சிறப்பு செய்திகள்

பொங்கல் பரிசு தொகுப்பு பெற 26-ம்தேதி முதல் டோக்கன் விநியோகம் – தமிழக அரசு அறிவிப்பு

சென்னை

பொங்கல் பரிசு தொகுப்பு பெற வரும் 26ம்தேதி முதல் டோக்கன் விநியோகிக்கப்படும் என்று தமிழக அரசு தெரிவித்துள்ளது.

பொங்கல் திருநாளை சிறப்பாக கொண்டாடும் வகையில் அனைத்து அரிசி பெறும் குடும்ப அட்டைதாரர்களுக்கும் ரூ.2.500 மற்றும் பொங்கல் பரிசு தொகுப்பு ஜனவரி 4ம்தேதி முதல் வழங்க முதலமைச்சர் எடப்பாடி கே.பழனிசாமி உத்தரவிட்டிருந்தார்.

இதனை செயல்படுத்தும் வகையில் உணவு மற்றும் நுகர்வோர் பாதுகாப்புத்துறை ஆணையாளர், அலுவலர்களுக்கு வழங்கியுள்ள உத்தரவில் கூறப்பட்டுள்ளதாவது:-

சுழற்சி முறையில் பொங்கல் பரிசு தொகுப்பு வழங்க வேண்டும். நாள் ஒன்றுக்கு 200 குடும்ப அட்டைகளுக்கு மிகாமல் வழங்குவதற்கு ஏற்பாடு செய்ய வேண்டும். முற்பகலில் 100 குடும்ப அட்டைகளுக்கும். பிற்பகலில் 100 குடும்ப அட்டைகளுக்கும் வழங்கும் நாள் நேரம் போன்ற விவரங்களை குறிப்பிட்டு டோக்கன்கள் வரும் 26ம்தேதி முதல் 30ம் தேதிக்குள் முடிய வீடுதோறும் சென்று நியாயவிலைக் கடை பணியாளர்கள் மூலம் வழங்க வேண்டும்.

குறிப்பிட்ட நாளில் பொருட்கள் பெறாத குடும்ப அட்டைதாரர்களுக்கு 13.1.2021 அன்று வழங்கப்பட வேண்டும். பொங்கல் பரிசுத் தொகுப்பு மற்றும் ரொக்கத்தொகை ரூ.2.500ம் ஒரே நேரத்தில் வழங்க வேண்டும்.குடும்ப அட்டைதாரர்களுக்கு பொங்கல் பரிசுத் தொகுப்பு வழங்குவதை உறுதி செய்யும் வகையில் ஒப்புதல் பெற வேண்டும். குடும்ப அட்டையில் இடம் பெற்றுள்ள உறுப்பினர்களில் யார் வந்தாலும் பொங்கல் பரிசுத்தொகுப்பு வழங்கப்படும் என்பதை தெளிவுப்படுத்தி கடைகளில் நெரிசல் ஏற்படுவதை தவிர்க்க வேண்டும்.

பொங்கல் பரிசுத் தொகுப்பு பெறுவதற்காக வருகின்ற மாற்றுத்திறனாளிகளை வரிசையில் நிற்க வைக்காமல் முன்னுரிமை வழங்கப்பட வேண்டும். ஆண்களை தனியாகவும், பெண்களை தனியாகவும் நிற்க வைக்க வேண்டும். குடும்ப அட்டைதாரர்கள் ஒரு மீட்டர் இடைவெளியில் தனிமைப்படுத்தி பொருட்கள் பெறவேண்டும் என்று அறிவுறுத்த வேண்டும்.

இவ்வாறு அதில் தெரிவிக்கப்பட்டுள்ளது.