சிறப்பு செய்திகள்

அம்மாவின் புகழை மறைக்க நினைப்பவர்களின் கொட்டத்தை அடக்குவோம் – கழக ஒருங்கிணைப்பாளர்கள் சூளுரை

சென்னை,டிச.6-

அம்மாவின் புகழை மறைக்க நினைப்பவர்களின் கொட்டத்தை அடக்குவோம் என்று அம்மாவின் நினைவிடத்தில் நடைபெற்ற உறுதிமொழி ஏற்பு நிகழ்ச்சியில் கழக ஒருங்கிணைப்பாளர்கள் சூளுரைத்தனர்.

5-ம் ஆண்டு நினைவு தினத்தை முன்னிட்டு சென்னை மெரினா கடற்கரையில் உள்ள கழகத்தின் நிரந்தர பொதுச்செயலாளர், இதயதெய்வம் புரட்சித்தலைவி அம்மா அவர்களின் நினைவிடத்தில் நேற்று மலர்வளயைம் வைத்து அஞ்சலி செலுத்திய கழக ஒருங்கிணைப்பாளர் ஓ.பன்னீர்செல்வம் தலைமையில் கழக இணை ஒருங்கிணைப்பாளர் எடப்பாடி கே.பழனிசாமி உள்பட கழகத்தினர் அனைவரும் உறுதிமொழி ஏற்றுக்கொண்டனர்.
அதன் விவரம் வருமாறு:-

இந்திய அரசியல் வானில், சுடர்மிகு நட்சத்திரமாய் ஒளி வீசிய நம்முடைய `தங்கத் தாரகை’ புரட்சித் தலைவி அம்மா அவர்களின் நினைவு நாளான இன்று, நம் அன்பிற்கும், போற்றுதலுக்கும் உரிய
இதய தெய்வம் புரட்சித் தலைவி அம்மா அவர்கள், நீடுதுயில் கொள்ளும் இந்நினைவிடத்தில் நிற்கும் நாமும், உலகெங்கும் வாழ்கின்ற கழக உடன்பிறப்புகளும், பின்வரும் உறுதிமொழிகளை ஏற்போமாக !


இந்திய வரலாற்றில், இணையில்லா நம் தலைவி;
தமிழக வரலாற்றில், நிகரில்லா நம் தலைவி;
தமிழ் இனத்தில், துரோகிகளை வென்றெடுத்த வீரமங்கை;
தாய்க்குலத்தின் துயர் துடைத்த, கருணை கொண்ட ஈரமங்கை;
எதிரிகளின் சூழ்ச்சிகளை, உடைத்தெறிந்த இரும்பு மங்கை;
தமிழர்களின் இதயங்களில், இனிக்கின்ற கரும்பு மங்கை, நம் அம்மா அவர்கள்.


நம் உணர்வுகளில் நிறைந்திட்ட நம் அம்மா…
நம் உதிரத்தில் நிறைந்திட்ட நம் அம்மா… மறைந்திட்ட இந்நாளில்,
கடல்போல் தொண்டர்கள் கூட்டம்… உறுதி ஏற்க; சபதம் ஏற்க; குவிந்திட்ட வீரர் கூட்டம். தீயசக்தி தீண்டாமல், தமிழ் நாடு தலைநிமிர, கழகம் தந்தார் நம் தலைவர்…
வள்ளல் தந்த கழகத்தை, அரண்போல காத்து நின்ற,
நம் அம்மாவின் வழி நடக்க, உறுதி ஏற்கிறோம்… உறுதி ஏற்கிறோம்.
ஹ பசியில்லா தமிழ் நாட்டை உருவாக்கி, மெருகேற்றி;
தலைசிறந்த மாநிலமாய், பலர் போற்ற… பார் போற்ற… வாழ்ந்திட்ட நம் அம்மா,
அழியாத புகழ் சிறக்க, உறுதி ஏற்கிறோம்… உறுதி ஏற்கிறோம்.

அம்மாவின் ஆட்சியிலே, சிறப்பான திட்டங்கள்;
மக்கள் செழிப்பான திட்டங்கள்…
ஏழைகள் பசியாற அம்மா உணவகங்கள்;
எளியவர்கள் நலம் பெறவே, அம்மா மருந்தகங்கள்…
அதன் பெயர் மாற்ற நினைக்கின்றார்;
அம்மாவின் புகழ் மறைக்க நினைக்கின்றார்…
திட்டத்தை நிறுத்திட்டால்,
அவர்களின் கொட்டத்தை அடக்கிடுவோம் என்று,
உறுதி ஏற்கிறோம்… உறுதி ஏற்கிறோம்.

இவ்வாறு ஒருங்கிணைப்பாளர்கள் சூளுத்தனர்.