சிறப்பு செய்திகள்

தமிழகத்தின் நலனுக்கு கழகம் 5 கோரிக்கை – டெல்லியில் பிரதமரை சந்தித்து ஒருங்கிணைப்பாளர்கள் மனு

புதுடெல்லி

தமிழகத்தின் நலனுக்காக 5 கோரிக்கைகள் அடங்கிய மனுவை டெல்லியில் பாரத பிரதமரை சந்தித்த கழக ஒருங்கிணைப்பாளர்கள் நேரில் வழங்கினர்.

பாரத பிரதமர் நரேந்திர மோடியை புதுடெல்லியில் நேற்று கழக ஒருங்கிணைப்பாளரும், முன்னாள் முதலமைச்சருமான

ஓ.பன்னீர்செல்வம், கழக இணை ஒருங்கிணைப்பாளரும், முன்னாள் முதலமைச்சருமான எடப்பாடி கே.பழனிசாமி ஆகியோர் நேரில் சந்தித்து 5 கோரிக்கைகள் அடங்கிய மனு ஒன்றினை அளித்தனர். அந்த மனுவில் கூறப்பட்டிருப்பதாவது:-

1. அம்மா அவர்களின் பெருமுயற்சியால், நீண்டநாள் சட்டப் போராட்டத்திற்கு பிறகு, காவேரி மேலாண்மை ஆணையம் அமைக்கப்பட்டது. தற்போது கர்நாடக அரசு காவேரி ஆற்றின் குறுக்கே மேகதாதுவில் அணை கட்ட எடுக்கும் முயற்சிகளை தடுத்து நிறுத்த வேண்டும். இல்லையெனில் டெல்டா மாவட்டங்கள் பாலைவனமாகிவிடும். இதனால், குறைந்தபட்சம் 19 மாவட்டங்களில் குடிநீர் பிரச்சினை ஏற்படும்.

2. கோவிட்- 19 என்ற கொரோனா தொற்று பரவத் தொடங்கிய நாள் முதல் அதை கட்டுப்படுத்த பல்வேறு நடவடிக்கைகளை அம்மாவின் அரசு எடுத்தது. மத்திய சுகாதாரத்துறை அமைச்சகம், இந்திய மருத்துவக் கழகம், உலக சுகாதார நிறுவனம் ஆகியவற்றின் பரிந்துரைக்கு ஏற்ப, அம்மாவின் அரசு திறம்பட செயல்பட்டு கொரோனா முதல் அலையை கட்டுப்படுத்தியது.

தடுப்பூசி செயல்பாட்டுக்கு வந்தபின், முதலில் முன்களப் பணியாளர்களுக்கும், பின்னர் 60 வயதுக்கு மேற்பட்டவர்களுக்கும் தடுப்பூசி செலுத்தப்பட்டது. கொரோனா இரண்டாவது அலையின் தாக்கம் பலமடங்கு அதிகரித்தது. மூன்றாவது அலையும் உருவாக உள்ளதாக தெரிவிக்கப்பட்டுள்ளது. எனவே தமிழக மக்களை கொரோனா பிடியில் இருந்து காக்க, அதிக அளவில் தடுப்பூசிகளை வழங்க வேண்டும்.

3. இந்தியா- இலங்கை கடல் எல்லையில் மீன் பிடிக்கும் தமிழக மீனவர்களை, இலங்கை கடற்படையினர் தாக்குவதும், மீன்பிடி படகுகளை சேதப்படுத்துவதும், பறிமுதல் செய்வதும் தொடர்கதையாக உள்ளன.

இந்திய அரசின் தலையீட்டின்பேரில் மீனவர்கள் விடுவிக்கப்படுகின்றனர். ஆனால், அவர்களின் படகுகளை திரும்ப தருவதில்லை. இதனால், வாழ்வாதாரம் இழந்து தமிழக மீனவர்கள் தவிக்கிறார்கள். இந்த விவகாரத்தில் பாரதப் பிரதமர் தலையிட்டு இலங்கை அரசுடன் பேச்சு நடத்தி,சுமூக நிலையை உருவாக்கித் தர வேண்டும்.


4. கோதாவரி- காவேரி இணைப்பு திட்டத்திற்கு இந்திய அரசு முழு ஒப்புதல் தந்துள்ளதற்கு, தமிழக மக்களின் சார்பிலும், அனைத்திந்திய அண்ணா திராவிட முன்னேற்றக் கழகத்தின் சார்பிலும் நன்றியை தெரிவித்துக் கொள்கிறோம். இந்த திட்டத்தை தொய்வில்லாமல் விரைந்து நிறைவேற்ற வேண்டும் என்று கேட்டுக் கொள்கிறோம்.

5. தமிழகத்தில் கடந்த 10 ஆண்டுகால அனைத்திந்திய அண்ணா திராவிட முன்னேற்றக் கழக ஆட்சிக் காலத்தில், பல்வேறு தேசிய நெடுஞ்சாலை திட்டங்களுக்கு எங்களால் பரிந்துரை செய்யப்பட்டது. அதன் அடிப்படையில், இந்திய தேசிய நெடுஞ்சாலை ஆணையமும், தேசிய நெடுஞ்சாலைத்துறையும் தமிழ்நாட்டில் மேற்கொள்ளப்பட உள்ளதாக அறிவிக்கப்பட்ட திட்டங்களை விரைந்து செயல்படுத்திட வேண்டும்.

இவ்வாறு அந்த மனுவில் கூறப்பட்டுள்ளது.