தற்போதைய செய்திகள்

எதிர்க்கட்சியை பழிவாங்குவது தான் விடியா தி.மு.க. அரசின் நோக்கம் – முன்னாள் அமைச்சர் சி.வி.சண்முகம் குற்றச்சாட்டு

விழுப்புரம், டிச. 4-

எதிர்க்கட்சியை பழிவாங்குவது தான் விடியா தி.மு.க. அரசின் நோக்கம் என்றும், ஸ்டாலினின் கைக்கூலியாக லஞ்ச ஒழிப்புத்துறை செயல்படுகிறது என்றும் முன்னாள் அமைச்சர் சி.வி.சண்முகம் குற்றம் சாட்டியுள்ளார்.

விழுப்புரத்தில் உள்ள மாவட்ட கழக அலுவலகத்தில் மாவட்ட கழக செயலாளரும், முன்னாள் அமைச்சருமான சி.வி.சண்முகம் நேற்று காலை கழக அமைப்பு தேர்தலை நடத்துவது தொடர்பாக நிர்வாகிகளுடன் ஆலோசனை நடத்தினர்.

இக்கூட்டம் முடிவடைந்ததும் முன்னாள் அமைச்சர் சி.வி.சண்முகம் செய்தியாளர்களுக்கு பேட்டி அளித்தார். அப்போது அவர் கூறியதாவது:-

தமிழகம் தற்போது மர்ம தேசமாக உள்ளது. ஆட்சியாளர்கள், உயர் அதிகாரிகள் அச்ச உணர்வோடுதான் செயல்பட்டு வருகிறார்கள். தமிழக அரசின் நிர்வாகத்தை யார் செய்கிறார்கள் என்று முதல்வருக்கு தெரியுமா? என தெரியாது. இந்த விடியா அரசு எதிர்க்கட்சியை பழிவாங்கும் நோக்கோடு செயல்பட்டு வருகிறது.

இன்னமும் கழகத்தை குறை சொல்லி வருகிறார்கள். கழகத்தின் மீதான பழிவாங்கும் நடவடிக்கையை சட்ட ரீதியாக சந்திக்க நாங்கள் தயாராக உள்ளோம். அரசு ஊழியர்கள் தயவு இல்லாமல் தி.மு.க. ஆட்சி அமைந்து இருக்க முடியாது. அரசு ஊழியர் குடும்பத்தினர் உட்பட 60 லட்சம் வாக்காளர்களில் பெரும்பான்மையானோர் தி.மு.க.வுக்கு வாக்களித்தனர்.

ஸ்டாலினின் கைக்கூலியாக லஞ்ச ஒழிப்புத்துறை செயல்படுகிறது. முன்னாள் அமைச்சர் எஸ்.பி.வேலுமணி வீட்டில் லஞ்ச ஒழிப்புத்துறை சோதனை நடைபெற்று கொண்டிருக்கும் போதே லஞ்ச ஒழிப்புத்துறை தலைவர் கந்தசாமி முதலமைச்சரை ஏன் சந்தித்தார்? வேலுமணியை கைது செய்ய வேண்டும் என்பது தான் இலக்கு. ஆனால் அதற்காக ஆதாரங்கள் கிடைக்கவில்லை. அதனால் முன்னாள் அமைச்சர் வேலுமணி கைது செய்யப்படவில்லை. இந்த அரசுக்கு ஒத்துழைக்காத அதிகாரிகள் மீது நடவடிக்கை எடுக்கப்பட்டு மிரட்டப்படுகிறார்கள்.

நேற்று (நேற்று முன்தினம்) மாசு கட்டுப்பாட்டு வாரிய தலைவர் வெங்கடாசலம் தற்கொலை செய்து கொண்டிருக்கிறார். நேர்மையானவர். ஆட்சி மாற்றத்திற்கு பின் அவரை ராஜினாமா செய்ய இந்த அரசு வற்புறுத்தியது. ஆனால் அவர் மறுத்து விட்டார். அதன் பின் அவர் பதவி நீக்கம் செய்யப்பட்டார். வீட்டில் சோதனை நடத்தி ரூ 11 லட்சம் பணம், 5 கிலோ தங்கம் வைத்திருந்ததாக வழக்குப்பதிவு செய்யப்பட்டது.

தி.மு.க. அமைச்சர்கள் 13 பேர் மீது சொத்துக் குவிப்பு வழக்கு நிலுவையில் உள்ளது. வழக்குக்காக வெங்கடாசலம் அச்சப்படவில்லை. அவர் தற்கொலை செய்து கொள்ள வேண்டிய அவசியம் என்ன? அவர் பகலில் தற்கொலை செய்து கொண்டுள்ளார்.

அவருக்கு என்ன நடைபெற்றது. ஒரு மாதம் முன்பு தொழில் கல்வித்துறைக்கு கட்டிடம் கட்ட பொதுப்பணித்துறை அலுவலர் நியமிககப்பட்டார். அவர் வீட்டில் சோதனை நடைபெற்று ரூ.2.1/4 கோடி கைப்பற்றப்பட்டது. ஆனால் அவர் மீது மேல் நடவடிக்கை எடுக்கவில்லை. அவருக்கு 10 நாளில் பதவி உயர்வு அளிக்கப்படுகிறது. எதிர்க்கட்சிகள் கேள்வி கேட்டதால் அவர் கைது செய்யப்பட்டார்.

முன்னாள் கழக அரசு மீது குற்றம் சுமத்த வேண்டும் என்று வற்புறுத்தப்பட்டு மறுத்ததால் அச்சுறுத்தப்பட்டதால் வெங்கடாசலம் தற்கொலை செய்து கொண்டாரா? எப்போதெல்லாம் தி.மு.க.வினர் மீது குற்றம் சாட்டப்படுகிறதோ அப்போதெல்லாம் தற்கொலை சம்பவங்கள் நடைபெறுகிறது. அண்ணாநகர் ரமேஷ், சாதிக்பாட்சா தற்கொலை சம்பவங்களை உதாரணமாக சொல்லலாம். எனவே வெங்கடாசலம் மர்ம மரணத்தை சி.பி.ஐ. விசாரணை செய்ய வேண்டும்.

தமிழக அரசின் மீது நம்பிக்கை இல்லை. இந்த அரசில் அதிகாரிகள் மிரட்டப்படுகிறார்கள். இந்த அரசு அதிகாரிகளை தற்கொலைக்கு தூண்டுகிறது.

இவ்வாறு முன்னாள் அமைச்சர் சி.வி.சண்முகம் கூறினார்.

பேட்டியின்போது சட்டமன்ற உறுப்பினர்கள் சக்கரபாணி, அர்ஜூனன், மாவட்ட கழக நிர்வாகிகள் வெங்கடேசன், முரளி ரகுராமன், சக்திவேல், ஜெயபிரகாஷ், நகர கழக செயலாளர்கள் பசுபதி, ராமதாஸ், ஒன்றிய செயலாளர்கள் பேட்டை முருகன், சுரேஷ்பாபு, ராமதாஸ், கண்ணன் உள்பட பலர் உடனிருந்தனர்.