தற்போதைய செய்திகள்

மற்ற மாநில முதலமைச்சர்களுக்கு எடப்பாடி கே.பழனிசாமி `ரோல்மாடல்’

மதுரை

மற்ற மாநில முதலமைச்சர்களுக்கு ரோல் மாடலாக திகழும் முதலமைச்சர் எடப்பாடியாரால் தமிழகம் வளர்ச்சி பெற்றுள்ளது என்று அமைச்சர் ஆர்.பி.உதயகுமார் தலைமையில் நடைபெற்ற விழாவில் லயன்ஸ் மற்றும் ரோட்டரி சங்கங்கள் முதலமைச்சரை பாராட்டின.

திருமங்கலம் தொகுதி வளர்ச்சி திட்டங்கள் குறித்து மண்ணின் மைந்தர்களுடன் கலந்துரையாடல் நிகழ்ச்சி திருமங்கலம் ஹரிஷ் ஹோட்டலில் நடைபெற்றது. இதில் திருமங்கம் ரோட்டரி சங்கம், திருமங்கலம் ஆனந்தம் லைன்ஸ் சங்கம், திருமங்கலம் சிட்டி லயன்ஸ் சங்கம், திருமங்கலம் ரோஸ் சங்கம் சங்கம் மற்றும் பேரையூர் எழுமலை லயன்ஸ் சங்கம் ஆகிய சங்கங்கள் பங்கேற்றன.

இந்த நிகழ்ச்சியில் அமைச்சர் ஆர்.பி.உதயகுமார் பங்கேற்று சிறப்புரை ஆற்றி திருமங்கலம் தொகுதி குறித்து கலந்துரையாடினார். இதில் ரோட்டரி மாவட்ட ஆளுநர் ஜெயகண்ணன், மாவட்ட ஆளுநர் ஜானகிராமன், முன்னாள் ஆளுநர் ராமசாமி, மாவட்ட இரண்டாம் துணை ஆளுநர் ரவீந்திரன், கப்பலூர் தொழில் சங்க தலைவர் ரகுநாத ராஜா ஆகியோர் திருமங்கலத்தில் கடந்த ஐந்து ஆண்டுகளில் கொண்டு வந்த திட்டங்கள் குறித்து பாராட்டி பேசினர். இந்நிகழ்ச்சியினை பாரதி யுவகேந்திரா தலைவர் நெல்லைபாலு ஒருங்கிணைத்தார்.

பின்னர் அமைச்சர் ஆர்.பி.உதயகுமார் பேசியதாவது:-

திருமங்கலம் தொகுதியில் 2,62,000 வாக்காளர்கள் உள்ளனர். இந்த வாக்காளர்களிடம் உங்களைப் போன்ற தொலைநோக்கு சிந்தனை உள்ளவர்கள் பல்வேறு பணிகளை மேற்கொண்டு வருகிறார்கள். திருமங்கலத்தில் 70 சதவீத மக்களுக்கு முகக்கவசங்கள் வழங்கியுள்ளோம். திருமங்கலம் தொகுதியில் புதிய வட்டம், புதிய கோட்டம், புதிய கல்வி மாவட்டங்கள் உருவாக்கப்பட்டுள்ளது. அதேபோல் பள்ளிகளின் தரம் உயர்த்தப்பட்டுள்ளது. புதிய கல்லூரிகள் உருவாக்கப்பட்டுள்ளது. அதேபோல் ரயில்வே மேம்பால பணிக்காக பல்வேறு திட்டங்கள் செயல்படுத்தப்பட்டு வருகிறது. விரைவில் இதற்கு பூமிபூஜை நடைபெற உள்ளது.

எய்ம்ஸ் மருத்துவமனைக்கு ரூ.21 கோடியில் சாலை வசதி செய்யப்பட்டுள்ளது. எதிர்க்கட்சிகள் காழ்ப்புணர்ச்சி காரணமாகவே வராது என்று பொய் பரப்புரை செய்து வருகின்றனர். பாரதப்பிரதமர், தமிழக முதல்வர், துணை முதல்வர் உள்ளிட்ட அனைவரும் அடிக்கல் நாட்டியுள்ளனர். எய்ம்ஸ் மருத்துவமனை நிச்சயமாக வரும்.

இதற்கு நிதி உதவி செய்யும் ஜப்பான் நிறுவனம் இந்த இடத்தை ஆய்வு செய்து மிக சரியான இடம் என்று சான்று அளித்துள்ளது. தற்போது கொரோனா நோய் தொற்று காரணமாக இந்தக் காலதாமதம். நிச்சயம் எய்ம்ஸ் மருத்துவமனை உருவாகும். இதை விமர்சனம் செய்தவர்கள் கூட இதில் சிகிச்சை பெறுவார்கள்.

