தற்போதைய செய்திகள்

குடும்ப அட்டைதாரர்களுக்கு 1.13 கோடி முக கவசம் விநியோகம் – அமைச்சர் செல்லூர் கே.ராஜூ தகவல்

திருநெல்வேலி

தமிழகம் முழுவதும் கூட்டுறவுத்துறை சார்பில் குடும்ப அட்டைதாரர்களுக்கு இதுவரை 1 கோடியே 13 லட்சத்து, 32 ஆயிரத்து 871 முக கவசங்கள் விலையில்லாமல் வழங்கப்பட்டுள்ளன என்று அமைச்சர் செல்லூர் கே.ராஜூ தெரிவித்துள்ளார்.

திருநெல்வேலி மண்டல கூட்டுறவுத்துறை சார்பில் மாவட்ட ஆட்சியர் அலுவலக வளாகத்தில் நடைபெற்ற விழாவில் கூட்டுறவுத்துறை அமைச்சர் செல்லூர் கே.ராஜூ பேசியதாவது:-

அம்மா அவர்கள் வழியில் செயல்படும், முதலமைச்சர், தமிழ்நாட்டை இந்தியாவிலேயே முன்னோடி மாநிலமாக உயர்த்திட பல்வேறு நடவடிக்கைகளை எடுத்து செயல்படுத்தி வருகிறார். கொரோனா வைரஸ் தொற்று நோய் தடுப்பு நடவடிக்கைகளை விரைவாக எடுத்து நம் மாநிலத்திற்குள் நோய் பரவலை கட்டுக்குள் கொண்டு வந்துள்ளார்.

ஊரடங்கு அறிவிக்கப்பட்டதை தொடர்ந்து, ஏழை, எளிய நடுத்தர மக்கள் பயன்பெறும் வகையில், முதல்கட்டமாக, மாநிலம் முழுவதும் அரிசிபெறும் குடும்ப அட்டைதாரர்களுக்கு தலா ரூ.1000மும், அதனைத் தொடர்ந்து, முழு ஊரடங்கு நீட்டிக்கப்பட்ட பெருநகர சென்னை மாநகராட்சி, காஞ்சிபுரம், திருவள்ளூர், செங்கல்பட்டு மற்றும் மதுரை மாவட்டங்களில் சில பகுதிகளில் உள்ள அரிசி குடும்ப அட்டைதாரர்களுக்கு 2ம் கட்டமாக தலா ரூ.1000மும் வழங்கினார்.

மேலும், ஏப்ரல் 2020 முதல் ஜூலை 2020 வரையிலான ஊரடங்கு காலத்தில் தமிழகம் முழுவதும் உள்ள அனைத்து குடும்ப அட்டைதாரர்களுக்கும் அரிசி, பருப்பு, கோதுமை, சர்க்கரை, சமையல் எண்ணெய் ஆகியவற்றை விலையில்லாமல் வழங்கினார். இது மட்டுமின்றி அனைத்து குடும்பங்களிலும் இணைக்கப்பட்டுள்ள குடும்ப உறுப்பினர்கள் அனைவருக்கும் விலையின்றி தலா 2 முகக் கவசங்களும் வழங்கும் பணி நடைபெற்று வருகிறது

முதலமைச்சர், கொரோனா நோய்த் தொற்று காலத்திலும், தமிழகத்தை முன்னேற்ற பாதையில் கொண்டு செல்ல தொழில்துறையில் பல்வேறு நடவடிக்கைகளை மேற்கொண்டு வருகிறார். அவ்வகையில் கடந்த ஜூலை திங்களில் 16 தொழில் நிறுவனங்கள் மூலம் ரூ.5,137 கோடி முதலீட்டில் தமிழ்நாட்டில் தொழில் தொடங்கிட புரிந்துணர்வு ஒப்பந்தங்கள் மேற்கொள்ளப்பட்டுள்ளது. இதன்மூலம் 6,555 நபர்களுக்கு புதிய வேலைவாய்ப்புகள் உருவாக்கப்படும்.

