடும்.

இவ்வாறு மாவட்ட செயலாளர் வி.வி.ராஜன் செல்லப்பா எம்.எல்.ஏ. பேசினார்.

இந்நிகழ்ச்சியில் கழக அமைப்பு செயலாளர் ம.முத்துராமலிங்கம், மாவட்ட எம்.ஜி.ஆர். மன்ற செயலாளர் சந்திரன், மாவட்ட விவசாய பிரிவு செயலாளர் கருத்தகண்ணன், மாவட்ட மகளிரணி செயலாளர் சண்முகப்பிரியா, மாவட்ட இளைஞர் அணி இணை செயலாளர் புருஷோத்தமன், பகுதி கழக துணை செயலாளர் செல்வகுமார், வட்ட கழக செயலாளர் கருத்தமுத்து, அவனியாபுரம் ராமமூர்த்தி உள்பட பலர் கலந்து கொண்டனர்.