சிறப்பு செய்திகள்

பெரியகுளம் வராகநதியை தூய்மைப்படுத்தும் பணி – துணை முதலமைச்சர் துவக்கி வைத்தார்

தேனி

தேனி மாவட்டம் பெரியகுளத்தில் வராக நதியை காப்போம் திட்ட பணிகளை துணைமுதமைச்சர் ஓ.பன்னீர்செல்வம் பூஜை செய்தும், கொடியசைத்தும் துவக்கி வைத்தார்.

தேனி மாவட்டம் பெரியகுளத்தில் ஊரின் நடுவே என்றும் வற்றாத வராக நதி ஓடுகிறது. வராக நதியின் கரையை வைத்து ஒரு புறம் தென்கரை, மறுபுறம் வடகரை என்று அழைக்கப்படுகின்றது. காசிக்கு அடுத்தாற்போல் வராகநதியின் ஒரு கரையில் ஆண் மருத மரமும், மறு கரையில் பெண் மருத மரமும் உள்ளது மிக சிறப்பு வாய்ந்தது என்று ஏராளமான ஆன்மீகவாதிகள், பக்தர்கள் புனித நீராடி வந்தனர்.

மேலும் வராகநதியின் தென் கரையில் ராஜேந்திர சோழீஸ்வரர், அறம் வளர்த்த நாயகி, ஸ்ரீ பாலசுப்பிரமணியர் என மூன்று சன்னதிக்கும் தனித்தனி கொடிமரம் கொண்டு சிறப்பு வாய்ந்த பெரிய கோவில் என்று அழைக்கப்படும் திருத்தலம் உண்டு. மேலும் சுமார் 30 கிலோ மீட்டர் பயணிக்கும் வராக நதியை கொண்டு 3000 ஏக்கர் நிலங்கள் பாசன வசதியும் பெறுகிறது.

கரைகளின் மணல் பரப்பில் பேரறிஞர் அண்ணா, புரட்சித்தலைவர் எம்.ஜி.ஆர் போன்ற தலைவர்களின் பொதுக் கூட்டங்களும் நடந்ததுண்டு. இவ்வளவு சிறப்பு வாய்ந்த வராக நதி இன்று மாசடைந்துள்ள நிலையில் வராக நதியை தூய்மைப்படுத்திட வேண்டும் என்று தாமரைக்குளம் விழுதுகள் இளைஞர் மன்றம் உள்ளிட்ட தன்னார்வ தொண்டு நிறுவனங்கள், சமூக ஆர்வலர்கள் துணை முதல்வரிடம் கோரிக்கை விடுத்தனர். இவர்களின் கோரிக்கையை நிறைவேற்றும் பொருட்டு துணைமுதலமைச்சர் ஓ.பன்னீர்செல்வம் உத்தரவின் பேரில் கடந்த வாரம் தேனி நாடாளுமன்ற உறுப்பினர் ப.ரவீந்திரநாத் குமார் தலைமையில் வராக நதியை காப்போம் ஒருங்கிணைப்பு குழு கூட்டம் நடைபெற்றது.

அதனை தொடர்ந்து நேற்று அதற்கு செயல் வடிவம் கொடுக்கும் வகையில் பெரியகோவில் படித்துறையில் வராக நதியை தூய்மைப்படுத்தும் பணியை கழக ஒருங்கிணைப்பாளரும், துணைமுதலமைச்சருமான ஓ.பன்னீர்செல்வம் பூஜை செய்தும், கொடியசைத்தும் துவக்கி வைத்தார்.

இந்நிகழ்ச்சியில் மாவட்ட கழக செயலாளர் எஸ்.பி.எம்.சையதுகான், தேனி நாடாளுமன்ற உறுப்பினர் ப.ரவீந்திரநாத்குமார், கம்பம் தொகுதி சட்டமன்ற உறுப்பினர் எஸ்.டி.கே.ஜக்கையன் மாவட்ட ஆட்சித்தலைவர் பல்லவி பல்தேவ், பெரியகுளம் கிழக்கு ஒன்றிய செயலாளர் செல்லமுத்து, மேற்கு ஒன்றிய செயலாளர் அன்னபிரகாஷ், பெரியகுளம் நகர துணை செயலாளர் அப்துல்சமது, பாசறை மாவட்ட செயலாளர் நாராயணன், மாவட்ட எம்.ஜி.ஆர் மன்ற இணை செயலாளர் கள்ளிப்பட்டி சிவக்குமார் மற்றும் தன்னார்வல தொண்டு நிறுவனங்கள், சமூக ஆர்வலர்கள், பொதுமக்கள் கலந்து கொண்டனர்.