அம்மா அவர்களின் ஆட்சியில் மகளிர் சுயஉதவிக் குழுக்களுக்கு கடன் வழங்கும் திட்டம் உருவாக்கப்பட்டு மகளிர் பொருளாதார மேம்பாடடைய வழிவகுக்கப்பட்டது. அதுமட்டுமன்றி அம்மா அவர்களின் ஆட்சியில் கிராமப்புற பெண்களின் பொருளாதார மேம்பாட்டிற்காகவே விலையில்லா கறவை மாடுகள், ஆடுகள் வழங்கும் திட்டம் செயல்படுத்தப்பட்டது. பெண்கள் சிரமத்தினை குறைத்திட, விலையில்லா மிக்சி, கிரைண்டர், மின்விசிறி வழங்கப்பட்டது. தமிழக கூட்டுறவுத்துறை அம்மா அவர்களின் ஆட்சியில் தான் புதுப்பொலிவு பெற்றுள்ளது. தொடர்ந்து முதலமைச்சரின்ன் அறிவுரைப்படி பல்வேறு மேம்பாட்டு நடவடிக்கைகள் எடுக்கப்பட்டு செயல்படுத்தப்பட்டு வருகிறது.

மாநில அளவில் கூட்டுறவுத்துறை மூலம் 2011 முதல் 31.08.2020 வரை 97 லட்சத்து, 73 ஆயிரத்து 276 விவசாயிகளுக்கு ரூ. 53,596.33 கோடியும், நடப்பாண்டில் 31.08.2020 வரை 3,12,242 விவசாயிகளுக்கு ரூ.2,454.03 கோடியும் வட்டியில்லா விவசாயக் கடன் வழங்கப்பட்டுள்ளது. திருநெல்வேலி மண்டலத்தில் 2011 முதல் 31.08.2020 வரை 3,05,791 விவசாயிகளுக்கு ரூ.1,510.86 கோடி பயிர்க் கடனும், நடப்பாண்டில் 31.08.2020 வரை 4,124 விவசாயிகளுக்கு ரூ.50.81 கோடி வட்டியில்லா விவசாயக் கடன் வழங்கப்பட்டுள்ளது.

தமிழக அளவில் பயிர்காப்பீடு இழப்பீடாக 31.08.2020 வரை 48,84,802 விவசாயிகளுக்கு, ரூ.8,815.07 கோடியும், இதில் கூட்டுறவுச் சங்கங்கள் வாயிலாக 24,46,578 விவசாயிகளுக்கு ரூ.5,479.44 கோடியும், திருநெல்வேலி மண்டலத்தில், 82,545 விவசாயிகளுக்கு ரூ.118.04 கோடியும் வழங்கப்பட்டுள்ளது. தமிழகத்தில் கூட்டுறவுத்துறை மூலம் 5,17,800 மெட்ரிக் டன் கொள்ளளவு கொண்ட 4,044 கிடங்குகள் ரூ.533.78 கோடி மதிப்பில் கட்டப்பட்டுள்ளது.

மாற்றுத்திறனாளிகள் கடனாக, தமிழகம் முழுவதும் 2011 முதல் 31.07.2020 வரை 64,557 மாற்றுத்திறனாளிகளுக்கு ரூ.267.30 கோடியும், திருநெல்வேலி மண்டலத்தில், 448 நபர்களுக்கு ரூ.3.71 கோடியும், நகைக்கடனாக, தமிழகம் முழுவதும், 6,30,98,932 நபர்களுக்கு ரூ.2,46,803.72 கோடியும், திருநெல்வேலி மண்டலத்தில், 2011 முதல் 31.08.2020 வரை 19,32,534 நபர்களுக்கு ரூ. 8,297.90 கோடியும், தானிய ஈட்டுக் கடனாக தமிழகம் முழுவதும் 2011 முதல் 31.07.2020 வரை 2,09,182 நபர்களுக்கு ரூ.2,786.17 கோடியும், இதில் திருநெல்வேலி மண்டலத்தில் 4,428 நபர்களுக்கு ரூ.45.29 கோடியும், சிறுவணிகக் கடனாக 16,09,514 நபர்களுக்கு ரூ2,059.74 கோடியும், திருநெல்வேலி மண்டலத்தில், 67,409 நபர்களுக்கு ரூ.102.22 கோடியும் வழங்கப்பட்டுள்ளது. சிறுவணிகக் கடன் 10.09.2019 முதல் ரூ.50,000 ஆக உயர்த்தி வழங்கப்பட்டு வருகிறது.

