தற்போதைய செய்திகள்

ஈரமனம் கொண்ட அரசாக கழக அரசு திகழ்கிறது – அமைச்சர் க.பாண்டியராஜன் பெருமிதம்

அம்பத்தூர்

தமிழகத்தில் கொரோனா வைரஸ் தாக்கத்தை கட்டுப்படுத்தும் வகையில் முதலமைச்சர் எடப்பாடி கே.பழனிசாமி, துணை முதலமைச்சர் ஓ.பன்னீர்செல்வம் ஆகியோர் தமிழகம் முழுவதும் முழுவீச்சில் மருத்துவ துறை, சுகாதாரத்துறை, காவல்துறை, உள்ளாட்சிதுறை ஆகியவைகளை முடக்கிவிட்டு பல்வேறு தீவிர நடவடிக்கைகளை எடுத்து வருகின்றனர்.

அதன் எதிரொலியாக கடந்த சில தினங்களாக கொரோனா பாதிக்கப்படும் நோயாளிகளின் எண்ணிக்கையை விட குணமடைபவர்கள் எண்ணிக்கை அதிகமாக காணப்படுகிறது. இது தொடருமானால் விரைவில் தமிழ்நாட்டை விட்டு கொரோனா வைரஸ் விரைவில் கட்டுக்குள் வரும்.

இந்நிலையில் ஆவடி சட்டமன்ற தொகுதிக்குட்பட்ட திருமுல்லைவாயல் 12-வது வார்டில் உள்ள நடமாடும் கொரோனா பரிசோதனை மையம் மற்றும் மகளிர் சுய உதவி குழுவைச் சேர்ந்த தன்னார்வத் தொண்டர்ககள் கபசுர குடிநீர் வழங்குவதையும், தமிழ் வளர்ச்சி மற்றும் தொல்லியல் துறை அமைச்சர் க.பாண்டியராஜன் நேற்று ஆய்வு செய்து அங்குள்ள ஊழியர்களிடம் பல்வேறு விளக்கங்களை கேட்டறிந்து தகுந்த ஆலோசனைகளை வழங்கினார்.

பின்னர் அமைச்சர் க.பாண்டியராஜன் செய்தியாளர்களிடம் தெரிவித்தாவது:-

திருவள்ளூர் மாவட்டத்தில் அடங்கிய ஆவடி சட்டமன்ற தொகுதியில் கொரோனா வைரஸை கட்டுப்படுத்தும் வகையில் பல்வேறு நடவடிக்கைகள் எடுக்கப்பட்டு வருகிறது. சட்டமன்ற தொகுதியை பொறுத்தமட்டில் 6 லட்சத்து 86 ஆயிரம் மக்கள் தொகை அதாவது சென்னையில் இரண்டு சட்டமன்ற தொகுதியில் அடங்கிய ஒரு சட்டமன்றத்தொகுதி ஆவடி சட்டமன்றத் தொகுதி, இந்த தொகுதியில் 810 கொரோனா பாசிட்டிவ் நோயாளிகள் கண்டறியப்பட்டு அவர்களில் 364 நபர்கள் பூரண குணமடைந்து வீடு திரும்பியுள்ளனர். 255 நபர்கள் மருத்துவமனையில் சிகிச்சை பெற்று வருகின்றனர். 240 நபர்கள் வீட்டில் தனிமைப் படுத்தப்பட்டுள்ளனர்.

45 உயிர்களை இந்த கொரோனாவிற்கு இழந்துள்ளோம். ஆவடி சட்டமன்ற தொகுதியை பொறுத்தவரை 60 சதவீத விழுக்காடு நோயின் தாக்கம் கட்டுக்குள் உள்ளது. சென்னையை பொறுத்தமட்டில் 57.2 சதவீதம் பேர் குணமடைந்து வருகின்றனர்.

