சிறப்பு செய்திகள்

போடியில் ரூ.2 கோடியில் பல்வேறு திட்டப் பணிகள் – துணை முதலமைச்சர் ஓ.பன்னீர்செல்வம் திறந்து வைத்தார்

தேனி

துணை முதலமைச்சர் ஓ.பன்னீர்செல்வம் தேனி மாவட்டம், போடிநாயக்கனூர் சட்டமன்ற தொகுதிக்குட்பட்ட பல்வேறு பகுதிகளில் நேற்று மாவட்ட ஆட்சித்தலைவர் ம.பல்லவி பல்தேவ் முன்னிலையில் மக்கள் நல்வாழ்வு மற்றும் குடும்ப நலத்துறையின் சார்பில் 8 இடங்களில் முதலமைச்சரின் அம்மா மினி கிளினிக்குகளை திறந்து வைத்ததோடு மற்றும் ஊரக வளர்ச்சி மற்றும் ஊராட்சித்துறை, கால்நடை பராமரிப்புத்துறை, நகராட்சி நிர்வாகம் மற்றும் குடிநீர் வழங்கல் துறை ஆகிய துறைகளின் சார்பில் ரூ.2 கோடி மதிப்பீட்டில் முடிவுற்ற பல்வேறு திட்டப் பணிகளை திறந்து வைத்தார்.

அம்மா அவர்களின் தமிழக அரசு பொதுமக்களின் நலன் கருதி அவர்களின் உடல் நலத்தை பேணிக்காக்கும் அடிப்படையில், மக்கள் நல்வாழ்வு மற்றும் குடும்ப நலத்துறையின் சார்பில் பல எண்ணற்ற திட்டங்களை வழங்கி, பொதுமக்களை பாதுகாத்து வருகிறது. தமிழகத்தில் அரசு மருத்துவமனைகள், ஆரம்ப சுகாதார நிலையங்கள் மற்றும் மருத்துவ முகாம்கள் உள்ளிட்டவைகள் மூலம் பொதுமக்களை நலன் பெற செய்து வருகிறது. அதுமட்டுமின்றி கிராமப்புற மக்கள் எளிதில் மருத்துவ சிகிச்சை பெறுகின்ற வகையில் முதலமைச்சரின் அம்மா மினி கிளினிக் என்ற திட்டத்தினை முதலமைச்சர் கடந்த 14.12.2020 அன்று தொடங்கி வைத்தார்.

அதனைத்தொடர்ந்து, தமிழகம் முழுவதும், முதலமைச்சரின் அம்மா மினி கிளினிக் தொடங்க நடவடிக்கைகள் மேற்கொள்ளப்பட்டு, அனைத்து மாவட்டங்களிலும் தொடங்கி வைக்கப்பட்டு வருகிறது. துணை முதலமைச்சர் அறிவுறுத்தலின்படி, தேனி மாவட்டத்தில் மாவட்டம் முழுவதும் மொத்தம் 16 இடங்களில் முதலமைச்சரின் அம்மா மினி கிளினிக் தொடங்க நடவடிக்கைகள் மேற்கொள்ளப்பட்டுள்ளது.

அதன்படி, போடிநாயக்கனூர் சட்டமன்ற தொகுதிக்குட்பட்ட பொட்டிபுரம், பழனிசெட்டிபட்டி, அம்பாசமுத்திரம், போ.அம்மாபட்டி, போடி மெட்டு, கூழையனூர், துரைராஜபுரம், உப்புக்கோட்டை மற்றும் ஆண்டிபட்டி சட்டமன்ற தொகுதிக்குட்பட்ட தேக்கம்பட்டி, மகாராஜமெட்டு, ரெங்கசமுத்திரம், கம்பம் சட்டமன்ற தொகுதிக்குட்பட்ட கோகிலாபுரம், சீப்பலாக்கோட்டை, பெரியகுளம் சட்டமன்ற தொகுதிக்குட்பட்ட ஊஞ்சாம்பட்டி, கோட்டார்பட்டி, வைகை புதூர் ஆகிய 16 பகுதிகளில் முதலமைச்சரின் அம்மா மினி கிளினிக் தொடங்கப்பட உள்ளது.

அதனடிப்படையில் நேற்று பழனிசெட்டிபட்டி, துரைராஜபுரம், போ.அம்மாபட்டி, பொட்டிபுரம், உப்புக்கோட்டை, கூழையனூர், அம்பாசமுத்திரம், போடிமெட்டு ஆகிய பகுதிகளில் அமைக்கப்பட்டுள்ள முதலமைச்சரின் அம்மா மினி கிளினிக்குகளை துணை முதலமைச்சர் ஓ.பன்னீர்செல்வம் திறந்து வைத்து கர்ப்பிணி தாய்மார்களுக்கு ஊட்டச்சத்து பெட்டகங்களை வழங்கினார்.