நடப்பாண்டு 21.08.2020 வரை மாநில அளவில் 40,294 நபர்களுக்கு ரு.117.51 கோடியும், திருநெல்வேலி மண்டலத்தில் 1,513 நபர்களுக்கு ரூ.3.72 கோடியும் வழங்கப்பட்டுள்ளது. இன்று மட்டும் 534 நபர்களுக்கு ரூ.1.47 கோடி சிறுவணிகக் கடன் வழங்கப்பட்டுள்ளது. தமிழ்நாட்டில் 6.96 லட்சம் மகளிர் சுய உதவிக்குழுக்கள் தற்போது செயல்பட்டு வருகிறது இதில் 103.32 லட்சம் மகளிர் உறுப்பினர்களாக உள்ளனர். கூட்டுறவுத்துறையின் மூலம் 2011-2012 முதல் 31.07.2020 வரை 4,07,483 மகளிர் சுயஉதவிக் குழுக்களுக்கு ரூ.7,160.78 கோடி கடன் வழங்கப்பட்டுள்ளது.

கோவிட் -19 சிறப்பு கடனுதவி திட்டத்தின் கீழ் மகளிர் சுயஉதவிக் குழுக்களின் அவசரத்தேவையை பூர்த்தி செய்யும் பொருட்டு கடன் உதவிகள் வழங்கப்பட்டு வருகிறது. இத்திட்டத்தின் கீழ் ஒரு உறுப்பினருக்கு குறைந்தது ரூ.5 ஆயிரமும் அதிகபட்சமாக ஒரு குழுவிற்கு ரூ.1 லட்சம் வரை கடன் வழங்கப்படுகிறது. ஏற்கனவே பெற்றுள்ள கடனில் நிலுவைத் தொகை மற்றும் தற்போது பெறப்படும் தொகையும் சேர்த்து ரூ.10 லட்சத்திற்கு மிகாமல் இருக்கவேண்டும். கடனை திரும்ப செலுத்தும் காலம் 24 மாதங்கள் முதல் 36 மாதங்கள் வரையாகும். முதல் 6 மாதங்களுக்கு கடனை திரும்ப செலுத்த தேவையில்லை. 6 மாதம் கழித்து சம தவணைகளில் திரும்ப செலுத்த வேண்டும்.

இத்திட்டத்தின் கீழ் 08.05.2020 முதல் 28.08.2020 வரை 13,458 குழுக்களுக்கு ரூ.127.06 கோடி வழங்கப்பட்டுள்ளது. இன்று திருநெல்வேலி மண்டலத்தில் 12 பயனாளிகளுக்கு ரூ.3 லட்சம் கடன் வழங்கப்பட்டுள்ளது. தமிழகம் முழுவதும் உள்ள கூட்டுறவு வங்கிகளில் 31.3.2011 அன்று ரூ.26,245.17 கோடியாக இருந்த வைப்புத்தொகை தற்போது அம்மா அவர்கள் ஆட்சியில், 31.07.2020 அன்று ரூ.59,278.05 கோடியாக உயர்ந்துள்ளது.

