தற்போதைய செய்திகள்

மக்களின் தேவைகளை பூர்த்தி செய்யும் அரசாக கழக அரசு திகழ்கிறது – அமைச்சர் பா.பென்ஜமின் பெருமிதம்

அம்பத்தூர்

மக்களின் தேவைகளை பூர்த்தி செய்யும் அரசாக கழக அரசு திகழ்கிறது என்று அமைச்சர் பா.பென்ஜமின் பெருமிதத்துடன் தெரிவித்துள்ளார்.

திருவள்ளூர் கிழக்கு மாவட்டம் மதுரவாயல் சட்டமன்றத் தொகுதியில் பகுதி கழக செயலாளரும் ஊரகத்தொழில் துறை அமைச்சருமான பா.பென்ஜமின் தொகுதிக்குட்பட்ட வில்லிவாக்கம் ஊராட்சி ஒன்றியம் அயப்பாக்கம் ஊராட்சியில்
ஏழை எளிய தாய்மார்கள் மற்றும் துப்புரவு தொழிலாளர்கள் வகையில் 6000 குடும்பங்களுக்கு அரிசி, பருப்பு, காய்கறி தொகுப்பை வழங்கினார்.

கொரோனா ஊரடங்கால் பாதிக்கப்பட்டுள்ள மக்களுக்கு அரசின் சார்பிலும் கழகத்தின் சார்பிலும் அவர்களின் அத்தியாவசிய தேவைகளை பூர்த்தி செய்யும் வகையில் நிவாரண பொருட்கள் வழங்கப்பட்டு வருகின்றன. அந்த வகையில் மதுரவாயல் சட்டமன்ற தொகுதிக்குட்பட்ட முகப்பேர் கிழக்கு, நொளம்பூர், மதுரவாயல் சீமாத்தம் கோயில், ஏரிக்கரை தெரு, மதுரவாயல், போரூர், நெற்குன்றம், காரம்பாக்கம் பகுதி, வில்லிவாக்கம் ஊராட்சி ஒன்றியத்துக்கு உட்பட்ட அடையாளம்பட்டு ஊராட்சி, வானகரம் ஊராட்சி, ஆகிய பகுதிகளில் ஏழை குடும்பங்கள் தேர்ந்தெடுக்கப்பட்டு அவர்களுக்கு அரிசி, பருப்பு, எண்ணெய், காய்கறி தொகுப்பு முக கவசம் ஆகியவைகளை ஊரகத்தொழில் துறை அமைச்சரும், மதுரவாயல் பகுதி கழக செயலாளருமான பா.பென்ஜமின் வழங்கி வருகிறார்.

அந்த வகையில் நேற்று மதுரவாயல் சட்டமன்றத் தொகுதிக்குட்பட்ட வில்லிவாக்கம் ஊராட்சி ஒன்றியம் அயப்பாக்கம் ஊராட்சியில் 6000 குடும்பங்களுக்கு அரிசி பருப்பு எண்ணெய் காய்கறி உள்ளிட்ட தொகுப்புகளை அமைச்சர் பா.பென்ஜமின் வழங்கினார்.

பின்னர் அமைச்சர் பா.பென்ஜமின் செய்தியாளர்களிடம் கூறியதாவது;-

தமிழக முதலமைச்சர் எடப்பாடி கே.பழனிசாமி, துணை முதலமைச்சர் ஓ.பன்னீர்செல்வம் ஆகியோர் ஆணைக்கிணங்க மதுரவாயல் சட்டமன்றத்தொகுதி முழுவதும் சுமார் 1 லட்சம் குடும்பங்களுக்கு அரிசி, பருப்பு, எண்ணெய் உள்ளிட்டவைகளை வழங்கி வருகிறோம். இரண்டாம் கட்டமாக இன்று அயப்பாக்கம் ஊராட்சியில் 6 ஆயிரம் ஏழை குடும்பங்களுக்கு அரிசி, பருப்பு, காய்கறிகளை வழங்கினோம், மக்களின் தேவைகளை நிறைவேற்றும் வகையில் அவர்களுக்கு தேவையானவற்றை வழங்கும் அரசாக அம்மாவின் வழியில் வரும் முதலமைச்சர் எடப்பாடியார் அரசு திகழ்கிறது.