இங்கு நோய்த்தொற்றை கட்டுப்படுத்தும் வகையில் 172 மகளிர் சுய உதவிக்குழு பெண்கள் வீடுவீடாகச் சென்று கபசுர குடிநீர், மாத்திரை வழங்கும் பணியில் ஈடுபட்டுள்ளனர். அதேபோன்று சுகாதாரத்துறையில் 100க்கும் மேற்பட்டோர் கிருமிநாசினி, பிளீச்சிங் பவுடர் ஆகியவற்றை வீதிவீதியாக தெளிக்கும் பணியில் ஈடுபட்டுள்ளனர். 172 பெண்கள் வீடுதோறும் சென்று காய்ச்சல் கண்டறியும் பணியில் ஈடுபட்டு வருகின்றனர். ஆவடி சட்டமன்ற தொகுதியில் 45 உயிர்கள் இழந்த காரணத்தினால் கொரோனா வைரஸை கட்டுப்படுத்தும் வகையில் சில மாற்றங்களை செய்து வரும் முன் காப்போம் திட்டத்தினை அறிமுகப்படுத்தி மூன்று பிரிவுகளாக ஊழியர்களை பிரித்து பொதுமக்களை சோதனை செய்யும் முயற்சியில் தொடங்கியுள்ளோம்.

மக்களின் வாழ்வும் முக்கியம். வாழ்வாதாரமும் முக்கியம். அதனை கருத்தில் கொண்டு தமிழக முதலமைச்சர் எடப்பாடி கே.பழனிசாமி சில தளர்வுகளை அறிவித்ததன் மூலம் ஆவடியில் உள்ள அனைத்து தொழிற்சாலைகளும் இயங்க ஆரம்பித்துள்ளது.

மேலும் திருப்பத்தூர் மாவட்டத்தில் இருந்து வந்து ஊழியர்கள் ஆவடியில் வீடு வீடாகச் சென்று காய்ச்சலை கண்டறியும் பணியில் ஈடுபட்டு வருகின்றனர். இதன் காரணமாக வைரஸின் தாக்கம் ஆவடியில் விரைவில் கட்டுக்குள் வரும். கொரோனா வைரஸ் பாதித்த நபர்களுக்கு மன அழுத்தத்தை போக்கும் வகையில் விரைவில் யோகா பயிற்சியும் அளிக்கப்படும்.

ஆவடி சட்டமன்ற தொகுதியை பொறுத்தவரை இதுவரை 90 ஆயிரம் குடும்பங்களுக்கு கபசுர குடிநீர் வழங்கப்பட்டுள்ளது. திருநின்றவூரில் வீடு வீடாகச் சென்று காய்ச்சல் கண்டறியும் பணிகள் நடைபெற்று வருகிறது. ஒரு தெருவில் 8 நபர்களுக்கு மேல் கொரோனா தொற்று கண்டறியப்பட்டால் அந்த தெருவை லாக் செய்ய அதிகாரிகளுக்கு அறிவுறுத்தப்பட்டுள்ளது. ஆவடியில் இதுவரை உயிரிழந்த 45 நபர்களில் 25 நபர்கள் கொரோனா நோய் தவிர்த்து மற்ற நோய் தொற்றுக்கு ஆளானவர்கள் அதன் காரணமாகவும் மேலும் அவர்கள் முதல் ஐந்து நாளில் சிகிச்சைக்கு வராமல், கடைசி 5 நாளில் சிகிச்சைக்கு வந்ததால் உயிரிழப்பு ஏற்பட்டுள்ளது.

இனி வரும் காலங்களில் இதுபோன்ற தவறு நடக்காமல் இருப்பதற்கு உண்டான நடவடிக்கை எடுக்கப்பட்டு வருகின்றன. கொரோனா பரிசோதனை செய்துகொண்டு அதன் முடிவுகள் வர மூன்று நாட்கள் ஆகியிருந்த நிலையில் தற்சமயம் 48 மணி நேரத்தில் முடிவுகள் கிங் இன்ஸ்டியூட் சார்பில் பரிசோதனை செய்யப்படுகிறவர்களுக்கு உடனடியாக தெரிவிக்கும் வகையில் நடவடிக்கை எடுக்கப்பட்டுள்ளது.

சோதனை செய்து கொண்டவர்களில் அவர்களுக்கு நோய் இருப்பின் உடனடியாக சிகிச்சை அளிக்கும் வகையில் சுகாதாரத்துறைக்கு உத்தரவிடப்பட்டுள்ளது. எதிர்க்கட்சித் தலைவர் ஸ்டாலின் தினந்தோறும் பொதுமக்களுக்கு ஒரு தவறான அறிக்கை கொடுத்து பாதிக்கப்படுவோரின் எண்ணிக்கையில் இருந்து குணமாகக்கூடிய எண்ணிக்கையை குறைக்காமல் அப்படியே தானும் குழம்பி பொதுமக்களையும் தொடர்ந்து குழப்பி வருகிறார்.

