தற்போதைய செய்திகள்

ஒவ்வொரு மாணவனின் எதிர்காலமும் ஆசிரியர் கையில் தான் உள்ளது – அமைச்சர் கே.டி.இராஜேந்திரபாலாஜி பெருமிதம்

விருதுநகர்

விருதுநகர் மாவட்டம், கல்வி பணியில் சிறப்பாக பணியாற்றியமைக்காக ஆசிரியர் பெருமக்களுக்கு நல்லாசிரியர் விருதுகளை வழங்கி, ஒவ்வொரு மாணவனின் எதிர்காலமும் ஆசிரியர் கையில் தான் உள்ளது என பால்வளத்துறை அமைச்சர் கே.டி.இராஜேந்திரபாலாஜி பெருமிதத்துடன் தெரிவித்துள்ளார்.

விருதுநகர் மாவட்ட ஆட்சியர் அலுவலக வளர்ச்சி மன்ற கூட்டரங்கில் நேற்று பள்ளிக் கல்வித்துறை சார்பில் கல்வி பணியில் சிறப்பாக சேவை செய்தமைக்காக தமிழக அரசின் நல்லாசிரியர்களுக்கான டாக்டர் இராதாகிருஷ்ணன் விருது வழங்கும் விழா நடைபெற்றது. இவ்விழாவிற்கு மாவட்ட ஆட்சித்தலைவர் இரா.கண்ணன் தலைமை வகித்தார். திருவில்லிபுத்தூர் தொகுதி சட்டமன்ற உறுப்பினர் மு.சந்திரபிரபா முன்னிலை வகித்தார். இதில் பால்வளத்துறை அமைச்சர் கே.டி.இராஜேந்திரபாலாஜி கலந்து கொண்டு ஆசிரியர்களுக்கு நல்லாசிரியர் விருதுகளை வழங்கினார்.

பின்னர் அமைச்சர் கே.டி.இராஜேந்திரபாலாஜி தெரிவித்தாவது:-

தமிழகத்தில் கல்வி சிறந்து விளங்குவதற்கு முதலமைச்சர் பல்வேறு திட்டங்ளை அறிவித்துள்ளார். மேலும், ஆசிரியர்களை கௌரவபடுத்தும் விதமாக ஒவ்வொரு ஆண்டும் டாக்டர் இராதாகிருஷ்ணன் பிறந்த தினம் ஆசிரியர் தினமாக கொண்டாடப்பட்டு வருகிறது. அந்த வகையில் ஆசிரியர் பணி எப்பொழுதுமே பெருமை வாய்ந்த பணியாகும். குறிப்பாக கடவுளை மக்கள் எப்படி நேசித்தார்களோ அதற்கு அடுத்த படியாக ஆசிரியர்களை மதிப்பார்கள்.

காரணம் ஒரு மாணவனின் எதிர்காலம் பெற்றோர்களைவிட ஆசிரியர் கையில் தான் உள்ளது. ஒவ்வொரு மனிதனுக்கும் நிலையான சொத்து கல்வி ஒன்றே. அதை சரியான காலகட்டத்தில் சரியாக வழங்க கூடிய பணி ஆசிரியர் பணியே.
அதனடிப்படையில் விருதுநகர் மாவட்டத்தில் சிறப்பாக பணியாற்றிய 11 ஆசிரியர்களுக்கு நல்லாசிரியர் விருதுகள் வழங்கப்படுகிறது. நல்லாசிரியர் விருதுகள் , வெள்ளி பதக்கம் மற்றும் தலா ரூ.10,000 ரொக்க பரிசு தொகை ஆகியவற்றை வழங்கினார்.

மேலும், கல்விப்பணியில் மாணவர்களுக்கு காணொலி காட்சிகள் மூலம் தரமான முறையில் வகுப்புகள் நடத்துதல், பள்ளி வளாகங்களில் மரக்கன்றுகள் வளர்த்தல், பள்ளிகளின் உட்கட்டமைப்புகளை மேம்படுத்துதல், மாணவர்களின் தனித்திறனை வெளிக்கொணர்தல், நீட் தேர்வு பயிற்சி வகுப்புகளுக்கு வழிகாட்டுதல், மாணவர்களுக்கு ஒழுக்க நெறிகள் மற்றும் பிறர்க்கு உதவும் எண்ணங்களை வளர்த்தல் ஆகிய பணிகளில் ஆசிரியர் சிறந்து விளங்கி வருகின்றனர். அனைத்து ஆசிரிய பெருமக்களுக்கும் பாராட்டுகளையும், வாழ்த்துக்களையும் தெரிவித்துக்கொள்கிறேன்.

இவ்வாறு அமைச்சர் கே.டி.ராஜேந்திரபாலாஜி தெரிவித்தார்.

அதனைத் தொடர்ந்து திருவில்லிபுத்தூர் கல்வி மாவட்டத்தில் கொரோனா கால விழிப்புணர்வு மற்றும் முகக்கவசம் அணிதல், கபசுரக்குடிநீர் விநியோகம், ஆகிய பணிகளில் சிறப்பாக பணியாற்றிய இராஜபாளையம் நாடார் மேல்நிலைப்பள்ளி ஆசிரியர் மாரியப்பன், திருவில்லிபுத்தூர் மங்காபுரம் இந்து மேல்நிலைப்பள்ளி மகேந்திரன் ஆகியோரின் பணிகளை பாராட்டி அமைச்சர் கே.டி.ராஜேந்திரபாலாஜி பரிசுகளை வழங்கினார்.

இந்நிகழ்ச்சியில், மாவட்ட வருவாய் அலுவலர் இரா.மங்களராமசுப்பிரமணியன், மாவட்ட முதன்மை கல்வி அலுவலர் சுபாஷினி, மத்திய கூட்டுறவு வங்கி தலைவர் மயில்சாமி, விருதுநகர் மாவட்ட கல்வி அலுவலர் சின்னராசு, விருதுநகர் ஒன்றிய குழு தலைவர் சுமதி ராஜசேகரன் மற்றும் ஆசிரியர் கலந்து கொண்டனர்.