தற்போதைய செய்திகள்

மீறுசமுத்திரம் கண்மாயில் படகு சவாரிக்கு ஏற்பாடு – ப.ரவீந்திரநாத் எம்.பி. உறுதி

தேனி

தேனி மாவட்டத்தில் உள்ள நீர்நிலைகளை சீரமைக்க நடவடிக்கை எடுக்கப்படும் என்றும், மீறுசமுத்திரம் கண்மாயில் படகு சவாரிக்கு ஏற்பாடு செய்யப்படும் என்றும் ப.ரவீந்திரநாத் எம்.பி. உறுதிபட தெரிவித்தார்.

தேனி மாவட்டம், அல்லிநகரம் மந்தைகுளம் கண்மாய் மற்றும் மீறு சமுத்திரம் கண்மாய்களை தேனி நாடாளுமன்ற உறுப்பினர் ப.ரவீந்திரநாத் பார்வையிட்டு ஆய்வு மேற்கொண்டார். மந்தைகுளம் கண்மாயில் படர்ந்துள்ள ஆகாயதாமரை செடிகளை உடனடியாக அப்புறப்படுத்தவும், குளத்தில் கழிவு நீர் கலக்காமல் இருக்க உரிய நடவடிக்கை எடுக்குமாறு அதிகாரிகளுக்கு உத்தரவிட்டார்.

இதனைத் தொடர்ந்து ப.ரவீந்திரநாத் எம்.பி. செய்தியாளர்களிடம் கூறியதாவது:-

இந்தியாவில் உள்ள அனைத்து நீர்நிலைகளையும் சிறப்பாக பராமரிக்க பிரதமர் ஜல்சக்தி என்ற அமைப்பை உருவாக்கியுள்ளார். நான் வளர்ந்த தேனி மாவட்டத்தில் உள்ள நதிகள் மற்றும் நீர்நிலைகளை சீரமைக்க முயற்சி மேற்கொண்டுள்ளேன். பெரியகுளத்தில் வராகநதியை சுத்தப்படுத்தும் பணியை ஆரம்பித்துள்ளேன். தேனி மந்தைகுளம் கண்மாய், மீறுசமுத்திரம் கண்மாய்களை சீரமைப்பது குறித்து தமிழக முதல்வர், துணை முதல்வர், மாவட்ட ஆட்சித்தலைவர் உள்ளிட்டோரின் கவனத்திற்கு கொண்டு சென்று மத்திய, மாநில அரசின் நிதியோடு தன்னார்வலராக எனது நிதியையும் இணைத்து இக்குளங்களை சீரமைக்க, தூய்மைப்படுத்த நடவடிக்கை எடுப்பேன்.

மீறுசமுத்திரம் கண்மாய் பகுதியில் படகு சவாரி அமைப்பதற்கு உரிய முயற்சி எடுப்பேன். மேலும் கண்மாயை சுற்றி மக்களின் கோரிக்கையை ஏற்று நடைபாதை அமைக்க நடவடிக்கை எடுப்பேன். போடி-மதுரை ரயில் பாதை திட்டம் வருகிற மார்ச்சுக்குள் மக்கள் பயன்பாட்டுக்கு வரும். தேனி மாவட்டத்தில் உள்ள ராஜவாய்க்கால் உள்பட அனைத்து நீர்நிலைகளிலும் உள்ள ஆக்கிரமிப்புகளை அகற்றி தூர்வாரப்படும்.

இவ்வாறு ப.ரவீந்திரநாத் எம்.பி. கூறினார்.

இந்த ஆய்வின்போது மாவட்ட வருவாய் அலுவலர் ரமேஷ், நகராட்சி ஆணையர் நாகராஜன், பொதுப்பணித்துறை செயற்பொறியாளர் கார்த்திகேயன், உதவி செயற்பொறியாளர் சவுந்தர், உதவி பொறியாளர் ரமேஷ்வரன் தேனி நகர கழக செயலாளர் கிருஷ்ணகுமார், ஒன்றிய செயலாளர்கள் பெரியகுளம் அன்னபிரகாஷ், சின்னமனூர் விமலேஸ்வரன், நகர துணை செயலாளர் ரெங்கநாதன், நகர அம்மா பேரவை செயலாளர் சுந்தரபாண்டியன், கிராம கமிட்டி செயலாளர் தாமோதரன், துணை செயலாளர் வீரமணி, பொருளாளர் ஸ்ரீதரன் மற்றும் பலர் உடனிருந்தனர்.