தற்போதைய செய்திகள்

புயலால் பாதிக்கப்பட்டோருக்கு ரூ.10 கோடி மதிப்பில் அடுக்குமாடி குடியிருப்பு கட்ட முதலமைச்சர் உத்தரவு – அமைச்சர் ஆர்.காமராஜ் தகவல்

திருவாரூர்

மன்னார்குடி வட்டத்திற்குட்பட்ட கஜா புயலால் பாதிக்கப்பட்ட, மக்களுக்கு தமிழ்நாடு குடிசை மாற்று வாரியம் மூலமாக ரூ.10 கோடி மதிப்பீட்டில் 160 வீடுகள் அடங்கிய அடுக்குமாடி குடியிருப்பு கட்டுவதற்கு புரட்சித்தலைவி முதலமைச்சரால் அரசாணை வழங்கப்பட்டுள்ளது என்று உணவுத்துறை அமைச்சர் ஆர்.காமராஜ் தெரிவித்துள்ளார்.

திருவாரூர் மாவட்டம் மன்னார்குடி வட்டம் உள்ளிக்கோட்டை நேரடி நெல்கொள்முதல் நிலையத்தில் உணவுத்துறை அமைச்சர் ஆர்.காமராஜ் ஆய்வு செய்தார்.

பின்னர் அமைச்சர் ஆர்.காமராஜ் செய்தியாளர்களிடம் தெரிவித்ததாவது:-

புரட்சித்தலைவி அம்மாவின் வழிகாட்டுதலோடு முதலமைச்சர் தமிழகத்தின் நலன் பேணுகின்ற அனைத்து திட்டங்களையும் உறுதியோடு செய்து வருகிறார். அதற்கு தமிழக மக்கள் முழுமையான ஒத்துழைப்பையும், ஆதரவையும் தந்து வருகின்றனர். உலகளவில், கொரோனா தொற்று மிக பெரிய பாதிப்பை ஏற்படுத்தி கொண்டிருந்தாலும் தமிழகத்தில் மட்டுமே கொரோனா தொற்றினால் ஏற்படும் இறப்பு விகிதம் 1.37 சதவீதமாக உள்ளது.

மேலும், கொரோனா தொற்றினால் பாதிக்கப்பட்டு சிகிச்சை முடிந்து, குணமடைந்து வீடுகளுக்கு செல்பவர்கள் 62 சதவிகிதத்திற்கு மேலாக உள்ளது. தமிழக முதல்வர் கேட்டு கொண்டதற்கிணங்க பொது மக்கள் சமூக இடைவெளியினை பின்பற்ற வேண்டும். அடிக்கடி கைகளை கழுவுதல், முக கவசம் அணிந்து வெளியில் செல்ல வேண்டும் போன்ற தடுப்பு நடவடிக்கைகளை பின்பற்ற வேண்டும். இவற்றை முறையாக பின்பற்றும் பகுதிகளில் கொரோனா தொற்று என்பது இல்லை. இந்த தடுப்பு நடவடிக்கைகளை பின்பற்றாத பகுதிகளில் தான் கொரோனா தொற்றின் எண்ணிக்கை அதிகரித்து வருகிறது. எனவே இந்த தடுப்பு நடவடிக்கைகளை மக்கள் முறையாக பின்பற்ற வேண்டும். இந்த கொரோனா தொற்று காரணமாக மக்களின் அன்றாட வாழ்க்கை பாதிக்கக்கூடாது என்பதற்காக முதல்வர் இந்த ஊரடங்கில் சில தளர்வுகளை ஏற்படுத்தியுள்ளார்.