தமிழகம் முழுவதும் 2011 முதல் 31.07.2020 வரை அனைத்து வகை கடன்களாக 7 கோடியே 66 லட்சத்து 28 ஆயிரத்து 935 நபர்களுக்கு ரூ. 3,84,903.47 கோடி வழங்கப்பட்டுள்ளது. மாநில அளவில் 31.07.2020 வரை 6.36 லட்சம் ருபே விவசாய கடன் அட்டைகள் வழங்கப்பட்டுள்ளது. திருநெல்வேலி மண்டலத்தில் 31.08.2020 வரை 11,832 ருபே பற்று அட்டைகள் மற்றும் 11,697 ருபே விவசாய கடன் அட்டைகள் வழங்கப்பட்டுள்ளன. தமிழகம் முழுவதும் 5,853 சங்கங்கள் ரூ.189.51 கோடி மதிப்பில் கணினிமயமாக்கப்பட்டுள்ளது. இதேபோன்று 752 சங்கங்கள் ரூ.91.63 கோடி மதிப்பில் நவீனமயமாக்கப்பட்டுள்ளன.

இதில், திருநெல்வேலி மண்டலத்தில், மாவட்ட மத்திய கூட்டுறவு வங்கியின் தலைமையகம் மற்றும் 4 கிளைகள், 6 தொடக்க வேளாண்மை கூட்டுறவு கடன் சங்க கட்டடங்கள் ரூ.4.10 கோடி மதிப்பில் நவீனமயமாக்கப்பட்டுள்ளன. மாநில அளவில், ரூ.124.93 கோடி மதிப்பில் 492 புதிய அலுவலக கட்டடங்களும், திருநெல்வேலி மண்டலத்தில், 11 தொடக்க வேளாண்மைக் கூட்டுறவுக் கடன் சங்க கட்டடங்கள் ரூ.2.75 கோடி மதிப்பில் கட்டப்பட்டுள்ளன. மாநில அளவில், ரூ.16.60 கோடி மதிப்பில் 133 மத்தியக் கூட்டுறவு வங்கி கிளைகளும், திருநெல்வேலி மண்டலத்தில், மாவட்ட மத்திய கூட்டுறவு வங்கியின் 5 கிளைகளும் துவக்கப்பட்டுள்ளன.

ஏழை எளிய நடுத்தர மக்கள் பயன்பெறும் வகையில், கூட்டுறவுத்துறையின் சார்பில் இயங்கி வரும் 291 அம்மா மருந்தகம் மற்றும் கூட்டுறவு மருந்தகங்கள் மூலம் 20சதவீத தள்ளுபடி விலையில் மருந்துகள் விற்பனை செய்யப்பட்டு வருகிறது. இதில் மாநிலம் முழுவதும், ரூ.1012.31 கோடி அளவிற்கும், இதில் திருநெல்வேலி மண்டலத்தில் செயல்பட்டு வரும் 2 அம்மா மருந்தகங்கள் மற்றும் 7 கூட்டுறவு மருந்தகங்கள் மூலம் ரூ.86.09 கோடி அளவிற்கும் மருந்துகள் விற்பனை செய்யப்பட்டுள்ளன. கூட்டுறவுத்துறையின் மூலம் செயல்படும் 79 பண்ணைப் பசுமை நுகர்வோர் கடைகள் மூலம் 05.09.2020 வரை 58,258 மெட்ரிக் டன் அளவிலான காய்கறிகள், ரூ.172.99 கோடி மதிப்பிற்கு விற்பனை செய்யப்பட்டுள்ளன.

