தற்போதைய செய்திகள்

தமிழகத்தில் கொரோனா வைரஸ் சமூக பரவலாக இல்லை – அமைச்சர் க.பாண்டியராஜன் திட்டவட்டம்

அம்பத்தூர்

தமிழகத்தில் கொரோனா வைரஸ் சமூகப் பரவலாக மாறவில்லை என்று திருவேற்காட்டில் நடைபெற்ற மருத்துவ முகாமில்
அமைச்சர் க.பாண்டியராஜன் திட்டவட்டமாக கூறினார்

தமிழகத்தில் கொரோனா வைரஸை கட்டுப்படுத்தும் வகையில் முதலமைச்சர் எடப்பாடி கே.பழனிசாமி, துணை முதல்வர்
ஓ.பன்னீர்செல்வம் ஆகியோரின் ஆணைக்கிணங்க பல்வேறு தடுப்பு நடவடிக்கைகள் எடுக்கப்பட்ட காரணத்தால் இன்று அதன் தாக்கம் குறைவாகவே காணப்படுகிறது.

திருவள்ளூர் மாவட்டம் ஆவடி சட்டமன்ற தொகுதியிலும் கொரோனா வைரசை கட்டுப்படுத்தும் வகையில் ஆங்காங்கே மருத்துவ முகாம்கள் காய்ச்சல் பரிசோதனை மையம் கபசுர குடிநீர் வழங்குதல் போன்ற பல்வேறு தடுப்பு நடவடிக்கைகள் எடுக்கப்பட்டு வருகின்றன.

அந்த வகையில் நேற்று ஆவடி சட்டமன்ற தொகுதிக்குட்பட்ட திருவேற்காடு சீமாதம்மன் கோயில் அருகே நடைபெற்ற காய்ச்சல் பரிசோதனை முகாமை தமிழ் வளர்ச்சி மற்றும் தொல்லியல் துறை அமைச்சர் க.பாண்டியராஜன் பார்வையிட்டு அங்குள்ள மருத்துவர்கள் மற்றும் செவிலியர்கள் ஆகியோருக்கு ஆலோசனை வழங்கினார். பின்னர் அயனம்பாக்கம் கிராம நிர்வாக அலுவலகத்தில் முதலமைச்சர் ஆணைக்கிணங்க சுமார் ஐம்பதுக்கும் மேற்பட்ட மாற்றுத் திறனாளிகளுக்கான உதவி தொகையாக ரூ.1000 ரொக்கப் பணத்தை வழங்கினார்

பின்னர் அமைச்சர் க.பாண்டியராஜன் செய்தியாளர்களிடம் கூறியதாவது:-

ஆவடி சட்டமன்ற தொகுதிக்குட்பட்ட திருநின்றவூர், சேக்காடு, திருவேற்காடு, நூம்பல், பருத்திப்பட்டு, திருமுல்லைவாயல், போன்ற பகுதிகளில் பல்வேறு தடுப்பு நடவடிக்கைகள் எடுக்கப்பட்டு வருகின்றன குறிப்பாக 12 காய்ச்சல் பரிசோதனை முகாம்கள் மூலம் காய்ச்சலை கண்டறியும் பணி நடைமுறையில் உள்ளன. சென்னையிலுள்ள ஒரு மண்டலத்தில் உள்ள மக்கள் தொகையை விட ஏழு லட்சம் மக்கள் தொகையை கொண்டதாக இந்த ஆவடி சட்டமன்ற தொகுதி உள்ளது. 1262 கொரோனா பாசிட்டிவ் நபர்கள் கண்டறியப்பட்டு அதில் 57 விழுக்காடு பூரண குணமடைந்து இன்று வீட்டிற்கு அனுப்பப்பட்டுள்ளனர்.

