ராணிப்பேட்டை

மக்களை ஏமாற்றி வருகிறார் ஸ்டாலின்-வி.பி.பி.பரமசிவம் தாக்கு

ராணிப்பேட்டை

தேர்தல் வாக்குறுதிகளை நிறைவேற்றாமல் மக்களை ஏமாற்றி வருகிறார் ஸ்டாலின் என்று கழக இளைஞர் மற்றும் இளம்பெண்கள் பாசறை மாநில செயலாளர் டாக்டர் வி.பி.பி.பரமசிவம் கூறினார்.

ராணிப்பேட்டை மாவட்டம் சோளிங்கர் நகரில் இளைஞர் மற்றும் இளம்பெண்கள் பாசறை நிர்வாகிகள் ஆலோசனை கூட்டம் நடைபெற்றது.

கூட்டத்திற்கு எதிர்க்கட்சி துணை கொறடாவும், மாவட்ட கழக செயலாளருமான சு.ரவி எம்.எல்.ஏ. தலைமை தாங்கினார். மாவட்ட இளைஞர் மற்றும் இளம்பெண்கள் பாசறை செயலாளர் கே.அன்பரசு வரவேற்றார்.

இக்கூட்டத்தில் கழக இளைஞர் மற்றும் இளம்பெண்கள் பாசறை மாநில செயலாளரும், முன்னாள் சட்டமன்ற உறுப்பினருமான டாக்டர் வி.பி.பி.பரமசிவம் பங்கேற்று ஆலோசனை வழங்கி பேசியதாவது:-

ஸ்டாலின் நாடாளுமன்ற தேர்தல் தொடங்கி சட்டமன்றத் தேர்தல் வரை பொய்யான வாக்குறுதிகளை அளித்து மக்களை ஏமாற்றி வருகிறார். அம்மாவிடம் அரசியல் பயின்ற முன்னாள் முதலமைச்சர் எடப்பாடி கே.பழனிசாமிக்கு பொய் சொல்லி பழக்கமில்லை.

தோல்வியை கூட தாங்கி கொள்வோம். ஆனால் பொய்யான வாக்குறுதியை வழங்க மாட்டோம். வாக்குறுதிகளை நிறைவேற்றுகின்ற அரசு கழக அரசு. வாக்குறுதிகளை நிறைவேற்றாத அரசு தி.மு.க. அரசு.

தி.மு.க.வினரின் மூலதனமே பொய் தான். மக்களை ஏமாற்றி ஸ்டாலின் ஆட்சிக்கு வந்துள்ளார். கழக நிர்வாகிகள் அனைவரும் ஒற்றுமையுடன் செயல்பட்டால் வெற்றிபெறுவது உறுதி. தோல்வியை கண்டு துவண்டு விடவில்லை.

புரட்சித்தலைவி அம்மா அவர்கள் 2008-ம் ஆண்டு பாசறையை தொடங்கினார். பாசறை நிர்வாகிகள் எழுச்சியுடன் செயல்பட்டனர். 2011 தேர்தலில் பாசறை நிர்வாகிகள் சிறப்பாக செயல்பட்டதால் புரட்சித்தலைவி அம்மா அவர்கள் ஆட்சியை பிடித்தார். வருகின்ற அனைத்து தேர்தல்களிலும் கழகம் தொடர்ந்து வெற்றி பெறும்.

மின்வெட்டு பிரச்சினையால் தமிழகத்தில் மாணவர்கள், விவசாயிகள், அனைவரும் பாதிக்கப்பட்டுள்ளனர். மின்வெட்ைடயும், தி.மு.க. அரசையும் பிரிக்க முடியாது. குடும்பத் தலைவிக்கு மாதா மாதம் ரூ.1000, முதியோர்களுக்கு ரூ.1500 வழங்குவதாக தேர்தல் நேரத்தில் அறிவித்த வாக்குறுதியை நிறைவேற்ற முடியவில்லை. பெட்ரோல், டீசல் விலை உயர்வை கட்டுப்படுத்த தி.மு.க. அரசு தவறி விட்டது.

நீட் தேர்வு விவகாரத்தில் தி.மு.க. அரசு இரட்டை வேடம் போடுகிறது. ஆட்சிக்கு வந்தவுடன் முதல் கையெழுத்து நீட் தேர்வை ரத்து செய்வதுதான் என்று சொல்லிய ஸ்டாலின் நீட் தேர்வை ரத்து செய்யாமல் மாணவ சமுதாயத்தை ஏமாற்றி விட்டார்.

அரசின் சாதனைகளை பாசறை நிர்வாகிகள் வீடு வீடாக சென்று எடுத்துரைக்க வேண்டும் திமுகவினரின் பொய் பிரச்சாரங்களை முறியடிக்க வேண்டும். மருத்துவ படிப்பில் 7.5 சதவீதம் இட ஒதுக்கீடு கொண்டு வந்து ஏழை, எளிய மாணவர்களின் டாக்டர் கனவை நனவாக்கியவர் முன்னாள் முதலமைச்சர் எடப்பாடி கே.பழனிசாமி. 69 சதவீத இடஒதுக்கீடு கொண்டு வந்து சமூக நீதி காத்த வீராங்கனை புரட்சித்தலைவி அம்மா அவர்கள்.

கழக நிர்வாகிகள் இளைஞர்களுக்கு அங்கீகாரம் வழங்கி ஊக்குவிக்க வேண்டும். பாசறை நிர்வாகிகள் மூலைமுடுக்கெல்லாம் கழக அரசின் சாதனைகளை சென்று சேர்க்க வேண்டும். எத்தனை ஜென்மம் எடுத்தாலும் எடப்பாடியாரின் திட்டங்கள், சாதனைகளை தமிழகத்தில் தி.மு.க. அரசால் கொண்டு வர முடியாது.

மிகப்பெரிய ஆளுமை திறமை படைத்தவர் முன்னாள் முதலமைச்சர் எடப்பாடி கே.பழனிசாமி. கழகத்தின் பொன்விழாவை மாவட்ட இளைஞர் இளம்பெண்கள் பாசறை நிர்வாகிகள் மாவட்டம் முழுவதும் சிறப்பாக கொண்டாட வேண்டும்.

இவ்வாறு இளைஞர் மற்றும் இளம்பெண்கள் பாசறை மாநில செயலாளர் டாக்டர் வி.பி.பி.பரமசிவம் பேசினார்.