மற்றவை

தொடர் கண்காணிப்பில் 3.47 லட்சம் பேர் 2 லட்சம் – பேருக்கு ஹோமியோபதி மருந்துகள் வழங்க நடவடிக்கை

சென்னை

முதலமைச்சர் ஆணைக்கிணங்க, பெருநகர சென்னை மாநகராட்சிக்குட்பட்ட பகுதிகளில் மேற்கொள்ளப்பட்டு வரும் கொரோனா வைரஸ் தொற்று தடுப்பு மற்றும் பாதுகாப்பு நடவடிக்கைகள் தொடர்பான ஆய்வுக்கூட்டம் நகராட்சி நிர்வாகம், ஊரக வளர்ச்சி மற்றும் சிறப்பு திட்டங்கள் செயலாக்கத்துறை அமைச்சர் எஸ்.பி.வேலுமணி தலைமையில் நேற்று ரிப்பன் மாளிகையில் உள்ள அம்மா மாளிகையில் நடைபெற்றது.

இக்கூட்டத்தில் மீன்வளம், பணியாளர் மற்றும் நிர்வாக சீர்திருத்தத்துறை அமைச்சர் டி.ஜெயக்குமார், உயர்கல்வித்துறை அமைச்சர் கே.பி.அன்பழகன், உணவு மற்றும் உணவுப்பொருள் வழங்கல் துறை அமைச்சர் ஆர்.காமராஜ், மக்கள் நல்வாழ்வுதுறை அமைச்சர் டாக்டர் சி.விஜயபாஸ்கர், வருவாய், பேரிடர் மேலாண்மைத்துறை மற்றும் தகவல் தொழில்நுட்பவியல் துறை அமைச்சர் ஆர்.பி.உதயகுமார், தமிழ் ஆட்சி மொழி மற்றும் தமிழ்ப்பண்பாடுத்துறை அமைச்சர் க.பாண்டியராஜன் ஆகியோர் கலந்து கொண்டனர்.

இக்கூட்டத்தின் போது முதலமைச்சரின் வழிகாட்டுதலின்படி, எடுத்து வரும் தொடர் நடவடிக்கையின் காரணமாக தமிழகத்தில் கொரோனா வைரஸ் தொற்று தடுப்பு நடவடிக்கைகள் மிகச்சிறப்பாக மேற்கொள்ளப்பட்டு வருகின்றது. அதன் தொடர்ச்சியாக முதலமைச்சர் ஒவ்வொரு மண்டலத்திலும் கண்காணிப்பு பணிகளை மேற்கொள்ள இந்திய ஆட்சி பணி அலுவலர்கள் மற்றும் காவல்துறை அலுவலர்களை நியமித்துள்ளார்.

பெருநகர சென்னை மாநகராட்சிக்குட்பட்ட அனைத்து பகுதிகளிலும் கிருமிநாசினி தெளிக்கும் பணிகள் மேற்கொள்ளப்பட்டு, மக்களுக்கு நோய் எதிர்ப்பு சக்தியை அதிகரிக்கும் பொருட்டு இந்திய மருத்துவத் துறையின் மூலம் கபசுரக்குடிநீர், ஊட்டச்சத்து மாத்திரைகள் வழங்கப்பட்டு வருகின்றது. மேலும், வீடு வீடாக சென்று காய்ச்சல் உள்ளதா என கணக்கெடுக்கும் பணியும் தீவிரமாக நடைபெற்று வருகின்றது.

தூய்மை பணியாளர்கள், வீடு வீடாக சென்று கணக்கெடுப்பவர்கள், பூச்சி தடுப்புத்துறை பணியாளர்கள், சுகாதார பணியாளர்கள் மற்றும் மேற்பார்வை அலுவலர்கள் என மொத்தம் 38,198 நபர்கள் கொரோனா வைரஸ் தொற்று தடுப்பு பணிகளில் ஈடுபடுத்தப்பட்டுள்ளனர். மேலும், சென்னைப் பள்ளி ஆசிரியர்கள் மூலம் வீடு வீடாக சென்று கணக்கெடுப்பு பணிகள் மேற்கொள்ளப்பட உள்ளன.

பெருநகர சென்னை மாநகராட்சிக்குட்பட்ட பகுதிகளில் 10 நடமாடும் மாதிரி சேகரிப்பு மையங்கள் உட்பட 40 கொரோனா வைரஸ் தொற்று கண்டறியும் பரிசோதனை மையங்கள் உள்ளன. இதனால் சென்னையில் மட்டும் கிட்டதட்ட 1.5 லட்சம் பரிசோதனைகள் மேற்கொள்ளப்பட்டுள்ளது. சென்னையில் உள்ள வைரஸ் தொற்று பாதித்த பகுதிகள் நுண் கண்காணிப்பு (Micro Monitoring) முறையில் கண்காணிக்கப்பட்டு வருகின்றது. கட்டுப்படுத்தப்பட்ட மண்டலங்களில் உள்ள ஏழை, எளிய மக்கள் பாதுகாப்பாக பயன்படுத்துவதற்காக போதுமான அளவு நடமாடும் கழிப்பறைகள் ஏற்பாடு செய்யப்பட்டுள்ளது.