கொரோனா காலத்தில் தமிழகம் முழுவதும், இயங்கிவரும் நடமாடும் பண்ணைப்பசுமை நுகர்வோர் கடைகள் மற்றும் ஏற்கனவே செயல்பட்டு வரும் பண்ணைப்பசுமை நுகர்வோர் கடைகள் மூலம் 29.03.2020 முதல் 08.09.2020 வரை 6,678.81 மெட்ரிக் டன் காய்கறிகள் ரூ.18.04 கோடி மதிப்பிற்கு விற்பனை செய்யப்பட்டுள்ளன. மேலும், கூட்டுறவு விற்பனை நிலையங்கள் மூலம் ஊரடங்கு காலத்தில் ரூ.500 மதிப்புடைய, 10 லட்சம் எண்ணிக்கையிலான மளிகை தொகுப்பு பைகள், ரூ.50 கோடி மதிப்பிற்கு விற்பனை செய்யப்பட்டுள்ளன.

மாநிலம் முழுவதும் 2011 முதல் 31.07.2020 வரை 676 முழுநேர நியாயவிலைக் கடைகளும், 1,762 பகுதிநேர கடைகளும் என மொத்தம் 2,438 புதிய கடைகள் திறக்கப்பட்டுள்ளன, மாநிலம் முழுவதும் 1,231 முழுநேர நியாயவிலைக் கடைகளுக்கும், 742 பகுதிநேர கடைகளுக்கும் என மொத்தம் 1,973 கடைகளுக்கு புதிய கட்டிடங்கள் கட்டி கொடுக்கப்பட்டுள்ளன.
நியாயவிலைக் கடைகளுக்கு அருகிலேயே அனைத்து தரப்பு மக்களும் பயன்பெறும் வகையில் 5சதவீதம் வரை தள்ளுபடி விலையில் 300 வகையான பொருட்களை பெற்றுக்கொள்ளும் வகையில் அம்மா சிறு கூட்டுறவுச் சிறப்பங்காடிகள் திறக்க முதல்வரால் உத்தரவிடப்பட்டு நாளது தேதி வரை மாநில அளவில் 712 கடைகளும், திருநெல்வேலி மண்டலத்தில் இதுவரை 18 கடைகளும் திறக்கப்பட்டுள்ளன. இன்று 10 கடைகள் திறந்து வைக்கப்பட்டுள்ளன.

முதலமைச்சரால் விதி 110ன் கீழ் சட்டமன்ற உறுப்பினர்கள் மற்றும் பொதுமக்கள் வைத்த கோரிக்கைகளை கருத்தில்கொண்டு, குடியிருப்புகளுக்கு அருகிலேயே அத்தியாவசியப் பொருட்களை விநியோகிக்கும் பொருட்டு, மாநிலம் முழுவதும் ரூ.9.66 கோடி மதிப்பீட்டில், 3,501 அம்மா நகரும் நியாயவிலைக் கடைகளை துவக்க உத்தரவிடப்பட்டுள்ளது. இந்நகரும் நியாயவிலைக்கடைகள், விரைவில் துவங்கப்பட உள்ளது. இதில் திருநெல்வேலி மண்டலத்திற்கு ஒதுக்கீடு செய்யப்பட்டுள்ள 110 கடைகளும் விரைவில் துவங்கப்படும்.

முதலமைச்சர் உத்தரவிற்கிணங்க, தமிழகம் முழுவதும் கூட்டுறவுத்துறைக்கு ஒதுக்கீடு செய்யப்பட்ட 5,46,19,553 முகக்கவசங்கள் வழங்கும் பணி தொடங்கப்பட்டு, இதுவரை 1,13,32,871 முகக்கவசங்கள் வழங்கப்பட்டுள்ள நிலையில், இன்று, திருநெல்வேலி மாவட்டத்திற்கு ஒதுக்கீடு செய்யப்பட்ட 16,13,000 முகக்கவசம் வழங்கும் பணி தொடங்கி வைக்கப்பட்டுள்ளது. மேலும், கொரோனா நோய்த் தொற்றினால் மரணமடைந்த இரண்டு விற்பனையாளர்களுக்கு தலா ரூ.25. லட்சம் நிதியுதவி அரசால் வழங்கப்பட்டுள்ளது.

இவ்வாறு அமைச்சர் செல்லூர் கே.ராஜூ என்றார்.