தற்போதைய செய்திகள்

சர்வாதிகாரிகளை சென்றடையும் வகையில் கழகத்தின் உரிமைக்குரல் ஓங்கி ஒலிக்கும்-முன்னாள் அமைச்சர் ஆர்.பி.உதயகுமார் உறுதி

மதுரை

சர்வாதிகாரிகளை சென்றடையும் வகையில் கழகத்தின் உரிமைக்குரல் ஓங்கி ஒலிக்கும் என்று முன்னாள் அமைச்சர் ஆர்.பி.உதயகுமார் கூறினார்.

மதுரை புறநகர் மேற்கு மாவட்ட கழகத்தின் சார்பில் வருகின்ற 28-ந்தேதி கழகத்தின் சார்பில் நடைபெறும் உரிமை முழக்கம் போராட்டம் குறித்து ஆலோசனை கூட்டம் அம்மா கோயிலில் நடைபெற்றது. கூட்டத்தில் முன்னாள் அமைச்சரும், மதுரை புறநகர் மேற்கு மாவட்ட கழக செயலாளருமான ஆர்.பி.உதயகுமார் எம்.எல்.ஏ ஆலோசனை வழங்கினார்.

கூட்டத்தில் கழக அம்மா பேரவை துணை செயலாளர்கள் வெற்றிவேல், தனராஜன், அனைத்துலக எம்ஜிஆர் மன்ற துணை செயலாளர் மாணிக்கம், ஒன்றிய கழக செயலாளர்கள் அன்பழகன், ராமசாமி, மகாலிங்கம், மாவட்ட கழக பொருளாளர் திருப்பதி உள்பட பலர் கலந்து கொண்டனர்

இக்கூட்டத்தில் முன்னாள் அமைச்சரும், மதுரை புறநகர் மேற்கு மாவட்ட கழக செயலாளருமான ஆர்.பி.உதயகுமார் பேசியதாவது:-

வருகின்ற 28-ந்தேதி தமிழகம் முழுவதும் திமுக அரசை கண்டித்து கழகத்தின் சார்பில் உரிமை முழக்க ஆர்ப்பாட்டம் நடைபெறும் என்று இணை ஒருங்கிணைப்பாளர் எடப்பாடியார், ஒருங்கிணைப்பாளர் ஓ.பன்னீர்செல்வம் ஆகியோர் அறிவித்துள்ளனர்.

அந்த உரிமை குரலில் அனைத்து பகுதிகளிலும் அனைத்து கிராமங்களில் உள்ள இல்லங்களின் கடந்த சட்டமன்ற தேர்தலில் திமுக நூற்றுக்கணக்கான வாக்குறுதிகளை கொடுத்துவிட்டு அதை நிறைவேற்றாமல் இருக்கும் குறிப்பாக நீட்தேர்வு, பெட்ரோல் டீசல் விலையை குறிப்பு உள்ளிட்ட பல்வேறு திமுகவின் தேர்தல் வாக்குறுதிகளை நிறைவேற்றாத மெத்தன போக்கை கண்டித்து பதாகையை ஏந்தி நாம் உரிமை குரல் எழுப்ப வேண்டும். நமது உரிமை முழக்கம், தி.மு.க. சர்வாதிகாரிகளின் செவியில் சென்று சேரும் வகையில் ஓங்கி ஒலிக்க வேண்டும்.

தற்போது அரசு பழிவாங்கும் படலத்தை துவங்கியுள்ளது. விழுப்புரத்தில் அம்மா பெயரில் உருவாக்கப்பட்ட பல்கலைக்கழகத்தை மூடுவோம் என்று சர்வாதிகார போக்குடன் அமைச்சர் பொன்முடி அறிவித்துள்ளார்.பல்கலைக்கழகத்தில் அம்மாவின் பெயர் உள்ளதை அரசியல் காழ்புணர்ச்சியால் அழிக்க பார்க்கிறார்கள். மதுரையில் கலைஞர் நூலகம் அமைக்கப்போவதாக முதல்வர் அறிவித்துள்ளார்.

சென்னையில் அண்ணா பெயரில் நூற்றாண்டு நூலகம் உள்ளது. தற்போது மதுரையில் துவங்கும் நூலகத்திற்கு கொள்கை ரீதியில் அண்ணா பெயரை வைக்கலாமே. கலைஞர் பெயரில் நூலகம் அமைக்க நாங்கள் எந்த வித எதிர்ப்பையும் தெரிவிக்கவில்லை.

நீங்கள் எந்த விசுவாசத்தோடு பெயர் வைக்க நினைக்கிறீர்களோ அதே விசுவாசத்துடன் நாங்கள் அம்மா பெயரை வைத்து இருந்தோம். மக்கள் நலனில் இருந்து விலகி போகும் போது தி.மு.க. அரசுக்கு அதை சரியான முறையில் பயணிக்க மூக்கணாங்கயிறு போடும் பொறுப்பு கடமை எங்களுக்கு உள்ளது. அதற்கு மக்கள் எங்களுக்கு அதிகாரம் கொடுத்துள்ளார்கள்.

இவ்வாறு முன்னாள் அமைச்சர் ஆர்.பி.உதயகுமார் பேசினார்.