தற்போதைய செய்திகள்

புரட்சித்தலைவி அம்மா தான் நிரந்தர பொதுச்செயலாளர் – கழக அமைப்பு செயலாளர் டி.ஜெயக்குமார் பேட்டி

சேலம், டிச. 3-

புரட்சித்தலைவி அம்மா தான் கழகத்தின் நிரந்தர பொதுச்செயலாளர் என்று கழக அமைப்பு செயலாளர் டி.ஜெயக்குமார் கூறினார்.

கழக அமைப்பு செயலாளரும், முன்னாள் அமைச்சருமான டி.ஜெயக்குமார் சேலத்தில் நேற்று செய்தியாளர்களுக்கு பேட்டி அளித்தார். அப்போது அவர் கூறியதாவது:-

வலிமை உள்ள எதிர்க்கட்சியாக தமிழகத்தில் கழகம் செயல்பட்டு வருகிறது. தி.மு.க.வுக்கும், கழகத்திற்கும் 3 சதவீத வாக்கு வித்தியாசம் தான் உள்ளது. பொதுமக்கள் கழகத்திற்கு அங்கீகாரம் அளித்து உள்ளனர்.

கழகத்தை பொறுத்தவரை நிரந்தர பொதுச் செயலாளர் அம்மா அவர்கள் தான். இதைதான் பொதுக்குழுவும் ஏற்று கொண்டுள்ளது. பொதுக்குழு அங்கீகாரம் செய்த ஒருங்கிணைப்பாளர், இணை ஒருங்கிணைப்பாளர் தான் தற்போது கழகத்தை வழி நடத்தி வருகின்றனர்.

தற்போது அறிவித்துள்ள உட்கட்சி தேர்தலை நடத்த ஏற்பாடுகள் செய்யப்பட்டு வருகிறது. புரட்சித்தலைவர் எம்.ஜி.ஆர். காலம் முதல் புரட்சித்தலைவி அம்மா காலம் வரை பொதுக்குழு அங்கீகாரம் செய்த நபர்களை கொண்டு தேர்தல் நடத்தப்பட்டு வருகிறது. புரட்சித்தலைவி அம்மா காலத்தில் எவ்வாறு உட்கட்சித் தேர்தல் நடைபெற்றதோ அவ்வாறுதான் உட்கட்சி தேர்தல் நடைபெற்று வருகிறது.

கழகத்தின் தலைமையிலான கட்சியினர் ஒன்றிணைந்து செயல்பட்டு வருகிறோம். கூட்டணியில் உள்ளவர்கள் வருவதும், வராததும் கூட்டணி கட்சிகளின் விருப்பம். அவர்களை கட்டாயப்படுத்த முடியாது.

நகர்ப்புற உள்ளாட்சி தேர்தலுக்கு கழகம் தற்போது தயாராக உள்ளது. கழகத்தினரிடம் இருந்து விருப்ப மனுக்கள் பெறப்பட்டு அதற்கான முன்னேற்பாடு பணிகள் தயாராக இருக்கிறது.

சசிகலா பொதுச்செயலாளர் என போட்டுக் கொள்வதற்கும், கழக கொடியை பயன்படுத்துவதற்கும் காவல்நிலையம் மற்றும் நீதிமன்றத்தில் வழக்கு தொடரப்பட்டு தலைமை கழகம் சட்டரீதியான நடவடிக்கைகளை செய்து வருகிறது.

சசிகலா குறித்து மீடியாக்கள் மட்டுமே ஒளிபரப்பி வருகின்றன. அன்வர் ராஜாவின் நீக்கம் கட்சிக்குள் எந்த ஒரு தாக்கத்தையும் ஏற்படுத்தாது. கழகத்தில் ஒருங்கிணைப்பாளர், இணை ஒருங்கிணைப்பாளர் மூலம் மிகப்பெரிய எழுச்சியும், புத்துணர்ச்சியும் ஏற்பட்டுள்ளது.

புரட்சித்தலைவி அம்மா மீது அன்பு கொண்டவர்கள் உண்மையான கழக ரத்தம் ஓடும் எந்த ஒரு நபரும் கழகத்தை விட்டு விலகி செல்ல மாட்டார்கள். அவ்வாறு விலகி செல்பவர்கள் எதற்கும் உதவாதவர்கள்.

தலைமை கழகத்திற்கு மகிழ்ச்சியாக செல்கிறோம், மகிழ்ச்சியாக விவாதிக்கிறோம், மகிழ்ச்சியாக திரும்பி வருகிறோம். மகிழ்ச்சி மட்டுமே நிலையாக இருக்கிறது.

இவ்வாறு முன்னாள் அமைச்சர் டி.ஜெயக்குமார் கூறினார்.