கன்னியாகுமரி

கொரோனா தடுப்பு பணிக்கு கூடுதலாக 2 ஆம்புலன்ஸ் – என்.தளவாய்சுந்தரம் தொடங்கி வைத்தார்

கன்னியாகுமரி

கன்னியாகுமரி மாவட்டத்தில் கொரோனா தடுப்புப்பணிகளுக்கு, கூடுதலாக ஒதுக்கப்பட்ட 2 ஆம்புலன்ஸ்களை பொதுமக்களின் பயன்பாட்டிற்கு, தமிழ்நாடு அரசின் டெல்லி சிறப்புப் பிரதிநிதி என்.தளவாய்சுந்தரம்
கொடியசைத்து துவக்கி வைத்தார்.

கன்னியாகுமரி மாவட்டத்தில் கொரோனா தடுப்புப் பணிகளுக்காக 108 ஆம்புலன்ஸ் சேவையில் கூடுதலாக 2 ஊர்திகள் ஒதுக்கீடு செய்யப்பட்டுள்ளன. இந்த ஊர்திகளை பொதுமக்களின் பயன்பாட்டிற்காக, தமிழ்நாடு அரசின் டெல்லி சிறப்புப் பிரதிநிதி என்.தளவாய்சுந்தரம், மாவட்ட ஆட்சித்தலைவர் பிரசாந்த் மு.வடநேரே முன்னிலையில், மாவட்ட ஆட்சியர் அலுவலக வளாகத்தில் நேற்று கொடியசைத்து தொடங்கி வைத்தார்.

பின்னர் தமிழ்நாடு அரசின் டெல்லி சிறப்புப் பிரதிநிதி என்.தளவாய்சுந்தரம் தெரிவித்ததாவது:- 

புரட்சித்தலைவி அம்மா அவர்களின் வழியில் செயல்படும், முதலமைச்சர் எடப்பாடி கே.பழனிசாமி தலைமையிலான தமிழக அரசு, தற்போதைய கொரோனா காலத்தில் பொதுமக்களுக்கு தேவையான, உணவு உள்ளிட்ட அத்தியாவசியப் பொருட்களை நியாவிலைக்கடைகள் மூலம் வழங்கி வருவதோடு, மருத்துவமனைகளில் சிகிச்சை பெற்றுவரும் நோயாளிகளுக்கு தேவையான உணவு மற்றும் தரமான சிகிச்சை உள்ளிட்ட மருத்துவ வசதிகளை சிறப்புடன் வழங்கி வருகிறது.

கன்னியாகுமரி மாவட்டத்தில், கடந்த 2008-ம் ஆண்டு முதல் இதுவரை 13 ஆம்புலன்ஸ்கள் பயன்பாட்டில் இருந்து வருகிறது. இரண்டு ஆம்புலன்ஸ்கள் கூடுதலாக ஒதுக்கீடு செய்யப்பட்டு, அதன் பயன்பாடு துவங்கப்பட்டுள்ளது. மொத்தமுள்ள 15 ஆம்புலன்ஸ்களில் 7 ஆம்புலன்ஸ்கள் கொரோனா நோயாளிகளுக்காக செயல்படுகிறது. ஒரு ஆம்புலன்ஸ் பச்சிளம் குழந்தைகளுக்காக இயங்கி வருகிறது. இவ்வாகனங்களின் வாயிலாக, ஏப்ரல் 2020 முதல் ஆகஸ்ட் 2020 வரை மொத்தம் 6,830 கொரோனா தொற்று பாதிக்கப்பட்ட பொதுமக்களை, அரசு மருத்துவமனைகளுக்கு அழைத்து வரப்பட்டும், குணமடைந்தவர்களை அவர்களது வீடுகளுக்கு திரும்ப அழைத்து செல்லும் பணியையும் மிகச் சிறப்பாக செய்து வருகிறது.

இதன்வாயிலாக, கொரோனா தொற்று பாதிக்கப்பட்டவர்களுக்கு இன்னும் சிறப்பான சேவை செய்ய இயலும். மேலும், கொரோனா தொற்று நோயால் பாதிக்கப்பட்டவர்களை உடனுக்குடன் மருத்துவமனைக்கு, தாமதமின்றி அழைத்து சென்று விரைவாக சிகிச்சைகள் அளிக்க முடியும்.

இவ்வாறு தமிழ்நாடு அரசின் டெல்லி சிறப்புப் பிரதிநிதி என்.தளவாய்சுந்தரம் தெரிவித்தார்.

இந்நிகழ்ச்சியில், மாவட்ட ஊராட்சித்தலைவர் எஸ்.மெர்லியன்ட் தாஸ், மாவட்ட ஆவின் பெருந்தலைவர் எஸ்.ஏ.அசோகன், அரசு ரப்பர் வளர்ப்போர் கூட்டுறவு விற்பனை சங்கத்தலைவர் டி.ஜாண்தங்கம், தமிழ்நாடு மாநில மீன்வள கூட்டுறவு இணையப்பெருந்தலைவர் சேவியர் மனோகரன், தமிழ்நாடு மாநில சிறுபான்மையினர் நல ஆணைய உறுப்பினர் அ.ராஜன், இணை இயக்குநர் (மருத்துவம் மற்றும் ஊரக நலப்பணிகள்) ஜே.ஜாண் பிரிட்டோ, அறங்காவலர் குழு உறுப்பினர் எம்.ஜெயசந்திரன் (எ) சந்துரு, 108 ஆம்புலன்ஸ் மண்டல மேலாளர் ரஞ்சித் விஸ்வநாதன், மாவட்ட ஒருங்கிணைப்பாளர் ஜெபின் கிங்ஸ்டன் ராஜ், சுகுமாறன், வழக்கறிஞர் கே.எல்.எஸ்.ஜெயகோபால், ரபீக் மற்றும் பலர் கலந்து கொண்டனர்.