இந்த தளர்வுகளை பயன்படுத்தி தமிழகத்தில் பல்வேறு பணிகள் தொய்வின்றி நடைபெற்று வருகிறது. அந்த வகையில் விவசாய பணிகளும் மேற்கொள்ளப்பட்டு வருகிறது. அதனடிப்படையில், இன்றைய தினம் மன்னார்குடி வட்டம், உள்ளிக்கோட்டை நேரடி நெல்கொள்முதல் நிலையத்தில் ஆய்வு மேற்கொள்ளப்பட்டது. தமிழகம் முழுவதும், டெல்டா, டெல்டா அல்லாத மாவட்டங்களில் 521 நேரடி நெல் கொள்முதல் நிலையங்கள் செயல்பட்டு வருகிறது.

அதன் மூலம் இதுவரை வரலாற்றில் இல்லாத அளவில் 26 லட்சத்து 24 ஆயிரம் மெ.டன். நெல் கொள்முதல் செய்யப்பட்டுள்ளது. இன்னும் இந்த பருவம் முடிவடையாத நிலையில் இந்த அளவு நெல் கொள்முதல் செய்யப்பட்டுள்ளது. இது ஒரு வரலாற்று சாதனை அளவாகும். இதற்கெல்லாம் காரணம் புரட்சித்தலைவி அம்மாவின் தொலை நோக்கு திட்டமான மழைநீர் சேகரிப்பு திட்டத்தை தீட்டி எவ்வாறு செயல்படுத்தினார்களோ அதை பின்பற்றி, தமிழக முதல்வர் செயல்படுத்திய மிக சிறந்த திட்டம் நீர் மேலாண்மை திட்டம். இந்த நீர் மேலாண்மை திட்டத்தின் கீழ் அனைத்து ஏரி, ஆறு, குளங்கள், வாய்க்கால்கள் தூர்வாரப்பட்டுள்ளது.

மேலும், இதுவரை இல்லாத அளவிற்கு மேட்டூர் அணையை தூர்வாரிய முதலமைச்சராக நமது தமிழக முதல்வர் விளங்குகிறார். இதன் காரணமாக பொதுமக்களுக்கு குடிதண்ணீர் பிரச்சினை என்பதும் இல்லை. விவசாயிகளுக்கு விவசாய பணி மேற்கொள்வதற்கு தண்ணீர் பற்றாக்குறை என்பதும் இல்லை. அது மட்டுமின்றி விவசாயிகளுக்கு விவசாய பணி மேற்கொள்வதற்கு மும்முனை மின்சாரமும் தொடர்ந்து வழங்கப்பட்டு வருகிறது. அதனடிப்படையில் இன்றையதினம் ஆய்வு மேற்கொண்டு விவசாயிகளிடம் கலந்துரையாடிய பொழுது அனைத்து பகுதிகளிலும் விளைச்சல் நன்றாக விளைந்திருப்பதாக கூறினார்.

மேலும், மன்னார்குடி வட்டத்திற்குட்பட்ட கஜா புயலால் பாதிக்கப்பட்ட, மக்களுக்கு தமிழ்நாடு குடிசை மாற்று வாரியம் மூலமாக ரூ.10 கோடி மதிப்பீட்டில் 160 வீடுகள் அடங்கிய அடுக்குமாடி குடியிருப்பு கட்டுவதற்கு புரட்சித்தலைவி அம்மாவின் அரசால் அரசாணை வழங்கப்பட்டுள்ளது என்பதை மகிழ்ச்சியோடு தெரிவித்து கொள்கிறேன்.

இவ்வாறு அமைச்சர் ஆர்.காமராஜ் தெரிவித்தார்.

இந்த ஆய்வின் போது முதுநிலை மண்டல மேலாளர் மணிவண்ணன், வருவாய் கோட்டாட்சியர் புண்ணியகோட்டி, முன்னாள் மாவட்ட ஊராட்சி துணைத்தலைவர் பொன்வாசுகிராம், முன்னாள் ஒன்றியக்குழு துணைத்தலைவர் கா.தமிழ்செல்வம் மற்றும் அரசு அலுவலர்கள் கலந்து கொண்டனர்.