மேலும், பெருநகர சென்னை மாநகராட்சி மருத்துவர்கள் வீட்டில் தனிமைப்படுத்தப்பட்ட நோயாளிகளின் உடல்நலனை 14 நாட்களும் தொலைபேசி மூலம் கண்காணித்து ஆலோசனை வழங்கி வருகின்றனர். பெருநகர சென்னை மாநகராட்சி நகர சுகாதார செவிலியர்கள், செவிலியர்கள், அங்கன்வாடி பணியாளர்கள் ஆகியோர் நோய் பாதிப்பு அதிகம் வர வாய்ப்புள்ளவர்களாக கணக்கிடப்பட்ட 3,47,380 நபர்களை தொடர்ந்து கண்காணித்து வருகின்றனர்.

பெருநகர சென்னை மாநகராட்சி Helpage India நிறுவனத்துடன் இணைந்து முதியோர்களை பாதுகாக்க ஒவ்வொரு நாளும் ஒரு தன்னார்வலர் சராசரியாக 100 முதியோர்களை தொடர்பு கொண்டு நலம் விசாரித்து தேவையானவற்றை அறிந்து, உரிய தொடர்புகளை ஏற்படுத்தி அவர்களின் தேவைகளை நிறைவு செய்ய நடவடிக்கை எடுக்கப்பட்டுள்ளது.

முதலமைச்சர் உத்தரவின்படி, கட்டுப்படுத்தப்பட்ட பகுதிகளில் கொரோனா வைரஸ் தொற்று உள்ளவர்களை ஆரம்பத்திலேயே கண்டறிந்து, அவர்களுக்கு தகுந்த சிகிச்சை அளிப்பதற்கு ஏதுவாக நாளொன்றிற்கு 100 காய்ச்சல் சிறப்பு முகாம்கள் நடத்தப்பட்டு வருகின்றன. இந்த முகாம்களின் எண்ணிக்கையை 200 ஆக உயர்த்தவும் நடவடிக்கைகள் எடுக்கப்பட்டு வருகிறது.

மேலும், அரசினால் அங்கீகரிக்கப்பட்ட ஹோமியோபதி மருந்து (ஆர்சனிக் ஆல்பம்) கொரோனா வைரஸ் தொற்று தடுப்பிற்காக தற்பொழுது பயன்படுத்தப்பட்டு வருகிறது. இதற்காக 2 லட்சம் நபர்களுக்கான ஹோமியோபதி மருந்துகள் கொள்முதல் செய்ய ஆணை வழங்கப்பட்டுள்ளது. நோய்த்தொற்று தடுப்பு பணிகளில் ஈடுபட்டு வரும் களப்பணியாளர்களுக்கு இந்திய மருத்துவக் கழகம் பரிந்துரையின் பேரில் ஹைட்ராஸி குளோரோகுயின் மாத்திரைகள் வழங்கப்பட உள்ளன.

குடிசைப்பகுதி மக்களுக்கான சிறப்பு திட்டத்தின் படி, 98 தன்னார்வ தொண்டு நிறுவனங்கள் மூலம் 1979 குடிசைப் பகுதிகளில் வாழும் சுமார் 30 லட்சம் மக்களுடைய உடல்நல விவரங்கள் கணக்கீடு செய்தல், எளிதில் பாதிப்புக்குள்ளாகும் மக்களை அடையாளம் காணுதல், கோவிட் 19 அறிகுறிகள் கண்டறிந்து, தற்காப்பு மற்றும் முன்னெச்சரிக்கை நடவடிக்கைகள் குறித்து விளக்கப்பட்டு வருகிறது.

குடிசைப்பகுதிகளில் வாழும் மக்களுக்கு மீண்டும் பயன்படுத்தக் கூடிய துணியினாலான தலா 3 முகக்கவசங்கள், ஊட்டச்சத்து மாத்திரைகள் மற்றும் கபசுரக் குடிநீர் ஆகியவை வழங்குதல், வீடு வீடாக சென்று தொற்று பாதிப்பு குறித்து கணக்கெடுத்தல், வைரஸ் அறிகுறி உள்ளவர்களுக்கு பரிசோதனை மேற்கொள்ளுதல் போன்ற பணிகள் மேற்கொள்ளப்பட்டு வருகின்றன. இதன் காரணமாக குணமடைவோரின் எண்ணிக்கை அதிகமாகவும், இறப்பு விகிதம் குறைவாகவும் உள்ளது என்று தெரிவிக்கப்பட்டது.

இக்கூட்டத்தில் அமைச்சர்கள் தங்களுக்கென ஒதுக்கப்பட்ட மண்டல பொறுப்பு அலுவலர்களுடன் கொரோனா வைரஸ் தொற்று தொடர்பாக எடுக்கப்பட்ட நடவடிக்கைகள் குறித்தும், எடுக்கப்பட வேண்டிய நடவடிக்கைகள் குறித்தும் கலந்தாலோசித்தனர்.

இக்கூட்டத்தில் கொரோனா வைரஸ் தொற்று தடுப்பு சிறப்பு அதிகாரியும், வருவாய் நிர்வாக ஆணையருமான டாக்டர் ஜெ. ராதாகிருஷ்ணன், மக்கள் நல்வாழ்வு மற்றும் குடும்ப நலத்துறை அரசு செயலாளர் டாக்டர் பீலா ராஜேஷ், பெருநகர சென்னை மாநகராட்சி ஆணையாளர் கோ.பிரகாஷ்,கொரோனா வைரஸ் தொற்று தடுப்பு சிறப்பு ஒருங்கிணைப்பாளரும், நில நிர்வாகத்துறை ஆணையாளருமான பங்கஜ்குமார் பன்சால், இணை, துணை ஆணையாளர்கள், பெருநகர சென்னை மாநகராட்சி மற்றும் காவல்துறை உயர் அலுவலர்கள் உட்பட பலர் கலந்து கொண்டனர்.