தற்போதைய செய்திகள்

உள்ளாட்சி அமைப்பு தனி அலுவலர்களின்பதவிக்காலம் மேலும் 6 மாதம் நீட்டிப்பு – சட்டப்பேரவையில் மசோதா நிறைவேற்றம்

சென்னை

உள்ளாட்சி அமைப்புகளை நிர்வகித்துவரும் தனி அலுவலர்களின் பதவி காலம் மேலும் 6 மாதம் நீட்டிக்கும் சட்ட மசோதா பேரவையில் நிறைவேறியது.

சட்டப்பேரவையில் நேற்று 2020 ஆம் ஆண்டு தமிழ்நாடு நகராட்சி சட்டங்கள் மூன்றாம் திருத்த சட்ட மசோதா மற்றும் 2020 ஆம் ஆண்டு தமிழ்நாடு ஊராட்சிகள் மூன்றாம் திருத்த சட்ட மசோதாக்களை உள்ளாட்சித்துறை அமைச்சர் எஸ்.பி.வேலுமணி தாக்கல் செய்தார்.

அதில் உச்சநீதிமன்றம் 2019-ம் ஆண்டு டிசம்பர் 6 மற்றும் 11-ந் தேதியிட்ட ஆணையைத் தொடர்ந்து மறுசீரமைக்கப்பட்ட 9 மாவட்டங்களான காஞ்சிபுரம், செங்கல்பட்டு, வேலூர், திருப்பத்தூர், ராணிப்பேட்டை, விழுப்புரம், கள்ளக்குறிச்சி, நெல்லை மற்றும் தென்காசி ஆகியவற்றிலுள்ள பேரூராட்சிகள், நகராட்சிகள் மற்றும் மாநகராட்சிகளுக்கான வார்டுகளின் எல்லை வரையறை பணிகள் முழுவீச்சில் நடைபெற்றுக் கொண்டிருக்கின்றன.

மேலும், நகர்ப்புற உள்ளாட்சித் தேர்தல்களை நடத்துவதற்காக, வாக்காளர் பட்டியல் தயாரித்தல் போன்ற முன்னேற்பாடுகளை தமிழ்நாடு மாநில தேர்தல் ஆணையம் செய்து வருகிறது.இதற்கிடையில், திடீரென்று கொரோனா தொற்று நோய் பரவி வருவதால், மத்திய, மாநில அரசுகளால் பொதுமுடக்கம் அறிவிக்கப்பட்டுள்ளது. அரசு எந்திரம் போர்கால அடிப்படையில் கொரோனா நோய் தடுப்பு பணிகள், பாதுகாப்பு பணிகள், மீட்பு மற்றும் நலவாழ்வு பணிகள் ஆகியவற்றில் ஈடுபட்டுள்ளது. எனவே, உச்சநீதிமன்றம் உத்தரவிட்டபடி, தமிழ்நாடு மாநில தேர்தல் ஆணையத்தால் ஊரக உள்ளாட்சி தேர்தல்களை நடத்த இயலாத சூழல் ஏற்பட்டுள்ளது.

இந்த சூழ்நிலையில் பேரூராட்சிகள், நகராட்சிகள் மற்றும் மாநகராட்சிகள் ஆகியவற்றின் தனி அலுவலர்களின் பதவிக் காலமானது இந்த ஆண்டு ஜூன் 30-ந் தேதியன்று முடிந்ததை தொடர்ந்து, தனி அலுவலர்களின் பதவிக் காலத்தை மேலும் ஆறு மாதங்களுக்கு நீட்டிக்கும் வகையில் சட்ட மசோதா நேற்று பேரவையில் அறிமுகம் செய்யப்பட்டு நிறைவேறியது.