தற்போதைய செய்திகள்

விழுப்புரம் மாவட்டத்தில் 23 அம்மா மினி கிளினிக் – அமைச்சர் சி.வி.சண்முகம் திறந்து வைத்தார்

விழுப்புரம்

விழுப்புரம் மாவட்டம், பொது சுகாதாரம் மற்றும் நோய் தடுப்பு மருந்துத்துறை சார்பாக கண்டமங்கலம், கோலியனூர், காணை ஊராட்சி ஒன்றியங்கள் மற்றும் விழுப்புரம் நகராட்சிக்குட்ப்பட்ட பகுதிகளில் அமைக்கப்பட்டுள்ள முதலமைச்சரின் அம்மா மினி கிளினிக்குகளை சட்டம், நீதிமன்றங்கள், சிறைச்சாலைகள் மற்றும் கனிமவளத்துறை அமைச்சர் சி.வி.சண்முகம் திறந்து வைத்தார்.

முதலமைச்சர் தமிழகத்தில் வசிக்கும் ஏழை எளிய பாமரமக்கள் நல்ல சிகிச்சை பெற வேண்டும் என்பதற்காக ஏழை மக்கள் வசிக்கும் பகுதிகளிலேயே முதலமைச்சரின் அம்மா மினி கிளினிக்குகள் அமைக்கப்படும் என அறிவித்து இத்திட்டத்தினை உடனடியாக செயல்படுத்தி தமிழகம் முழுவதும் இரண்டாயிரம் முதலமைச்சரின் அம்மா மினி கிளினிக் தொடங்கப்பட்டு வருகிறது.

விழுப்புரம் மாவட்டத்தில் முதற்கட்டமாக 23 முதலமைச்சரின் அம்மா மினி கிளினிக்குகள் அமைக்கப்பட உள்ளது.
அதன்படி இன்றைய தினம் விழுப்புரம் மாவட்டத்தில் பொது சுகாதாரம் மற்றும் நோய் தடுப்பு மருந்துத்துறை சார்பாக கண்டமங்கலம் ஊராட்சி ஒன்றியத்திற்குட்பட்ட வடவாம்பலம் மற்றும் வி.அகரம் ஆகிய ஊராட்சிகளிலும், விழுப்புரம் நகராட்சிக்குட்பட்ட பாணாம்பட்டு பகுதியிலும், கோலியனூர் ஊராட்சி ஒன்றியத்திற்குட்ப்பட்ட திருபாட்சனூர், காவனிப்பாக்கம் மற்றும் ஆசாக்குளம் ஆகிய ஊராட்சிகளிலும் மற்றும் காணை ஊராட்சி ஒன்றியத்திற்குட்பட்ட கோனூர் ஊராட்சி உள்ளிட்ட இடங்களில் அமைக்கப்பட்டுள்ள முதலமைச்சரின் அம்மா மினி கிளினிக்குகளை அமைச்சர் சி.வி.சண்முகம் திறந்து வைத்தார்.

இந்நிகழ்ச்சிகளில் மாவட்ட ஆட்சித்தலைவர் ஆ.அண்ணாதுரை, மாவட்ட காவல் கண்காணிப்பாளர் எஸ்.ராதாகிருஷ்ணன், சட்டமன்ற உறுப்பினர்கள் எம்.சக்கரபாணி(வானூர்), எம்.ஆர்.முத்தமிழ்ச்செல்வன் (விக்கிரவாண்டி), கூடுதல் ஆட்சியர்(வருவாய்) ஸ்ரேயா.பி.சிங், துணை இயக்குநர்(சுகாதாரபணிகள்) செந்தில்குமார், வருவாய் கோட்டாட்சியர் ராஜேந்திரன், விழுப்புரம் ஆவின் தலைவர் பேட்டை.வி.முருகன், மாவட்ட மத்திய கூட்டுறவு வங்கி தலைவர் எஸ்.முரளி (எ) ரகுராமன், மாவட்ட மொத்த பண்டகசாலை தலைவர் பசுபதி, ஒன்றிய செயலாளர்கள் ராமதாஸ், கண்ணன், சுரேஷ்பாபு, ராஜா, பன்னீர், முகுந்தன், முன்னாள் வளவனூர் சேர்மன் முருகவேல், கழக நிர்வாகிகள் ராமதாஸ், சக்திவேல், குமரன், தயா மற்றும் துறை சார்ந்த அலுவலர்கள் கலந்து கொண்டனர்.