அதனைத்தொடர்ந்து, போடிநாயக்கனூர் சட்டமன்ற தொகுதிக்குட்பட்ட கோடாங்கிபட்டி ஊராட்சியில் 5-வது மாநில நிதி ஆணை மூலதன மானிய நிதித்திட்டத்தின் கீழ் ரூ.8.80 லட்சம் மதிப்பீட்டில் கட்டப்பட்டுள்ள அங்கன்வாடி மைய கட்டடம், நபார்டு திட்டத்தின் கீழ் ரூ.31.50 லட்சம் மதிப்பீட்டில் கட்டப்பட்டுள்ள கால்நடை மருந்தகம், போ.அம்மாபட்டி ஊராட்சியில் மகாத்மா காந்தி தேசிய ஊரக வேலைவாய்ப்பு உறுதித்திட்டத்தின் கீழ் ரூ.8.33 லட்சம் மதிப்பீட்டில் கட்டப்பட்டுள்ள அங்கன்வாடி மைய கட்டடம், போ.மீனாட்சிபுரம் பேரூராட்சியில் நபார்டு திட்டத்தின் கீழ் ரூ.31.50 லட்சம் மதிப்பீட்டில் கட்டப்பட்டுள்ள கால்நடை மருந்தகம்,

சில்லமரத்துப்பட்டி ஊராட்சியில் மகாத்மா காந்தி தேசிய ஊரக வேலைவாய்ப்பு உறுதித்திட்டத்தின் கீழ் ரூ.9.70 லட்சம் மதிப்பீட்டில் கட்டப்பட்டுள்ள அங்கன்வாடி மைய கட்டடம், பொட்டிபுரம் ஊராட்சியில் மகாத்மா காந்தி தேசிய ஊரக வேலைவாய்ப்பு உறுதித் திட்டத்தின் கீழ் ரூ.9.08 லட்சம் மதிப்பீட்டில் கட்டப்பட்டுள்ள அங்கன்வாடி மைய கட்டடம், சிலமலை ஆரம்ப சுகாதார நிலையத்தில் ரூ.7.30 லட்சம் மதிப்பீட்டில் ஏற்படுத்தப்பட்டுள்ள சுகாதார செயல் விளக்க பூங்கா, இராசிங்காபுரம் மற்றும் நாகலாபுரம் ஊராட்சி மன்ற அலுவலகத்தில் தலா ரூ.7.88 லட்சம் மதிப்பீட்டில் ஏற்படுத்தப்பட்டுள்ள குடிநீர் சுத்திகரிப்பு கருவி என சுமார் ரூ.2கோடி மதிப்பிலான பல்வேறு திட்டப்பணிகளை பொதுமக்களின் பயன்பாட்டிற்கு திறந்து வைத்தார்.

அதனைத்தொடர்ந்து, எம்.டி.தனி.22 மீனாட்சிபுரம் தொடக்க வேளாண்மைக் கூட்டுறவு சங்கத்தில் கூட்டுறவுத்துறையின் சார்பில் அன்னை தெரசா மகளிர் சுய உதவிக்குழுவினர்களுக்கு ரூ. 6 லட்சம் மதிப்பிலான கடனுதவியினையும், பயிர் கடன் வழங்கும் திட்டத்தின் கீழ் 2 பயனாளிகளுக்கு ரூ.3.78 லட்சம் மதிப்பிலான கடனுதவிகளையும் துணை முதலமைச்சர் ஓ.பன்னீர்செல்வம் வழங்கினார்.

இந்நிகழ்வுகளின் போது, தேனி நாடாளுமன்ற உறுப்பினர் ப.ரவீந்திரநாத், கம்பம் தொகுதி சட்டமன்ற உறுப்பினர் எஸ்.டி.கே.ஜக்கையன், மாவட்ட ஊராட்சித்தலைவர் க.ப்ரிதா, மாவட்ட ஊரக வளர்ச்சி முகமை திட்ட இயக்குநர் பெ.திலகவதி, கூட்டுறவு சங்கங்களின் இணைப்பதிவாளர் எம்.ஏகாம்பரம், கால்நடை பராமரிப்புத்துறை இணை இயக்குநர் பீ.நடராஜன் துணை இயக்குநர் (சுகாதாரப்பணிகள்) செந்தில்குமார், பொதுப்பணித்துறை செயற்பொறியாளர் மாதவன், மாவட்ட ஊரக வளர்ச்சி முகமை செயற்பொறியாளர் எஸ்.கவிதா, போடிநாயக்கனூர் ஊராட்சி ஒன்றிய குழுத்தலைவர் சுதாமூர்த்தி, வட்டாட்சியர்கள், நகராட்சி ஆணையாளர்கள், வட்டார வளர்ச்சி அலுவலர்கள் உட்பட பலர் கலந்து கொண்டனர்.

மேலும், பெரியகுளம் சட்டமன்ற தொகுதிக்குட்பட்ட ஊஞ்சாம்பட்டி, வைகை புதூர் (காந்திநகர் காலனி), ஆண்டிபட்டி சட்டமன்ற தெகுதிக்குட்பட்ட ரங்கசமுத்திரம், தேக்கம்பட்டி கம்பம் சட்டமன்ற தொகுதிக்குட்பட்ட சீப்பாலக்கோட்டை, கோகிலாபுரம் ஆகிய பகுதிகளில் அமைக்கப்பட்டுள்ள முதலமைச்சரின் அம்மா மினி கிளினிக்குகளை இன்று (18-ந்தேதி) துணை முதலமைச்சர் ஓ.பன்னீர்செல்வம் திறந்து வைக்கவுள்ளார்.