தமிழக அரசின் தீவிர முயற்சியால் கொரோனா வைரஸ் வேகம் குறைக்கப்பட்டு கடந்த 3 நாட்களாக நோயாளிகள் எண்ணிக்கையை விட குணமடைபவர்கள் எண்ணிக்கை அதிகளவில் காணப்படுகிறது. மேலும் சென்னையிலும் கொரோனா பாசிடிவ் நோயாளிகள் எண்ணிக்கை குறைந்த அளவே காணப்படுகிறது. பாசிட்டிவ் நோயாளிகளின் மன அழுத்தத்தை போக்கும் வகையில் மருத்துவமனையில் தொலைக்காட்சிப்பெட்டி செய்திதாள்கள் அவர்களின் உறவினர்கள் பேசும் வகையில் அனைத்து வசதிகளும் செய்யப்பட்டுள்ளன.

இதன்மூலம் அம்மா வழியில் வரும் கழக அரசு ஈரமனம் கொண்ட அரசு மட்டும் இல்லாமல் நல்ல இதயம் படைத்த அரசாக விளங்குகிறது. தற்சமயம் பிளாஸ்மா சிகிச்சை மூலம் 32பேர் குணமடைந்து திரும்பியதாக சுகாதாரத்துறை அமைச்சர் டாக்ட் சி.விஜயபாஸ்கர் தெரிவித்துள்ளார். இதுவரை கொரோனா சிகிச்சைக்காக அரசின் சார்பில் 10 ஆயிரம் கோடி ரூபாய் செலவிடப்பட்டுள்ளது.

கொரோனாவால் பாதிக்கப்படும் நோயாளிகளின் எண்ணிக்கை தொடர்ந்து குறைந்து வருவதால் இன்னும் சில தினங்களில் முற்றிலுமாக கொரோனா போரில் தமிழகம் வெல்லும். திமுக தலைவர் மு.க.ஸ்டாலினிடம் கட்சியின் அதிகாரம் இல்லை அதனால் தான் காஞ்சிபுரம் மாவட்டம் செய்யூரில் நடைபெற்ற இளம்பெண் கொலை வழக்கில் குற்றவாளிகளான திமுக இளைஞரணி செயலாளரை கட்சியில் இருந்து முழுவதுமாக நீக்காமல் தற்காலிக இடைநீக்கம் செய்துள்ளார்.

திமுகவின் அடையாளமாக பாலியல் பலாத்காரம் செய்த நிர்வாகி கைது, பிரியாணி கடையில் தகராறு, பியூட்டி பார்லரில் தகராறு, ஆள் கடத்தல் அடிதடி கட்டப்பஞ்சாயத்து என்று ஆட்சி அதிகாரித்தில் இல்லாத போதே இத்தனை ஆர்ப்பாட்டங்கள் என்றால் இவர்கள் கையில் அரசின் செங்கோல் கொடுத்துவிட்டால் தமிழக மக்களின் நிலை என்னவாகும் என்று சிந்திக்க கூட பயப்பட வேண்டியிருக்கிறது.மக்களின் வாழ்வாதாரத்தையும் வாழ்க்கையின் காப்பாற்றும் அரசாக அம்மாவின் அரசு செயல்படுகிறது, என்றும் செயல்படும்.

இவ்வாறு அமைச்சர் க.பாண்டியராஜன் தெரிவித்தார்.

நிகழ்ச்சியில் ஆவடி மாநகராட்சி ஆணையாளர் நாராயணன், ஆவடி நகர கழக செயலாளர் ஆர்.சி.தீனதயாளன், பேராசிரியர் டேவிட் ராஜன், கழக வழக்கறிஞர் டி.அறிவரசன் த.ரெங்கன், ஆர்.சி.டி.ஹேமந்த், ஆர்.சி.டி.கமல் உட்பட பலர் கலந்து கொண்டனர்.