தற்போதைய செய்திகள்

கழகத்தை முடக்க நினைக்கும் ஸ்டாலின் எண்ணம் பலிக்காது – புதுச்சேரி கிழக்கு மாநில செயலாளர் அன்பழகன் ஆவேசம்

சென்னை, டிச. 7-

ஒருங்கிணைப்பாளர்கள் மீது தாக்குதல் நடத்தி கழகத்தை முடக்க நினைக்கும் ஸ்டாலின் எண்ணம் பலிக்காது என்று புதுச்சேரி கிழக்கு மாநில கழக செயலாளர் அன்பழகன் கூறினார்.

கழகத்தின் நிரந்தர பொதுச்செயலாளர் புரட்சித்தலைவி அம்மா அவர்களின் 5-ம் ஆண்டு நினைவு தினத்தை முன்னிட்டு சென்னை மெரினா கடற்கரையில் அமைந்துள்ள அவரது நினைவிடத்தில் நேற்று காலை மரியாதை செலுத்த சென்ற கழக ஒருங்கிணைப்பாளர் ஓ.பன்னீர்செல்வம், கழக இணை ஒருங்கிணைப்பாளர் எடப்பாடி ேக.பழனிசாமி ஆகியோரின் காரை வழிமறித்து தாக்குதல் நடத்திய அ.ம.மு.க.வினரை கண்டித்து தமிழகம் முழுவதும் கழக நிர்வாகிகள் ஆர்ப்பாட்டம் நடத்தினர்.

இதேபோல் புதுச்சேரி கிழக்கு மாநில கழகம் சார்பில் மாநில செயலாளர் அன்பழகன் தலைமையில் உப்பளம் தலைமை அலுவலகம் எதிரே சாலை மறியல் போராட்டம் நடைபெற்றது. அப்போது ஒருங்கிணைப்பாளர்கள் மீது தாக்குதல் நடத்திய அ.ம.மு.க.வினரை கைது செய்ய வலியுறுத்தியும், கழக ஒருங்கிணைப்பாளர்களுக்கு உரிய பாதுகாப்பு வழங்காத தி.மு.க. அரசை கண்டித்தும் கோஷங்கள் எழுப்பப்பட்டன.

இப்போராட்டத்தில் மாநில புரட்சித்தலைவி பேரவை செயலாளர் பாஸ்கர், மாநில கழக துணைத்தலைவர் ராஜாராமன், மாநில கழக இணை செயலாளர்கள் கணேசன், அன்பானந்தம், துணை செயலாளர் கிருஷ்ணமூர்த்தி, மாநில அண்ணா தொழிற்சங்க பேரவை செயலாளர் பாப்புசாமி, அமைப்பு சாரா ஓட்டுநர்கள் அணி செயலாளர் செல்வம், இலக்கிய அணி செயலாளர் ராமசாமி, மாநில எம்.ஜி.ஆர். மன்ற தலைவர் மோகன்தாஸ், துணை செயலாளர் கணபதி, மாநில புரட்சித்தலைவி பேரவை துணை செயலாளர் பிரகாஷ், மாநில எம்.ஜி.ஆர். இளைஞரணி துணைத்தலைவர் குணாளன் உள்பட பலர் கலந்து கொண்டனர்.

இதன் பின்னர் புதுச்சேரி கிழக்கு மாநில கழக செயலாளர் அன்பழகன் செய்தியாளர்களிடம் கூறியதாவது:-

புரட்சித்தலைவி அம்மா அவர்களின் நினைவு நாளை முன்னிட்டுசென்னை மெரினா கடற்கரையில் அமைந்துள்ள அவரது நினைவிடத்தில் அஞ்சலி செலுத்த சென்ற முன்னாள் முதலமைச்சர்களான கழக ஒருங்கிணைப்பாளர் ஓ.பன்னீர்செல்வம், கழக இணை ஒருங்கிணைப்பாளர் எடப்பாடி கே.பழனிசாமி ஆகியோர் மீது சில தீய சக்திகள் தாக்குதல் நடத்தியுள்ளன.

புரட்சித்தலைவி அம்மா அவர்களின் மறைவிற்கு பிறகு தமிழகத்தின் மக்கள் நலனுக்காக செயல்படும் கழக ஒருங்கிணைப்பாளர்களுக்கு உரிய பாதுகாப்பை அளிக்காமல் தமிழக தி.மு.க அரசு குற்றவாளிகளுக்கு துணை நிற்பதற்கு கண்டனம் தெரிவித்துக் கொள்கிறேன்.

இது போன்ற காட்டுமிராண்டித்தனமான செயல்களை ஊக்குவித்து கழக தலைவர்களுக்கு அச்சுறுத்தல் ஏற்படுத்தி கழகத்தை முடக்கி விடலாம் என்ற தி.மு.கவின் எண்ணம் ஒரு போதும் நிறைவேறாது. தமிழகத்தில் முன்னாள் முதல்வர்களுக்கு பாதுகாப்பு இல்லாத சூழ்நிலையை உருவாக்கிய தமிழக முதலமைச்சர் ஸ்டாலினை கண்டித்தும், கழக ஒருங்கிணைப்பாளர்கள் மீது தாக்குதல் நடத்தியவர்களை உடனடியாக குண்டாசில் கைது செய்ய வலியுறுத்தியும் புதுச்சேரி மாநில கழகம்க சார்பில் சாலை மறியல் போராட்டம் நடத்தினோம்.

இவ்வாறு அவர் கூறினார்.