கொரோனா வைரஸை குறைக்கும் வகையில் முதலமைச்சர் அரசின் அனைத்து துறைகளையும் வேகப்படுத்திய காரணத்தினால் கடந்த ஒரு வாரமாக கொரோனா தாக்கம் தமிழகத்திலும் குறிப்பாக சென்னையிலும் குறைந்த அளவே காணப்படுகிறது. அரசு பரிந்துரையின் பேரில் சித்தா மூலமாகவும் நோயாளிகள் குணப்படுத்தப்படுகின்றனர்.

பாதிப்படையும் நபர்கள் எண்ணிக்கை குறைவதால் பரிசோதனை அளவு குறைக்கப்படுவதாக சிலர் காரணம் கூறுகின்றனர். ஆனால் அரசு ஒரு நாளைக்கு எத்தனை பரிசோதனை செய்ய நிர்ணயம் செய்ததோ அவ்வளவு பரி சோதனைகள் நடந்து வருகின்றன. அரசின் முயற்சியால்தான் இன்று கொரோனாவின் தாக்கம் தமிழகத்தில் குறைந்த அளவு காணப்படுகிறது.

அரசின் அனைத்து நடவடிக்கைக்கு பொதுமக்கள் ஒத்துழைப்பு தந்த காரணம் என்றும் சொல்லலாம். கொரோனா வைரஸை தமிழ்நாட்டை விட்டு விரட்ட வேண்டும் என்பது அரசின் கொள்கை முடிவாக எடுக்கப்பட்டு பல்வேறு தடுப்பு நடவடிக்கைகள் துரிதபடுத்தப்பட்டு வருகின்றது. ஒவ்வொரு உயிரும் அரசுக்கு முக்கியம் என்பதை முதலமைச்சர் எடுத்துரைத்து இன்று களப்பணியில் ஈடுபட்டு வருகிறார்.

ஆனால் கணினி முன் நின்று தினந்தோறும் பொய்யான குற்றச்சாட்டை கூறி வரும் ஸ்டாலினுக்கு, முதலமைச்சர் எடப்பாடி கே.பழனிசாமியை குறை கூற எந்த அருகதையும் கிடையாது. இன்று அனைத்து மாநில முதல்வர்களும் தமிழக அரசை பார்த்து கொரோனா வைரஸ் தடுப்பு நடவடிக்கையை பின்பற்றி வருகின்றனர். சிறு,குறு தொழிற்சாலையை பொறுத்தமட்டில் ஒரு மாநிலத்தின் முதல்வரே வங்கியாளர்கள் கூட்டம் நடத்தியது. இந்திய அளவில் தமிழ்நாட்டில் மட்டும் தான். 30% சதவீத ஊழியர்களோடு பணிபுரிந்த தொழிற்சாலைகள் இன்று 100 சதவீத பணியாளர்களுடன் ஊரடங்கு காலத்தில் பணிபுரிய முதலமைச்சர் அக்கறையுடன் அறிவித்துள்ளார். என்றுமே மக்களுக்கான அரசாக அம்மாவின் அரசு செயல்படும்.

இவ்வாறு அமைச்சர் பா.பென்ஜமின் கூறினார்.

இந்நிகழ்ச்சியில் வில்லிவாக்கம் ஒன்றிய கழக செயலாளர் ராஜா என்கிற பேரழகன், அயப்பாக்கம் எம்.எம் மூர்த்தி, மனோகரன், ஜீவா, அண்ணாதுரை, அஞ்சப்பர் பாலா உட்பட பலர் கலந்து கொண்டனர்.