தற்போதைய செய்திகள்

தி.மு.க. அரசு கையாலாகாத அரசு-எதிர்க்கட்சி கொறடா எஸ்.பி.வேலுமணி குற்றசாட்டு

கோவை

கையாலாகாத அரசாக தி.மு.க. அரசு செயல்படுகிறது என்று எதிர்க்கட்சி கொறடா எஸ்.பி.வேலுமணி குற்றம் சாட்டியுள்ளார்.

தேர்தல் வாக்குறுதிகளை நிறைவேற்றாத திமுக அரசை கண்டித்து தமிழகம் முழுவதும் கழகம் சார்பில் நேற்று போராட்டம் நடைபெற்றது.

கோவை குனியமுத்தூர் பகுதியில் முன்னாள் அமைச்சர் எஸ்.பி.வேலுமணி தலைமையில் கழகத்தினர் கறுப்பு உடை அணிந்து கையில் கண்டன பதாகைகளை ஏந்தியபடி ஆர்ப்பாட்டம் நடத்தினர்.

போராட்டத்தின் போது முன்னாள் அமைச்சரும், எதிர்க்கட்சி கொறடாவுமான எஸ்.பி.வேலுமணி எம்.எல்.ஏ. பேசியதாவது:-

தேர்தலின்போது பல்வேறு வாக்குறுதிகளை அளித்து வெற்றி பெற்ற தி.மு.க அரசு எந்த திட்டங்களையும் செயல்படுத்த வில்லை.

நீட் தேர்வு ரத்து, குடும்பத் தலைவிகளுக்கு மாதா மாதம் 1000 ரூபாய் கொடுப்பது, பெட்ரோல், டீசல் விலை குறைப்பு,
மேகதாதுவில் அணை கட்டுவதை தடுப்பது போன்ற எதையும் நிறைவேற்ற வில்லை. எதைப் பற்றியும் கவலைப்படாத அரசாகவும், மக்கள் விரோத போக்கை கடைப்பிடிக்கும் அரசாகவும் தி.மு.க. அரசு இருக்கிறது.

கொரோனா முதல் அலையின்போது பல்வேறு நடவடிக்கைகள் எடுக்கப்பட்டு மக்களின் உயிர்கள் காப்பாற்றப்பட்டது. ஆனால் தற்பொழுது கொரோனா தொற்று தடுப்பில் திமுக அரசு கவனம் செலுத்தவில்லை. திமுக அரசு வந்த பின் ஒவ்வொரு ஊரிலும் கொத்து கொத்தாக பலர் இறந்தனர். ஆனால் இறப்பு மறைக்கப்பட்டது. கொரோனோவால் உயிரிழப்பு என சான்றிதழ் வழங்கப்படுவதில்லை.

டெல்லியில் பிரதமரை சந்தித்து தடுப்பூசி வழங்க வேண்டும் என எதிர்க்கட்சி தலைவரும், எதிர்க்கட்சி துணைத் தலைவரும் கோரிக்கை விடுத்துள்ளனர். ஆட்சியில் இருந்தாலும் இல்லாவிட்டாலும் மக்களுக்கு கழகம் தொடர்ந்து வேலை செய்யும்.

இது போன்ற செயல்களை தி.மு.க. மேற்கொள்ளாமல்
கழகத்தினர் மீது பொய் வழக்கு போடுவது, காவல்துறை மூலம் மிரட்டுவது போன்ற செயல்களில் இந்த அரசு ஈடுபடுகிறது.
ஆளுகின்ற தி.மு.க. அரசு இனிமேலாவது மக்களை ஏமாற்றாமல் வாக்குறுதிகளை நிறைவேற்ற வேண்டும். காவல் துறையினர் நடுநிலையோடு செயல்பட வேண்டும்.

திமுக அரசு காவல்துறையை அடிமைப்படுத்தி எங்கள் தொண்டர்கள் மீது அடக்குமுறைகளை ஏவுவதை நிறுத்திக் கொள்ளுங்கள். திமுகவின் மிரட்டலுக்கு கழகத்தினர் அஞ்ச மாட்டார்கள். தி.மு.க. ஆட்சி விபத்து போல நடந்துள்ளது. நாங்கள் கொண்டு வந்த பல திட்டங்களை தி.மு.க. அரசு ரத்து செய்து இருக்கிறது. கையாலாகாத அரசாக இந்த அரசு செயல்படுகிறது.

கொரோனா இரண்டாவது அலையில் எண்ணற்ற உயிர்கள் இறப்பிற்கு தி.மு.க. அரசு தான் காரணம். கழக ஆட்சியில் மோசமாக இருந்த ஊரக சாலைகளை புதுப்பிக்க போடப்பட்டு இருந்த சாலை டெண்டர்களை ரத்து செய்து இருப்பதை கண்டிக்கிறோம்.
இவ்வாறு எதிர்க்கட்சி கொறடா எஸ்.பி. வேலுமணி எம்.எல்.ஏ. பேசினார்.