இன்றைக்கு எதிர்க்கட்சிகள் அம்மாவின் அரசுக்கு எதிராக பல்வேறு பொய் பிரச்சாரங்களை செய்து அதன் மூலம் 44,000 போராட்டங்களை நடத்தி சட்டம் ஒழுங்கை சீரழிக்க நினைத்தனர். அதையெல்லாம் முதலமைச்சர் சாதுரியமாக சமாளித்து, இன்றைக்கு சட்டம் ஒழுங்கை காப்பாற்றி தமிழகத்தை அமைதி பூங்காவாக உருவாக்கியுள்ளார்.

இன்றைக்கு தமிழகத்தில் நடிகர்கள் மற்றும் சில ஜாதி கட்சிகள் இந்த தேர்தல் நேரத்தில் வந்தாலும் மக்கள் மனதில் ஒரு போதும் எடுபடாது. ஏனென்றால் இன்றைக்கு முதலமைச்சருக்கு ஆதரவாக மக்களின் புயல் வீசுகிறது. இந்த ஆதரவு அலை இரட்டை இலைக்கு மக்கள் வாக்களிக்க தயாராக உள்ளனர்.

இவ்வாறு அமைச்சர் ஆர்.பி.உதயகுமார் பேசினார்.

பின்னர் கப்பலூர் தொழில்பேட்டை தலைவர் ரகுநாத ராஜா பேசியதாவது:-

இன்றைக்கு தொழில் முதலீடுகளை பொறுத்தவரை மற்ற மாநிலங்களை காட்டிலும் தமிழகம் முதன்மையாக திகழ்கிறது. குறிப்பாக எங்களைப் போன்ற தொழில் அதிபர்களுக்கு காவல் அரணாக முதலமைச்சர் திகழ்கிறார். இந்த கொரோனா நோய் காலத்திலும் கூட உரிய அறிவுரை வழங்கி தொடர்ந்து கடன் உதவி வழங்கி இன்றைக்கு உற்பத்தி திறனை முதலமைச்சர் அதிகரிக்க எங்களுக்கு சிறந்த வழியை காட்டி உள்ளார்.

அதுமட்டுமல்லாது இன்றைக்கு இந்த 22 மாதத்தில் மட்டும் தமிழகத்திற்கு 60,905 கோடி ரூபாய் மதிப்பில் தமிழகத்தில் தொழில் முதலீட்டை ஈர்த்து 1,60,349 மக்களுக்கு வேலைவாய்ப்பை முதலமைச்சர் உருவாக்கியுள்ளார். அதுமட்டுமல்லாது இந்தியாவிலேயே தமிழகத்தில் தான் உற்பத்தித்திறன் அதிகரித்து வருகிறது.

மேலும் முதலமைச்சர் எங்களை போன்ற தொழிலதிபர்களுக்கும், தொழிலாளர்களுக்கும் இணைப்பு பாலமாக இருந்து உரிய வழிகாட்டி வருவதால் இன்றைக்கு தமிழகம் இந்தியாவிலேயே முதலிடத்தில் திகழ்ந்து வருகிறது. வருகின்ற சட்டமன்ற தேர்தலில் வெற்றிபெற்று மீண்டும் முதலமைச்சராக எடப்பாடியார் வர வேண்டும். தற்போது இந்திய அளவில் தமிழகம் முதலிடத்தில் உள்ளது. எடப்பாடியார் மீண்டும் முதல்வராகி உலகளவில் தமிழகத்தை நிச்சயம் உருவாக்கி காட்டுவார்.

இவ்வாறு கப்பலூர் தொழில்பேட்டை தலைவர் ரகுநாத ராஜா பேசினார்.

பின்னர் ரோட்டரி மாவட்ட ஆளுநர் ஜெயகண்ணன் பேசியதாவது:-

எங்களை போன்ற அமைப்புகள் மக்களுக்கு தேவையான உதவிகளை செய்து வருகிறோம். மேலும் தமிழக முதலமைச்சர் தினந்தோறும் நாட்டு மக்களுக்கு செய்து வரும் திட்டங்களை உன்னிப்பாக கவனித்து வருகிறோம். நாங்கள் எந்த அரசியல் இயக்கத்தையும் சாராதவர்கள். ஆனாலும் முதலமைச்சரின் செயல்பாடு எங்களுக்கு மிகவும் பிடித்துள்ளது. ஏனென்றால் இன்றைக்கு அடித்தள மக்களுக்கு திட்டங்களை வழங்கி வருகிறார். குறிப்பாக தற்போது தமிழகம் முழுவதும் 2000 மினி கிளினிக்கை உருவாக்கியுள்ளார். இதன்மூலம் கிராம மக்களுக்கு மருத்துவ வசதி கிடைக்கும். இதுபோன்று எந்த மாநிலத்திலும் கிடையாது.

இந்த திட்டங்களை தொடங்கி வைத்ததற்காக பல்வேறு மாநிலங்களை சேர்ந்த எங்களை போன்ற அமைப்புகள் முதலமைச்சரை பாராட்டி உள்ளன. இன்றைக்கு மக்களுக்கு சேவை செய்வதில் இந்தியாவிலுள்ள மற்ற மாநில முதலமைச்சருக்கு ரோல்மாடலாக தமிழக முதலமைச்சர் திகழ்கிறார்.