மேலும் 42 விழுக்காடு தான் வீட்டில் தனிமைப்படுத்தப்பட்டு சிகிச்சை பெற்று வருகின்றனர். பொதுமக்களின் கோரிக்கையை ஏற்று கூடுதலாக 4 ஆம்புலன்ஸ்கள் ஆங்காங்கே நிறுத்தி வைக்கப்பட்டுள்ளன. எங்கே மக்களின் அவசர அழைப்பு வருகிறதோ அங்கு சென்று உடனடியாக அவர்களை அங்கிருந்து மருத்துவமனைகளுக்கு அழைத்து செல்லும் பணிகள் விரைந்து நடக்க வேண்டும். என்பதற்காக ஆம்புலன்ஸ்கள் வழங்கப்பட்டுள்ளது. இன்று முதலமைச்சரின் கோரிக்கையை ஏற்று கொள்ளும் வகையில் முற்றிலும் குணமடைந்து வீடு திரும்பியவர்கள் பிளாஸ்மா சிகிச்சைக்கு தங்கள் ரத்தத்தை தர முன் வந்துள்ளனர்.

ஆவடி தொகுதியை பொறுத்தமட்டில் 12 மருத்துவ முகாம்கள் அமைக்கப்பட்டு செவிலியர்கள் மருத்துவர்கள் கொண்ட குழு காய்ச்சல் உள்ள நபர்களை கண்டறியும் பணியில் முழுவீச்சில் ஈடுபடுத்தப்பட்டுள்ளனர். மேலும் திருவேற்காடு நகராட்சி பகுதியில் 75 பேர் வீடு வீடாக சென்று காய்ச்சல் பரிசோதனை செய்யும் பணிகளில் ஈடுபட்டு வருகின்றனர்.

ஆவடி பகுதியில் சுமார் 400க்கும் மேற்பட்டவர்கள் இப்பணியில் ஈடுபட்டு வருகின்றனர். முதலமைச்சர் ஆணைக்கிணங்க இன்று ஆவடி சட்டமன்ற தொகுதிக்கு உட்பட்ட பூந்தமல்லி வட்டத்தில் அடங்கிய பல்வேறு பகுதிகளில் மாற்றுத்திறனாளிகள் கண்டறியப்பட்டு அவர்களின் ஆவணங்கள் சரிபார்க்கப்பட்டு அவர்களின் வீடுதேடி ரூபாய் ரொக்கப்பணம் 1000 வழங்கும் பணி நடைபெற்று வருகிறது.

மேலும் ஆவடி சட்டமன்ற தொகுதியில் உள்ள 2000 நடைபாதை வியாபாரிகளுக்கு ரூபாய் 10 ஆயிரம் கடன் வழங்கும் பணிகளுக்கான ஆயத்த வேலைகள் படிவங்கள் சரிபார்ப்புப் பணிகள் ஆகியவையும் நடைபெற்று வருகின்றன. மு.க.ஸ்டாலின் வீட்டிலிருந்தபடியே அர்த்தமில்லாமல் ஏதாவது ஒன்றை அறிக்கையாக வெளியிட்டுக் கொண்டிருக்கிறார்.

இன்று தமிழகத்தில் 1 லட்சத்து 32 ஆயிரம் கொரோனா பாசிட்டிவ் நோயாளிகள் கண்டறியப்பட்டு அவர்களில் 80 ஆயிரம் பேர் பூரண குணமடைந்து வீடு திரும்பியுள்ளனர். இதற்கு மாநில அரசின் உழைப்போம் மருத்துவர்களின் ஓய்வறியா சேவையும் தான் காரணம் என்று மு.க.ஸ்டாலினுக்கு தெரியாதா. இதை பாராட்ட அவருக்கு மனம் வரவில்லை. போகிற போக்கில் ஏதாவது ஒரு அறிக்கை வெளியிட்டுக் கொண்டிருக்கிறார்.

