மதுரை

எதிர்க்கட்சி தலைவர்களுக்கு பாதுகாப்பு வழங்க வேண்டும் – அரசுக்கு, மதுரை மாநகர் மாவட்ட அம்மா பேரவை வலியுறுத்தல்

மதுரை

மக்களுக்காக பணியாற்றி வரும் எதிர்க்கட்சி தலைவர்களுக்கு உரிய பாதுகாப்பு வழங்க வேண்டும் என்று மதுரை மாநகர் மாவட்ட அம்மா பேரவை வலியுறுத்தி உள்ளது.

மதுரை முனிசாலையில் மாநகர் மாவட்ட அம்மா பேரவை சார்பில் நிர்வாகிகள் ஆலோசனை கூட்டம் நடைபெற்றது. கூட்டத்திற்கு மாவட்ட அம்மா பேரவை செயலாளரும், முன்னாள் சட்டமன்ற உறுப்பிருமான எஸ்.எஸ்.சரவணன் தலைமை தாங்கினார். மாநில அம்மா பேரவை துணை செயலாளர் வெற்றிவேல் முன்னிலை வகித்தார்.முன்னாள் சட்டமன்ற உறுப்பினர் அமர்நாத் வரவேற்றார்.

இக்கூட்டத்தில் நிறைவேற்றப்பட்ட தீர்மானங்கள் வருமாறு:-

ஜனநாயக முறைப்படி கழக ஒருங்கிணைப்பாளராக ஓ.பன்னீர்செல்வம், கழக இணை ஒருங்கிணைப்பாளராக எடப்பாடி கே.பழனிசாமி ஆகியோர் தேர்ந்தெடுக்கப்பட்டுள்ளனர். அவர்களுக்கு மதுரை மாநகர் அம்மா பேரவை சார்பில் நல்வாழ்த்துக்களை தெரிவித்து கொள்கிறோம்.

கடந்த 5-ந்தேதி புரட்சித்தலைவி அம்மா அவர்களின் நினைவுநாளை முன்னிட்டு த அவரது நினைவாலயத்தில் கழக ஒருங்கிணைப்பாளரும், முன்னாள் முதலமைச்சருமான ஓ.பன்னீர்செல்வம், கழக இணை ஒருங்கிணைப்பாளரும், முன்னாள் முதலமைச்சருமான எடப்பாடி கே.பழனிசாமி ஆகியோர் மரியாதை செய்து விட்டு திரும்புகின்ற போது காலி கயவர் கூட்டம் அம்மாவின் திருப்பெயரை பயன்படுத்திக்கொண்டு அராஜகம் செய்தார்கள்.

புரட்சித்தலைவி அம்மா வன்முறையை, அராஜகத்தை எந்நாளும் ஏற்றுக்கொண்டது கிடையாது. அவரது நினைவாலயத்தில் வன்முறையை நடத்திய கயவர்களை வன்மையாக கண்டிக்கிறோம்.

சட்டம்-ஒழுங்கை கேள்விக்குறியாக்கும் வகையில் இந்த நிகழ்வு அமைந்திருந்தது கைகட்டி வாய்மூடி இந்த வன்முறைகளுக்கு சிவப்பு கம்பளத்தை விரித்த தி.மு.க அரசின் காவல்துறையை கண்டிக்கிறோம். அராஜகம் யார் செய்தாலும் கடுமையாக நடவடிக்கை எடுக்க வேண்டும்.

மக்களுக்காக பணியாற்றி வரும் எதிர்க்கட்சி தலைவர்களுக்கு பொது இடங்களில், பொது நிகழ்ச்சிகளில் உரிய பாதுகாப்பு வழங்கும் மரபை அரசு தொடர்ந்து செயல்படுத்த வேண்டும் என்று இக்கூட்டம் கேட்டுக்கொள்கிறது.

இவ்வாறு தீர்மானங்கள் நிறைவேற்றப்பட்டன.