இவ்வாறு ரோட்டரி மாவட்ட ஆளுநர் ஜெயகண்ணன் பேசினார்.

பின்னர் அரிமா இரண்டாம் துணை ஆளுநர் ரவீந்திரன் பேசியதாவது:-

நான் கொடைக்கானல் பகுதியை சேர்ந்தவன். எங்கள் பகுதிக்கு நாள்தோறும் வெளிநாட்டு சுற்றுலா பயணிகள் வருகின்றனர். அவர்களெல்லாம் தமிழகத்தின் சட்டம்-ஒழுங்கு சிறப்பாக உள்ளது. இதுபோன்று சுற்றுலாத்தலங்களில் சரியான வழிகாட்டுதலை தமிழக அரசு சிறப்பாக செய்து உள்ளது. குறிப்பாக எங்களை போன்ற வெளிநாட்டு பயணிகள் தைரியமாக வந்து செல்கிறோம் என்று என்னிடம் கூறுகின்றனர்.

அதுமட்டுமல்லாது, இன்றைக்கு தமிழகத்தில் தான் இயற்கை வளங்கள் எல்லாம் பாதுகாக்கப்பட்டுள்ளன. இன்றைக்கு முதலமைச்சர் செய்து வரும் சாதனை திட்டங்களால் மட்டுமல்லாது இன்றைக்கு உலகமே அஞ்சி நடுங்கிய கொரோனா நோயை கட்டுப்படுத்த முதலமைச்சர் எடுத்து வந்த நோய்த்தடுப்பு நடவடிக்கையால் இன்றைக்கு தமிழகத்தில் இந்த நோய் தாக்கம் குறைந்துள்ளது. இதுபோன்ற சாதனை திட்டங்கள் மூலம் இந்தியா முழுவதும் மட்டுமல்லாது, ஏன் உலகம் முழுவதும் பேசப்பட்டு வருவதை கண்டு எனது மனம் மகிழ்ச்சி அடைந்து தமிழனாக பிறந்ததற்காக நான் மகிழ்ச்சி அடைகிறேன்.

இவ்வாறு அரிமா இரண்டாம் துணை ஆளுநர் ரவீந்திரன் கூறினார்.

பாரதி யுவகேந்திரா நிறுவனர் நெல்லை பாலு பேசியதாவது:-

தனி ஒருவனுக்கு உணவில்லை எனில் ஜகத்தினை அழித்திடுவோம் என்று பாரதியார் பாடினார். ஆனால் இன்றைக்கு அந்த பாரதியார் இருந்திருந்தால் பாடி இருக்க மாட்டார். ஏனென்றால் இன்றைக்கு தமிழகத்திலுள்ள அனைத்து மக்களுக்கும் முழு உணவு பாதுகாப்பினை முதலமைச்சர் வழங்கியுள்ளார்.

அதுமட்டுமல்லாது இன்றைக்கு நோய்தொற்று காலத்தில் தன் உயிரைப் பற்றி கவலைப்படாமல் மக்கள் உயிர் தான் எனக்கு முக்கியம் என்று மாவட்டம் தோறும் ஆய்வு கூட்டம் நடத்தி நோய்த்தடுப்பு நடவடிக்கைகளை முதலமைச்சர் மேற்கொண்டதை இன்றைக்கு இந்திய தேசியமே முதலமைச்சரின் நிர்வாகத் திறமையை பாராட்டி வருகிறது.

சுயநலம் கொண்ட இந்த உலகில் பொது நலன் கொண்ட தலைவராக முதலமைச்சர் திகழ்கிறார். இன்றைக்கு தமிழகம் அனைத்து துறைகளிலும் முதலிடத்தில் இருந்து வருகிறது. நிச்சயம் வருகின்ற சட்டமன்ற தேர்தலில் எங்களை போன்ற கட்சி சார்பற்ற அமைப்புகள் எல்லாம் முதலமைச்சருக்கு ஆதரவாக செயல்பட உள்ளோம்.நிச்சயம் தேர்தலில் வெற்றி பெற்று இன்றைக்கு இந்திய அளவில் உள்ள தமிழகத்தின் சிறப்பை உலக அளவில் முதலமைச்சர் முன்னேற்றி காட்டுவார்.

இவ்வாறு பாரதி யுவகேந்திரா நிறுவனர் நெல்லை பாலு பேசினார்.

இந்நிகழ்வில் ராமநாதபுரம் மாவட்ட கழக செயலாளர் எம்.ஏ.முனியசாமி, மாவட்ட கழக நிர்வாகிகள் ஐயப்பன், திருப்பதி பஞ்சம்மாள், ஒன்றிய கழக செயலாளர்கள் அன்பழகன், ராமசாமி, கழக அம்மா பேரவை துணை செயலாளர் வெற்றிவேல், அனைத்துலக எம்.ஜி.ஆர். மன்ற இளைஞர் அணி துணை செயலாளர் ஏ.கே.பி.சுப்ரமணியன் உட்பட பலர் கலந்து கொண்டனர்.