இன்று இந்திய அளவில் ஒரு 1 கோடியே 20 லட்சம் நபர்களுக்கு நோய்த்தொற்று உறுதி செய்யப்பட்டுள்ளது. இந்திய மக்கள் தொகையான 135 கோடியில் இந்திய அளவில் 1000 நபர்களுக்கு 9 பேருக்கு பரிசோதனை செய்யப்படுகிறது. ஆனால் தமிழகத்தைப் பொறுத்தவரை 1000 நபர்களுக்கு 19 பேருக்கு பரிசோதனை செய்யப்படுகிறது. இதுவரை சுமார் 14 லட்சம் நபர்களுக்கு பரிசோதனைகள் செய்யப்பட்டு வருகின்றன. இறப்பு விகிதம் பார்த்தோமேயானால் இந்திய அளவில் 3 சதவீதமும் தமிழகத்தை பொறுத்தவரை 1.4 சதவீதமும் காணப்படுகிறது.

இன்றைய கொரோனா பாசிட்டிவ் நபர்களின் எண்ணிக்கை 48,196 மட்டும் தான். இது ஒரு 1லட்சத்து 32 ஆயிரம் நபர்களில் குணமானவர்கள் எண்னிக்கையும் அடங்கியுள்ளது. சிகிச்சை பெறுபவர்கள் எண்ணிக்கையும் அடங்கி உள்ளது. உயிரிழப்பு ஏற்பட்டிருப்பவர்கள் எண்ணிக்கையும் அடங்கியுள்ளது. இதையெல்லாம் கணக்கில் கொள்ளாமல் தினமும் 1 லட்சத்து 32 ஆயிரம் பாசிட்டிவ் கேஸ் என்று மு.க.ஸ்டாலின் எதையுமே தெரியாமல் உளறுகிறார்.

இன்று இந்திய அளவில் 65% நபர்களும் தமிழக அளவில் 63 சதவிகிதம் நபர்களும் குணமடைந்து வருகிறார்கள். சென்னையை பொறுத்தமட்டில் 16606 நபர்கள் தான் கொரோனாவால் பாதிக்கப்பட்டுள்ளனர். இது தமிழக மக்கள் தொகையில் 13 சதவீதம் ஆகும் தமிழகத்தை பொறுத்தவரை 95 விழுக்காட்டில் 48 விழுக்காடு கிராமப்புற பகுதியில் உள்ளன இந்த 48 விழுக்காட்டில் வெறும் 5 சதவீதம் மட்டும் தான் கொரோனா பாதிப்பு ஏற்பட்டுள்ளது என்றால் கிராமப்புறங்களில் பல்வேறு சித்த மருத்துவத்தின் மூலம் நோய்கள் தடுக்கப்படுகின்றன. ஆனால் ஒரு சிலர் வேண்டுமென்றே நகர்புரத்தை விட கிராமப்புறங்களில் கொரோனா வைரஸ் அதிகரிக்கிறது என்று தேவையில்லாமல் பீதியை கிளப்புகின்றனர்.

தயவுசெய்து பொதுமக்களை பாதிக்கும் வகையில் அவ்வாறு பீதியை கிளப்ப வேண்டாம். முன்னாள் மத்திய அமைச்சர் பொன் ராதாகிருஷ்ணன் தமிழகத்தில் கொரோனா வைரஸ் சமூக பரவலாக மாறிவிட்டதாக கருத்து தெரிவித்திருப்பது. அவரின் தனிப்பட்ட கருத்தாக இருக்கும். அவர் வேண்டுமானால் மத்திய சுகாதாரத்துறை அமைச்சரிடமே இதுகுறித்து விளக்கம் கேட்கலாம். மத்திய அமைச்சரே இந்தியாவில் இதுவரை கொரோனா வைரஸ் சமூகப் பரவலாக மாறவில்லை என்று கூறியிருக்கிறார். நாங்களும் சமூக பரவல் என்ற வதந்தியை திட்டவட்டமாக மறுக்கிறோம்.

இவ்வாறு அமைச்சர் க.பாண்டியராஜன் கூறினார்.

இந்நிகழ்ச்சியில் முன்னாள் நகர்மன்றத் தலைவர் கோலடி மகேந்திரன், திருமலை ராஜா உட்பட பலர் கலந்து கொண்டனர்.